ສະພາຄອງເກຣດຮັບຮອງຜົນໄຊຊະນະ ຂອງທ່ານ ໂຈ ໄບເດນ ເປັນທາງການ ຫລັງເຫດວຸ້ນວາຍຢຸດລົງ
January 7, 2021 - 4:37 PM
ກອງປະຊຸມຮ່ວມວຸດທິສະພາ ແລະ ສະພາຜູ້ແທນລາຊະດອນອາເມລິກາ ລົງມະຕິຮັບຮອງຜົນໄຊຊະນະຂອງທ່ານ ໂຈ ໄບເດນ ຢ່າງເປັນທາງການແລ້ວ ດ້ວຍຄະແນນຄະນະຜູ້ເລືອກຕັ້ງ 306 ຕໍ່ 232.
ສະພາຄອງເກຣດກັບມາປະຊຸມເພື່ອຮັບຮອງຜົນເລືອກຕັ້ງອີກໃນເວລາ 20:00 ໂມງ ຕາມເວລາທ້ອງຖິ່ນ ຫລັງເຫດວຸ້ນວາຍຈາກກຸ່ມຜູ້ສະໜັບສະໜູນປະທານາທິບໍດີ ທຣຳ ບຸກເຂົ້າສ້າງຄວາມວຸ້ນວາຍໃນອາຄານລັດຖະສະພາຢຸດຕິລົງ.
ທັງນີ້, ຈາກເຫດວຸ້ນວາຍດັ່ງກ່າວມີລາຍງານຜູ້ເສຍຊີວິດ 4 ຄົນ, ຜູ້ຊຸມນຸມຖືກຈັບກຸມບໍ່ຕໍ່າກວ່າ 50 ຄົນ ໂດຍນະຄອນຫລວງວໍຊິງຕັນ ດີຊີ ປະກາດຂະຫຍາຍພາວະສຸກເສີນອອກໄປອີກ 15 ວັນ ຈົນກວ່າພິທີສາບານເຂົ້າຮັບຕຳແໜ່ງປະທານາທິບໍດີຂອງທ່ານ ໂຈ ໄບເດນ ທີ່ມີກຳນົດວັນທີ 20 ມັງກອນນີ້ ຈະສຳເລັດ.
