ນາຍົກລັດຖະມົນຕີອັງກິດປະກາດລັອກດາວປະເທດ ຮອດກາງເດືອນກຸມພາ ຮັບມືໂຄວິດ-19 ກາຍພັນ

ວັນທີ 4 ມັງກອນ 2021, ທ່ານ ບໍຣິສ ຈອນສັນ ນາຍົກລັດຖະມົນຕີອັງກິດ ປະກາດລັອກດາວອັງກິດຮອດກາງເດືອນກຸມພາ ເພື່ອຮັບມືໂຄວິດ-19 ກາຍພັນທີ່ແຜ່ລະບາດຢ່າງວ່ອງໄວໃນປັດຈຸບັນ, ເຖິງວ່າທາງການອັງກິດຈະເດີນໜ້າຮັບຮອງ ແລະ ເລີ່ມການສັກວັກຊີນຕ້ານໂຄວິດ-19 ຈາກ Pfizer-BioNTech ແລະ AstraZeneca-Oxford ແລ້ວກໍຕາມ ໃນທ້າຍປີ 2020 ຜ່ານມາ.
ທ່ານ ຈອນສັນ ແນະນຳໃຫ້ປະຊາຊົນຢູ່ແຕ່ເຮືອນຄືກັບໄລຍະລັອກດາວໃນການລະບາດຮອບທຳອິດເມື່ອເດືອນມີນາປີຜ່ານມາ ໂດຍໃຫ້ Work from Home ເປັນສ່ວນຫລາຍ ແລະ ອອກຈາກເຮືອນສະເພາະມີເຫດຈຳເປັນເທົ່ານັ້ນ. ສະຖາບັນການສຶກສາທັງໝົດຈະເລີ່ມປິດຊົ່ວຄາວນັບແຕ່ວັນທີ 5 ມັງກອນ, ຮ້ານຕັດຜົມຈະປິດໃຫ້ບໍລິການ. ຂະນະທີ່ຮ້ານອາຫານຈະໃຫ້ບໍລິການສະເພາະຊື້ເມືອເຮືອນເທົ່ານັ້ນ ເພື່ອຫລຸດໂອກາດສ່ຽງໃນການຕິດ ແລະ ແຜ່ກະຈາຍເຊື້ອ.
ອັງກິດມີຜູ້ຕິດເຊື້ອສະສົມແລ້ວຫລາຍກວ່າ 2,72 ລ້ານຄົນ, ເສຍຊີວິດແລ້ວ 7,5 ໝື່ນຄົນ. ເບື້ອງຕົ້ນຈາກຂໍ້ມູນຕິດຕາມສະຖານະການການສັກວັກຊີນຕ້ານໂຄວິດ-19 ຂອງ Our World in Data ພົບວ່າປະຊາກອນອັງກິດ 1,39 ຄົນໄດ້ຮັບການສັກວັກຊີນແລ້ວ ເມື່ອທຽບໃສ່ຈຳນວນປະຊາກອນທັງໝົດ 100 ຄົນ.