ນະຄອນຫລວງເນັ້ນສົ່ງເສີມເສດຖະກິດຫລາຍພາກສ່ວນ

ແຜນພັດທະນາເສດຖະກິດ-ສັງຄົມໃນ 5 ປີຕໍ່ໜ້າ (2021-2025), ນະຄອນຫຼວງວຽງຈັນ ໄດ້ວາງມາດຕະການເນັ້ນໃສ່ສົ່ງເສີມຄວາມຍືນຍົງ ແລະ ນຳໃຊ້ເສດຖະກິດຫຼາຍພາກສ່ວນ ເພື່ອຮັບປະກັນໃຫ້ຂະຫຍາຍຕົວ ມີຄວາມໝັ້ນທ່ຽງ ແລະ ເຕີບໂຕໃນອັດຕາສະເລ່ຍບໍ່ໃຫ້ຫຼຸດ 7-8% ຕໍ່ປີ, ລວມຍອດຜະລິດຕະພັນພາຍໃນໃຫ້ໄດ້ 356.600 ຕື້ກີບ ແລະ ລາຍຮັບສະເລ່ຍຕໍ່ຫົວຄົນໃຫ້ບັນລຸ 8.750 ໂດລາ.

ແຜນພັດທະນາດັ່ງກ່າວໄດ້ນຳສະເໜີ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາ ປະຊາຊົນນະຄອນຫຼວງ ໂດຍທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ແລະ ທ່ານໄດ້ເນັ້ນວ່າ: ເພື່ອຮັບປະກັນໃຫ້ບັນລຸດຄາດຫມາຍດັ່ງກ່າວ ຕ້ອງໄດ້ເອົາໃຈໃສ່ສົ່ງເສີມສາມ ເສົາຄໍ້າເສດຖະກິດຊຶ່ງປະກອບມີ ຂະແໜງກະສິກໍາ, ອຸດສາຫະກໍາ ແລະ ການບໍລິການ, ໃນນັ້ນຂະແໜງກະສິກຳໃຫ້ຫຍາຍຕົວສະເລ່ຍ 4-4,5% ຕໍ່ປີ, ອຸດສາຫະກຳຂະຫຍາຍຕົວ 11,5-12% ຕໍ່ປີ ແລະ ການບໍລິການໃຫ້ຂະຫຍາຍຕົວສະເລ່ຍ 6,5-7% ຕໍ່ປີ.