6 ຢ່າງທີ່ເປັນໜ້າຢ້ານ ຕ້ອງຜ່ານຜ່າໃຫ້ໄດ້ ເພື່ອຄວາມສຳເລັດໃນປີ 2021
ບັນດານັກຄົ້ນຄວ້າຊີ້ໃຫ້ເຫັນວ່າ: ສິ່ງກີດຂວາງທີ່ໃຫ່ຍທີ່ສຸດຂອງຜົນສຳເລັດບໍ່ແມ່ນເງິນ, ບໍ່ແມ່ນເວລາ ແຕ່ຫາກແມ່ນຄວາມບໍ່ກ້າຫານໃນການປ່ຽນແປງໃໝ່ ແລະ ການບໍ່ຍອມຮັບຄວາມສ່ຽງທີ່ຈະເກີດຂຶ້ນ.
- ຢ້ານການປ່ຽນແປງໃໝ່ ແລະ ຢ້ານຄວາມບໍ່ແນ່ນອນ
ເຖິງແມ່ນວ່າຈະເປັນພາລະກິດ ຫຼື ແມ່ນການພົວພັນໃດໜຶ່ງກໍຕາມ,ທ່ານອາດຈະຖືກປະຖິ້ມໄວ້ເບື້ອງຫຼັງ ຖ້າຫາກຢູ່ຊື່ໆ ບໍ່ພັດທະນາຕົນເອງ. ຢ່າພະຍາຍາມຄາດເດົາອະນາຄົດໄວ້ລ່ວງໜ້າ ແຕ່ຫາກມີການຄົ້ນຄວ້າເຫດການທີ່ເກີດຂຶ້ນ ແລະ ຊອກຫາວິທີທາງປັບຕົວໃຫ້ໄດ້. ຈົ່ງຂຶ້ນແຜນທີ່ສະຫຼາດສາມາດຈັດຕັ້ງປະຕິບັດໄດ້ ດ້ວຍວິທີການປ່ຽນແປງການຕັດສິນໃຈ ແລະ ການກະທຳ ແລະ ໝັ່ນຕີລາຄາສະພາບການ ເມື່ອມີຂໍ້ມູນໃໝ່.
- ຢ້ານການປະຕິເສດ.
ທ່ານເຄີຍຖືກປະຕິເສດການຮ້ອງຂໍເຂົ້າເຮັດວຽກບໍ? ເຄີຍຖືກລູກຄ້າປະຕິເສດບໍ? ຜະລິດຕະພັນ ຫຼື ການບໍລິການຂອງຕົນຖືກປະຕິເສດບໍ? ໃຜກໍຖືກເຊັ່ນກັນຫັ້ນແຫຼະ.
ຈົ່ງມີຄວາມເຊື່ອໝັ້ນ ແລະ ກ້າວໄປຂ້າງໜ້າ. ໃນຊີວິດຈິງ ທ່ານອາດເຄີຍໄດ້ຍິນຄຳວ່າ “ບໍ່” ຫຼາຍກວ່າຄຳວ່າ “ມີ”. ບາງຄັ້ງບາງຄາວ ຄຳວ່າ “ບໍ່” ນັ້ນ ບໍ່ສະເພາະແຕ່ແມ່ນ “ບໍ່ແມ່ນດຽວນີ້”. ດັ່ງນັ້ນຈົ່ງຢ່າໄດ້ທໍ້ຖອຍກຳລັງໃຈ ໃນການເຮັດຄືນໃໝ່ ເພາະສະພາບແວດລ້ອມມີການປ່ຽນແປງ.
- ຢ້ານປະລາໄຊ
ໃນການຈັດຕັ້ງປະຕິບັດຈຸດໝາຍທີ່ວາງໄວ້ ອາດຈະໃຊ້ເວລາ ຫຼື ເສຍເວລາຫຼາຍ ຈຶ່ງຈະສຳເລັດຜົນໄດ້. ໃນຂະນະນັ້ນ ທ່ານອາດຈະຖືກຕີຖອຍກໍເປັນໄດ້. ດັ່ງນັ້ນ ຈົ່ງທົດລອງເຮັດແລ້ວ ເຮັດອີກ, ຖ້າປະລາໄຊກໍຕ້ອງປະລາໄຊແບບມີສັກສີ, ນຳໃຊ້ຄວາມປະລາໄຊນັ້ນ ເພື່ອທົດສອບຍຸດທະສາດ ແລະ ຊອກຫາວິທີທາງອອກ ໃຫ້ໄດ້ ແຕ່ຢ່າລຶ້ມຄືນເຖິງ 2 ຄັ້ງ ໃນຄວາມຜິດດຽວກັນ.
- ຢ້ານຖືກໂດດດ່ຽວ
ບາງຄັ້ງຄາວທ່ານອາດຈະເກີດຄວາມນ້ອຍໃຈ ເມື່ອຖືກປະໃຫ້ກູ້ສະຖານະການໂດຍລຳພັງ ໂດຍບໍ່ມີໃຜໃຫ້ການຮ່ວມມື ແຕ່ບໍ່ຕ້ອງຢ້ານ ມັນມີຫຼາຍວິທີທາງເພື່ອແກ້ໄຂບັນຫາດັ່ງກ່າວ, ນັ້ນກໍຄືການສ້າງຄວາມເຊື່ອໝັ້ນ ແລະ ຄວາມສຳພັນທີ່ແໜ້ນໜຽວ ກັບທິມງານ, ເພື່ອນສະຫາຍ ແລະ ສະມາຊິກໃນຄອບຄົວ.
- ຢ້ານການປະເຊີນໜ້າ
ການທີ່ບໍ່ໂລ່ງລອຍກັບຄົນອື່ນ ອາດຈະສ້າງຄວາມຫຍຸ້ງຍາກຫຼາຍຂຶ້ນ ເຖິງແມ່ນວ່າທ່ານຈະພະຍາຍາມຫຼີກລ່ຽງມັນ ກໍບໍ່ສາມາດຈະແກ້ໄຂມັນໄດ້. ຈົ່ງຕັ້ງບັນຫາໃຫ້ກັບຕົນເອງວ່າ ແມ່ນບັນຫາໃດທີ່ຈະຕ້ອງເສຍສະລະ ແລະ ສິ່ງໃດທີ່ບໍ່ຄວນເສຍສະລະ. ຈົ່ງຖອຍກ້າວໜຶ່ງ ເພື່ອຊອກຫາທິດທາງແກ້ໄຂທີ່ດີທີ່ສຸດ ແລະ ດຳເນີນການແຕ່ລະບາດກ້າວ ແລະ ຍົກລະດັບຍຸດທະສາດຂຶ້ນ ບົນພື້ນຖານຂອງຜົນສຳເລັດ.
- ຢ້ານບໍ່ໄດ້ຮັບການຄວບຄຸມ
ການຄົ້າຄວ້າຊີ້ໃຫ້ເຫັນວ່າ ຄົນເຮົາມີຄວາມຕ້ອງການຄວບຄຸມທຸກສິ່ງຢ່າງ ແລະ ຄົນອ້ອມຂ້າງ ພວກເຮົາ ມັກຈະຢ້ານບໍ່ໄດ້ຮັບການຄວບຄຸມ. ເພື່ອຫາຍຄວາມສົງໄສໃນຄວາມສາມາດຄວບຄຸມ ແລະ ການປັບຕົວຂອງຕົນເອງນັ້ນ ຈົ່ງຍອມຮັບເອົາການປ່ຽນແປງນອກເໜືອການຄວບຄຸມຂອງຕົນ, ຈົ່ງສຸມໃສ່ສິ່ງທີ່ທ່ານມີຄວາມສາມາດຢູ່ໃນກຳມືຂອງຕົນ.
