ມີສຽງສົນທະນາ ! ທຣຳ ກົດດັນທາງການລັດຈໍເຈຍ ຫາຄະແນນຊ່ວຍພິກປີ້ນຜົນການເລືອກຕັ້ງ

- image - ມີສຽງສົນທະນາ ! ທຣຳ ກົດດັນທາງການລັດຈໍເຈຍ ຫາຄະແນນຊ່ວຍພິກປີ້ນຜົນການເລືອກຕັ້ງ
- Untitled design - ມີສຽງສົນທະນາ ! ທຣຳ ກົດດັນທາງການລັດຈໍເຈຍ ຫາຄະແນນຊ່ວຍພິກປີ້ນຜົນການເລືອກຕັ້ງ

ສະຖານີ CNN ລາຍ​ງານ​ອ້າງ​ອີງການ​ບັນທຶກ​ສຽງ​ສົນທະນາ​ທາງ​ໂທລະສັບ ​ເຊິ່ງ​ເປັນ​ຫລັກ​ຖານ​ວ່າ: ປະທານາທິບໍດີ ​ໂດ​ນັລ ທຣຳ ກົດ​ດັນ​ໃຫ້​ທ່ານ ​ແບຣດ ຣາບ​ເຟນສະ​ເປີ​ເກີ ​ເລຂາທິການ​ແຫ່ງ​ລັດ​ຈໍ​ເຈຍ ພະຍາຍາມ​ຫາ​ຄະ​ແນນ​ສຽງ​ໃຫ້​ພຽງພໍ​ຈະ​ພິກ​ປີ້ນ​ໃຫ້​ທ່ານ ທຣຳ ຊະນະ​ການ​ເລືອກ​ຕັ້ງ​ໃນ​ລັດ​ນີ້ ຈາກ​​ໄຊຊະນະ​ເປັນ​ຂອງ​ທ່ານ ​ໂຈ ​ໄບ​ເດນ ວ່າ​ທີ່​ປະທານາທິບໍດີ​ຄົນ​ຕໍ່​ໄປ.

ການ​ບັນທຶກ​ສຽງ​ທີ່ CNN ​ໄດ້​ມາ​ມີ​ຄວາມ​ຍາວ​ກວ່າ 1 ຊົ່​​​ວ​ໂມງ ​ເປັນ​ການ​ສົນທະນາ​ທາງ​ໂທລະສັບ​ລະຫວ່າງ​ທ່ານ ທຣຳ ກັບ​ທ່ານ ຣາບ​ເຟນສະ​ເປີ​ເກີ ​ໃນ​ວັນ​ທີ 2 ມັງກອນ​ຜ່ານ​ມາ ​ໂດຍ​ທ່ານ ທຣຳ ຕຳ​ນິວ່າ​ເລຂາທິການ​ແຫ່ງ​ລັດ​ຈໍ​ເຈຍ ​ເຊິ່ງ​ເປັນ​ສະມາຊິກ​ພັກຣີພັບ​ລິ​ກັນ​ເຊັ່ນ​ກັນ​ວ່າ: ບໍ່​ຍອມ​ເວົ້າວ່າ​ທ່ານ​ຊະນະ​ການ​ເລືອກ​ຕັ້ງ​ໃນ​ລັດ​ຈໍ​ເຈຍ ​ແລະ ​ເນັ້ນວ່າ: ​ເກີດ​ການສໍ້​ໂກງ​ການ​ເລືອກ​ຕັ້ງຂຶ້ນ ​ເຊິ່ງ​ເປັນ​ຂໍ້​ກ່າວ​ຫາ​ທີ່​ທ່ານ ທຣຳ ພະຍາຍາມ​ປຸນປັ້ນ​ໂດຍ​ບໍ່​ມີ​ຫລັກ​ຖານ​ສະໜັບສະໜູນ.

“ປະຊາຊົນ​ໃນ​ລັດ​ຈໍ​ເຈຍ​ຄຽດ​ແຄ້ນ​ ປະຊາກອນ​ຂອງ​ປະ​ເທດ​ຄຽດ​ແຄ້ນ ຂ້ອຍ​ຄິດ​ວ່າ​ເວົ້າອອກ​ໄປ​ແບບ​ນີ້​ບໍ່​ເຫັນ​ຈະ​ຜິດ​ຫຍັງ ​ເວົ້າ​ໄປ​ວ່າ​ເຈົ້າ​ໄດ້​ນັບ​ຄະ​ແນນ​ໃໝ່​ແລ້ວ” ຣາບ​ເຟນສະ​ເປີ​ເກີ ຕອບ​ກັບ​ວ່າ: “ທ່ານ​ປະທານາທິບໍດີ ຄວາມ​ທ້າ​ທາຍ​ທີ່​ທ່ານ​ກຳລັງ​ຜະ​ເຊີນ​ຢູ່ ​ແລະ ຊຸດ​ຂໍ້​ມູນ​ທີ່​ທ່ານ​ມີ​ມັນ​ຜິດ”.

ການ​ສົນທະນາ​ອີກ​ວັກ​ໜຶ່ງ ປະທານາທິບໍດີ​ອາ​ເມ​ລິ​ກາ ກ່າວ​ວ່າ: “ສິ່ງ​ທີ່​ຂ້ອຍ​ຢາກ​ໃຫ້​ເຈົ້າ​ເຮັດ​ຄື ຫາ​ຄະ​ແນນ​ສຽງ 11.780 ຄະ​ແນນ ​ເຊິ່ງ​ເປັນ​ຄະ​ແນນ​ຫລາຍ​ກວ່າ​ທີ່​ເຮົາ​ມີ ​ແຕ່​ບໍ່​ອາດ​ຈະ​ຍາກ ​ເພາະ​ເຮົາ​ຊະນະ​ລັດ​ຈໍ​ເຈຍ… ທຸກ​ຄົນ​ຕ່າງ​ຢາກ​ໄດ້​ການ​ເລືອກ​ຕັ້ງທີ່​ຍຸຕິ​ທຳ ​ແລະ ​ເຈົ້າ​ເອງ​ກໍ​ເປັນຣີພັບ​ລິ​ກັນ”.

​ແຕ່​ເລຂາທິການ​ແຫ່ງ​ລັດ​ຈໍ​ເຈຍ​ຕອບ​ກັບ​ວ່າ: “​ເຮົາ​ເຊື່ອ​ວ່າ​ເຮົາ​ມີ​ການ​ເລືອກ​ຕັ້ງທີ່​ຍຸຕິ​ທຳ​ແລ້ວ” ​ເຊິ່ງທ່ານ ທຣຳ ຕອບ​ກັບ​ທັນທີ​ວ່າ: “ນີ້​ບໍ່​ແມ່ນ​ການ​ເລືອກ​ຕັ້ງທີ່​ຍຸຕິ​ທຳ ບໍ່​ເລີຍ ​ເພາະ​ຄະ​ແນນ​ຫາຍ​ໄປ​ຫລາຍ​ແສນ​ສຽງ”.

ທ່ານ ທຣຳ ອ້າງ​ອີກ​ວ່າ: ​ເກີ​ດການສະ​ແກນ​ບັດ​ລົງ​ຄະ​ແນນ​ຊ້ຳຊ້ອນ​ເຖິງ 3 ຄັ້ງ​ໃນ​ລັດ​ຈໍ​ເຈຍ ​ເຊິ່ງທ່ານ ຣາບ​ເຟນສະ​ເປີ​ເກີ ຕອບ​ກັບ​ວ່າ: “​ເຮົາ​ກວດ​ສອບ​ຢ່າງ​ລະອຽດ ​ແລະ ພິສູດ​ແລ້ວ​ວ່າ​ບໍ່​ມີ​ການສະ​ແກນ​ບັດຊ້ຳ 3 ຄັ້ງ”.

CNN ພະຍາຍາມ​ສອບ​ຖາມຄວາມ​ເຫັນ​ຈາກ​ທຳນຽບຂາວ​ເຖິງ​ສິ່ງ​ທີ່​ທ່ານ ທຣຳ ພະຍາຍາມ​ຮ້ອງ​ຂໍ​ຈາກ​ເລຂານຸການ​ແຫ່ງ​ລັດ​ຈໍ​ເຈຍ, ​ແຕ່​ທຳນຽບຂາວ​ປະຕິ​ເສດ​ທີ່​ຈະ​ສະ​ແດງ​ຄວາມ​ເຫັນ. ຂະນະ​ທີ່ CNN ຊີ້​ແຈງ​ວ່າ: ​ໄດ້​ຮັບ​ເທບ​ບັນທຶກ​ສຽງ​ນີ້​ຈາກ​ແຫ​ລ່ງຂ່າວ​ທີ່​ເປັນ​ບຸກຄົນ​ທີ່ຢູ່​ໃນ​ການ​ສົນທະນາ​ດັ່ງກ່າວ, ​ແຕ່​ບໍ່​ເປີດ​ເຜີຍ​ຊື່ ​ເຊິ່ງນອກຈາກ​ທ່ານ ທຣຳ ​ແລະ ທ່ານ ຣາບ​ເຟນສະ​ເປີ​ເກີ ​ແລ້ວ ມີ​ເສນາ​ທິການ​ທຳນຽບຂາວ ​ແລະ ທະນາຍ​ຫລາຍ​ຄົນ​ຮ່ວມ​ຮັບ​ຟັງ​ຢູ່​ນຳ.

- Wave100S AD to Website 2020 0 - ມີສຽງສົນທະນາ ! ທຣຳ ກົດດັນທາງການລັດຈໍເຈຍ ຫາຄະແນນຊ່ວຍພິກປີ້ນຜົນການເລືອກຕັ້ງ

ຫລັງ​ການ​ສົນທະນາ​ວັນ​ທີ 2 ມັງກອນ, ທ່ານ ທຣຳ ​ໂພດ​ຂໍ້ຄວາມ​ໃນ​ທະວິ​ດ​ເຕີ​ວ່າ: ​ໄດ້​ໂທລະສັບ​​ໂອ້​ລົມ​ກັບ​ທ່ານ ຣາບ​ເຟນສະ​ເປີ​ເກີ ​ເພື່ອ​ຮ້ອງ​ຂໍ​ໃຫ້​ກວດ​ສອບ​ການ​ສໍ້​ໂກງ​ເລືອກ​ຕັ້ງ​ໃນ​ລັດ​ຈໍ​ເຈຍ ​ເຊິ່ງທ່ານ ຣາບ​ເຟນສະ​ເປີ​ເກີ ​ໂພດ​ຂໍ້ຄວາມ​ຕອບ​ກັບ​ວ່າ: “ດ້ວຍ​ຄວາມ​ເຄົາລົບ ທ່ານ​ປະທານາທິບໍດີ ສິ່ງ​ທີ່​ທ່ານ​ເວົ້າມັນ​ບໍ່​ເປັນຄວາມ​ຈິງ ​ແລະ ຄວາມ​ຈິງ​ຈະ​ປາກົດ”.

​ເຖິງ​ວ່າ​ຈະ​ເຄີຍ​ເປັນ​ຜູ້​ສະໜັບສະໜູນ​ທ່ານ ທຣຳ, ​ແຕ່​ທ່ານ ຣາບ​ເຟນສະ​ເປີ​ເກີ ປະຕິ​ເສດ​ຄຳ​ກ່າວ​ອ້າງ​ຂອງ​ທ່ານ ທຣຳ ວ່າ: ມີ​ການ​ສໍ້​ໂກງ​ການ​ເລືອກ​ຕັ້ງ​ໃນ​ລັດ​ຈໍ​ເຈຍ​ມາ​ໂດຍ​ຕະຫລອດ ​ໂດຍ​ທ່ານ​ໄດ້​ສັງ​ເກດ​ການ​ນັບ​ຄະ​ແນນ​ໃໝ່ 3 ຄັ້ງ ​ແລະ ກວດ​ສອບ​ຂະ​ບວນການ​ນັບ​ຄະ​ແນນ​ເພື່ອ​ຫາ​ຈຸດ​ຜິດ​ປົກກະຕິ​ອີກ​ຫລາຍ​ຄັ້ງ ​ເຊິ່ງຜົນ​ທີ່​ໄດ້​ຄື ຂະ​ບວນການ​ນັບ​ຄະ​ແນນ​ມີ​ຄວາ​ມຍຸຕິ​ທຳ 99,9% ​ແລະ ບໍ່​ມີ​ຫລັກ​ຖານ​ວ່າ​ເກີດ​ການ​ສຸ​ຈະລິດ.

​ເທບ​ບັນທຶກ​ສຽງ​ສົນ​ທະ​ນາ​ທາງ​ໂທລະສັບ​ນີ້​ສະ​ແດງ​ໃຫ້​ເຫັນ​​ເຖິງ​ຄວາມ​ພະຍາຍາມ​ຢ່າງ​ຍິ່ງ​ຂອງ​ທ່ານ ທຣຳ ທີ່ຈະ​ປ່ຽນ​ແປງ​ຜົນ​ການ​ເລືອກ​ຕັ້ງ ນອກ​ເໜືອ​ຈາກ​ການ​ໃຊ້​ວິທີ​ທາງ​ກົດໝາຍ ​ແລະ ການ​ເມືອງ​ໃນ​ໄລຍະ​ຫລາຍ​ອາທິດ​ຜ່ານ​ມາ.

​ແລະ ການ​ໂອ້​ລົມ​ທາງ​ໂທລະສັບ​ກັບ​ທ່ານ ຣາບ​ເຟນສະ​ເປີ​ເກີ ມີ​ຂຶ້ນກ່ອນ​ພຽງ​ບໍ່​ເທົ່າ​ໃດ​ມື້ ກ່ອນ​ສະພາ​ຄອງ​ເກຣດຈະ​ປະຊຸມ ​ເພື່ອ​ຮັບຮອງ​ໄຊຊະນະ​ຂອງ​ທ່ານ ​ໄບ​ເດນ ​ເຊິ່ງ​ເປັນ​ພິທີ​ຕາມ​ທຳນຽມ​ປົກກະຕິ, ​ແຕ່​ສຳລັບ​ປີ​ນີ້​ຈະ​ເກີດ​ປາກົດການ​ທີ່​ບໍ່​ເຄີຍ​ເກີດ​ຂຶ້ນມາ​ກ່ອນ ນັ້ນຄື ສສ ​ແລະ ສວ ຫລາຍ​ຄົນ​ໃນ​ສະພາ​ມີ​ແຜນ​ຈະ​ຄັດຄ້ານ​ຜົນ​ການ​ນັບ​ຄະ​ແນນ​ຄະນະ​ຜູ້​​ເລືອກ​ຕັ້ງ ຫລື Electoral Coolege.

- WhatsApp Image 2020 05 27 at 5 - ມີສຽງສົນທະນາ ! ທຣຳ ກົດດັນທາງການລັດຈໍເຈຍ ຫາຄະແນນຊ່ວຍພິກປີ້ນຜົນການເລືອກຕັ້ງ
- WhatsApp Image 2020 05 27 at 5 - ມີສຽງສົນທະນາ ! ທຣຳ ກົດດັນທາງການລັດຈໍເຈຍ ຫາຄະແນນຊ່ວຍພິກປີ້ນຜົນການເລືອກຕັ້ງ
error: Alert: ເນື້ອຫາຂ່າວມີລິຂະສິດ !!