ນຳໃຊ້ທາງດ່ວນຕ້ອງມີສະຕິ

ນຳໃຊ້ທາງດ່ວນຕ້ອງມີສະຕິ - Screenshot 20210105 175142 1024x572 1 - ນຳໃຊ້ທາງດ່ວນຕ້ອງມີສະຕິ
ນຳໃຊ້ທາງດ່ວນຕ້ອງມີສະຕິ - Untitled design - ນຳໃຊ້ທາງດ່ວນຕ້ອງມີສະຕິ

ໂດຍ: ທິດ​ກໍ່າ

ກ່ອນ​ເປີດ​ສາຍ​ທາງ​ດ່ວນ​ວຽງ​ຈັນ-ວັງ​ວຽງ​ບໍ່ພໍ​ເທົ່າ​ໃດ​ວັນ, ທິດ​ກໍ່າ​ໄດ້​ຂຽນ​ບົດ​ຄວາມ​ບົດ​ໜຶ່ງ​ທີ່​ມີ​ຫົວ​ຂໍ້​ວ່າ: ​ເປີດ​ສາຍ​ທາງ​ດ່ວນ​ໄປ​ແລ້ວ ຂໍ​ຢ່າ​ໃຫ້​ສາຍ​ທາງ​ມໍລະ​ນະ, ​ແຕ່​ເມື່ອ​ມີ​ສ້າງທາງດ່ວນ ເຊິ່ງລວມທັງບຊ່ທັນເປີດ ແລະ​ ມື້ໃຊ້ມາບໍ່ຮອດເດືອນ​ກໍ​ມີ​ອຸປະຕິ​ເຫດ​ເຖິງ 30 ຄັ້ງ, ສັງຫານ​ຄົນ​ຕາຍ​ໄປ​ແລ້ວ 16 ຄົນ. ຫລ້າ​ສຸດ​ເມື່ອ​ອາທິດ​ຜ່ານ​ມາ​ສົດ​ຮ້ອນໆ ​ໄດ້​ມີ​ລົດ​ວີ​ໂກ້​ສີ​ປອນ​ແລ່ນ​ຖະ​ໄຫລ​ຕຳ​ຮົ້ວ​ເຈີດ​ຖະ​ແຫລ​ລົງ​ຄອງ​ປີ້ນ​ຫລາຍ​ພິກ​ຈົນ​ຫຍໍ້​ເປັນ​ເປົາ​ໝາກ​ແປດ ​ເບິ່ງ​ສິ່ງ​ກີດຂວາງ​ມຸ່ນ​ປານ​ເຕະ​ເຫັດ. ການ​ເກີດ​ອຸປະຕິ​ເຫດ​ແຕ່ລະຄັ້ງນັ້ນ ມັນ​ກໍ​ມີ​ຫລາຍ​ກໍລະນີ ​ເປັນຕົ້ນລົດ​ໃຫຍ່​ຕຳ​ເດັກນ້ອຍ, ລົດ​ໃຫຍ່​ຕຳ​ຮາວ​ປີ້ນ, ລົດ​ໃຫຍ່​ຕຳ​ລົດຈັກ, ລົດ​ໃຫຍ່​ຕຳ​ງົວ, ລົດ​ໃຫຍ່​ຕຳ​ໝາ ​ແລະ ກໍລະນີ​ອື່ນໆ​ສັບ​ມະ​ປິ. ອັນ​ທີ່​ພິ​ເສດ​ອີກ​ຢ່າງ​ໜຶ່ງ​ທີ່​ແຕກ​ຕ່າງ​ໝູ່​ສຳລັບ​ປະ​ເທດ​ລາວ​ພວກ​ເຮົາ​ກໍ​ແມ່ນ​ມີ​ຝູງ​ງົວ, ຝູງ​ຄວາຍ​ຍ່າງ​ຕາມ​ສາຍ​ທາງ​ດ່ວນ​ແບບ​ເປັນ​ຝູງ​ໂກ້ໆ​ຕາມ​ຄວາມ​ໄຮ້​ດຽງສາ​ຂອງ​ພວກ​ມັນ ​ເຊິ່ງມັນ​ແຕກ​ຕ່າງ​ຈາກ​ສາຍ​ທາງ​ດ່ວນ​ຢູ່​ປະ​ເທດ​ທີ່​ເຂົາ​ຈະ​ເລີ​ນ​ ​ແລ່ນ​ໄປ​ສອງ​ສາມ​ຮ້ອຍ​ຫລັກ​ບາງ​ຄັ້ງຈຶ່ງ​ເຫັນ​ສັດປ່າ​ແລ່ນ​ຂ້າມ​ທາງ.

ຈາກ​ກໍລະນີ​ຕ່າງໆ​ທີ່​ກ່າວ​ມາ​ນີ້ ຈຶ່ງ​ເປັນ​ເຫດ​ໃຫ້​ສາຍ​ທາງ​ດ່ວນ​ຢູ່​ບ້ານ​ເຮົາ​ມັກ​ເກີດ​ອຸປະຕິ​ເຫດ​ຂຶ້ນ​ເລື້ອຍໆ. ປັດ​ໄຈ ​ແລະ ສາ​ເຫດ​ທີ່​ເຮັດ​ໃຫ້​ເກີດ​ອຸປະຕິ​ເຫດ​ອີກ​ຢ່າງ​ໜຶ່ງ​ກໍ​ແມ່ນ​ລົດ​ແລ່ນ​ໄວ​ໃຫ້​ໄດ້​ຕາມ​ມາດຕະຖານ​ທີ່​ກຳນົດ, ຖ້າ​ແລ່ນ​ຊ້າ​ຕາມ​ຂະ​ເຍີ​ມ​ເຈົ້າໜ້າ​ທີ່​ກ່ຽວຂ້ອງ​ຕ້ອງ​ປັບ​ໄໝ​ໃນ​ສະຖານ​ຜິດ​ກົດ​ຈະລາຈອນ ​ເພາະ​ທາງ​ດ່ວນ​ກໍ​ຄື​ທາງ​ດ່ວນ.

ນອກຈາກ​ມັກ​ເກີດ​ອຸປະຕິ​ເຫດ​ຂຶ້ນ​ເລື້ອຍໆ​ແລ້ວ ຍັງ​ມີ​ຫາງ​ສຽງ​ວິພາກ​ວິຈານ​ຕ່າງໆ​ນາໆ​ກ່ຽວ​ກັບ​ບັນຫາ​ຄ່າ​ທາງ​ຂາ​ໄປ ​ແລະ ຂາ​ກັບ​ມັນ​ບໍ່​ເອກະ​ພາບ​ກັນ​ເຊັ່ນ: ຂາ​ໄປ​ລາຄາ​ຢ່າງ​ໜຶ່ງ, ຂາ​ກັບ​ລາຄາ​ຢ່າງ​ໜຶ່ງ ທັງໆ​ທີ່​ແມ່ນ​ລົດ​ຄັນ​ເກົ່າ, ລົດ​ກໍ​ຜູ້​ເກົ່າຂັບ​ ເບິ່ງຢ່າງ​ໜຶ່ງມັນ​ຄ້າຍຄື​ຊື້ຖືກ​ຂາຍ​ແພງ, ຊື້ຫ້າ​ຂາຍ​ສິບ. ບັນຫາ​ການ​ປັບ​ໄໝ​ກໍລະນີ​ຄວາມ​ຜິດ​ຕ່າງໆ​ມັນ​ກໍ​ເກີນ​ເຫດ​ທີ່​ຈະ​ຮັບ​ໄດ້​ເຊັ່ນ: ກໍລະນີ​ມີ​ລົດ​ໄປ​ດາດ​ເສົາ​ຮ່ອມ​ຈະລາຈອນ​ພຽງ​ສີ​ມັນ​ໂປກ ຫລື ຂູດ​ເລັກ​ໜ້ອຍ ກໍ​ປັບ​ໄໝ​ກັນ​ເປັນ​ສີ່​ຫ້າ​ລ້ານ ​ແລະ ກໍລະນີ​ອື່ນໆ​ກໍ​ເໝືອນ​ກັນ ​ເຫັນ​ວ່າ​ມັນ​ເກີນ​ກວ່າ​ຄວາມ​ເປັນ​ຈິງ ​ແລະ ລະບຽບ​ກົດໝາຍ​ຂອງ​ບ້ານ​ເມືອງ.

ນຳໃຊ້ທາງດ່ວນຕ້ອງມີສະຕິ - Wave100S AD to Website 2020 0 - ນຳໃຊ້ທາງດ່ວນຕ້ອງມີສະຕິ

​ເມື່ອ​ຕັ້ງ​ໂຈດ​ກັນ​ວ່າ: ​ເພື່ອ​ແກ້​ໄຂ​ບັນຫາ​ຕ່າງໆ​ທີ່​ເກີດ​ຂຶ້ນນີ້ ພວກ​ເຮົາ​ຈະ​ເຮັດ​ແນວ​ໃດ ? ກ່ອນ​ອື່ນ​ໝົດ ຕາມ​ທິດ​ກໍ່າ​ວ່າ ພາກ​ລັດ​ຕ້ອງ​ມີ​ການ​ປະສານ​ສົມທົບ​ກັບ​ຜູ້​ລົງທຶນ​ໃຫ້​ສອດຄ່ອງ​ກັບ​ກົດໝາຍ ​ແລະ ສະພາບ​ຄວາມ​ເປັນ​ຈິງ​ຂອງ​ເຫດການ​ທີ່​ເກີດ​ຂຶ້ນ​ແຕ່ລະ​ຢ່າງ​ໃຫ້​ມີ​ການ​ລົງ​ຕົວ ບໍ່​ປະປ່ອຍ​ໃຫ້​ຜູ້​ລົງທຶນ​ເຮັດ​ຕາມ​ໃຈ. ນອກຈາກ​ນັ້ນ ການ​ສະໜອງ​ຂໍ້​ມູນ​ຂ່າວສານ​ທາງ​ດ້ານ​ບໍລິການ​ກໍ​ໃຫ້​ລະອຽດ​ຊັ​ດ​ເຈນ ​ເພື່ອ​ໃຫ້​ຜູ້​ໃຊ້​ບໍລິການ​ເດີນທາງ​ໄປມາ​ເຂົ້າ​ໃຈ​ຢ່າງ​ເລິກ​ເຊິ່ງ​ຖີ່​ຖ້ວນ. ຕາມ​ທີ່​ຮູ້​ມາ ຂໍ້​ມູນ​ລະອຽດ​ທີ່​ເປັນ​ພາສາ​ລາວ​ບາງ​ຢ່າງ​ແມ່ນ​ບໍ່​ທັນ​ມີ ຫລື​ ມີ​ກໍ​ມີ​ແຕ່​ພາສາ​ຈີນ​ອ່ອຍຕ້ອຍ. ພະນັກງານ​ທີ່​ເປັນ​ຄົນ​ລາວ ​ເຊິ່ງມີໜ້າ​ທີ່​ເກັບ​ເງິນ ຫລື ໜ້າ​ວຽກ​ອື່ນໆ ​ເຂົາ​ກໍ​ວ່າ​ຂຶ້ນກັບ​ຈີນ​ທັງ​ໝົດ, ຄົນ​ຈີນ​ທີ່​ບໍ່​ຮູ້​ພາສາ​ລາວ​ມັນ​ກໍ​ປຸກ​ປານ​ຢາ​ບ້ານ​ຫ້ອມ ​ເບິ່ງ​ຢ່າງ​ໜຶ່ງ​ມັນ​ກໍ​ເອົາ​ແຕ່​ໄດ້​ກັບ​ໄດ້ ​ເພາະ​ກູ​ເປັນ​ຜູ້​ລົງທຶນ. ນີ້​ຄື​ປະ​ເດັນ​ຂອງ​ບັນຫາ​ທາງ​ດ່ວນ​ຢູ່​ບ້ານ​ເຮົາ​ທີ່​ຫາ​ກໍ​ເລີ່​ມ​ແລກ​ແຮກ​ໝານ​ຍ່ານ​ທຳ​ອິດ​ຂອງ​ປະ​ເທດ.

​ເຖິງ​ຢ່າງ​ໃດ​ກໍ​ດີ, ​ໃນ​ອະນາຄົດ ຫລື ຍາວ​ນານ​ຈະ​ຖືກ​ແກ້​ໄຂ​ໄປ​ໂດຍ​ດີ ທັງ​ສອດຄ່ອງ​ກັບ​ລະບຽບ​ກົດໝາຍ ​ແລະ ຄວາມ​ຈະ​ເລີ​ນຂອງ​ປະ​ເທດ​ຊາດ. ທັງ​ນີ້​ກໍ​ເພື່ອ​ຫລີກ​ລ່ຽງຫາງ​ສຽງ​ວິພາກ​ວິຈານ​ຈົນ​ໜາ​ຫູ​ກາຍ​​ເປັນ​ບັນຫາ​ປາກົດການ​ຫຍໍ້​ທໍ້​ແບບ​ອາຖັນ ​ແລະ ຊຳ​ເຮື້ອຢູ່​ໃນ​ສັງຄົມ​ບ້ານ​ເມືອງ​ຢ່າງ​ບໍ່​ມີຄວາມ​ສະຫງົບ, ສ່ວນວ່າ​ບັນຫາ​ການ​ເກີດ​ອຸປະຕິ​ເຫດ​ເປັນ​ປະຈຳ​ລຽນຕິດ​ນັ້ນ ກໍ​ຂໍ​ໃຫ້​ມີ​ວິທີ​ແກ້ ​ໂດຍ​ບໍ່​ໃຫ້​ມີ​ສັດສາ​ວາ​ສິ່ງ​ເຂົ້າ​ມາ​ໃນ​ບໍລິ​ເວນ​ທາງ​ດ່ວນ​ຢ່າງ​ເດັດຂາດ, ຖ້າ​ເຈົ້າຂອງ​ສັດຜູ້​ໃດ​ຮັກສາ​ບໍ່​ກຸ້ມ​ກໍ​ໃຫ້​ມີ​ມາດ​ຕະການ​ທີ່​ເໝາະ​ສົມ ​ເພື່ອ​ໃຫ້​ເຂົາ​ມີ​ສະຕິ ​ແລະ ​ເປັນ​ເຈົ້າການ​ຮ່ວມ​ມື​ນຳ​ຢ່າງ​ຈິງ​ຈັງ ​ເພາະ​ສັງຄົມ​ລາວ​ເຮົາ​ຢູ່​ຕາມ​ແຖວ​ຊົນນະບົດ​ແຕ່​ດຶກ​ດຳ​ບັນ​ມາ ​ເຄີຍ​ຊິນ​ກັບ​ການ​ລ້ຽງສັດ​ປະປ່ອຍ​ໄປ​ກິນ​ຕາມ​ຂະ​ເຍີ​ມ ຫລື ທົ່ງ​ນາ​ປ່າ​ເລົ່າ ​ເຊິ່ງ​ແຕກ​ຕ່າງ​ຢູ່​ບ້ານ​ເຂົາ​ລ້ຽງສັດ​ຕ້ອງ​ມີ​ຟາ​ມ ຫລື ມີ​ສະຖານ​ທີ່​ກັກ​ກັນ​ຄັກ​ແນ່ຈຶ່ງ​ຮັບປະກັນ. ນີ້​ລະ​ເຂົາ​ວ່າ​ທາງ​ດ່ວນ​ຊວນ​ໂລ​ເລ.

ນຳໃຊ້ທາງດ່ວນຕ້ອງມີສະຕິ - WhatsApp Image 2020 05 27 at 5 - ນຳໃຊ້ທາງດ່ວນຕ້ອງມີສະຕິ
ນຳໃຊ້ທາງດ່ວນຕ້ອງມີສະຕິ - WhatsApp Image 2020 05 27 at 5 - ນຳໃຊ້ທາງດ່ວນຕ້ອງມີສະຕິ

Comment

    Bounchanh Wanthammasyda
    10/01/2021 - 8:36 am

    ມັນເປັນຕາຢາກຫົວແທ້ໆ, ນີ້ແຫລະຄືຄົນລາວ ແລະ ວັດທະນະທຳລາວເຮົາ, ບໍ່ຮູ້ວ່າຊິຮັກສາໄວ້ ຫລື ວ່າຊິຟ້າວປັບໄປຕາມການປ່ຽນແປງຂອງການພັດທະນາຂອງໂລກເຂົາໄດ້ແລ້ວຫລືຍັງ?

    ມັນເປັນຍ້ອນວ່າລາວເຮົາຫາກໍ່ໄດ້ທາງດ່ວນຄັ້ງທຳອິດບໍ ຫລື ວ່າຄົນສ່ວນຫລາຍຍັງຂາດຄວາມເຂົ້າໃຈໃນລະບຽບ ຫລື ເຂົ້າໃຈແຕ່ບໍ່ສົນໃຈທີ່ຈະປະຕິບັດຕາມມັນ?.

    ຖ້າເປັນແບບນັ້ນ, ບໍ່ຄວນຈະໄປໃສ່ຮ້າຍທາງທີ່ຕົນເອງໃຊ້ເລີຍ ນ່າຈະໂທດໂຕຜູ້ຂັບຂີ່ເອງຈະດີກວ່າ. ຍົກເວັ້ນ, ອຸປະຕິເຫດທີ່ເກີດຂຶ້ນຈາກສັດແລ່ນຕັດຫນ້າເວລາຂັບເທົ່ານັ້ນ.

    ການພັດທະນາ ແລະ ເທັກໂນໂລຈີໃນໂລກປ່ຽນໄປທຸກວັນ ຖ້າປະຊາຊົນລາວເຮົາ 5 ປີ ຫລື 10 ປີ ກໍ່ຍັງເຂົ້າໃຈເຫມືອນເກົ່າ ແລະ ທຳເຫມືອນແບບເກົ່າຢຸ່ ຫລື ປ່ຽນໂຕເອງໄປແບບຊ້າໆແລ້ວກໍ່ ຈະຖືກໂລກຂ້າງນອກເຂົາມາຄອບງຳ ແລະ ກືນກີນວິທີຄິດຂອງຄົນລາວເຮົາໄປຫມົດ.

    ຈັກຫນ້ອຍກໍ່ໄດ້ແຕ່ພາກັນຈົ່ມວ່າ ພວກຫວຽດ ພວກຈີນ ເຂົ້າມາຍາດວຽກງານໄປຫມົດແລ້ວ. ເຂົາບໍ່ຍາດເອົາໄປກໍ່ໃຫ້ມັນຮູ້ກັນ ຖ້າຄົນລາວເຮົາບໍ່ຮຸູ້ຈັກປ່ຽນໂຕເອງໃຫ້ໄວ ຖ້າເຮັດຫຍັງກໍ່ເຮັດຢູ່ຢ່າງນັ້ນ ຄິດຫຍັງກໍ່ຄິດແບບເດີມໆນັ້ນ 20 ປີ ກໍ່ບໍ່ປ່ຽນ ຫລື ວ່າປ່ຽນກໍ່ປ່ຽນຊ້າ ຢ່າຄິດເລີຍວ່າຊິທັນເຂົາ.

    ຍົກຕົວຢ່າງ: ຢ່າເວົ້າໄກ ມາພິສູດງ່າຍໆ ວີທີຂ່າວໄທ, ໂທລະທັດໄທ, ລະຄອນໄທ,ເພງໄທ, ພາສາໄທໃນລະບົບໂທລະສັບ, ພາສາໄທໃນລະບົບຄອມພີວເຕີ້, ມັນກໍ່ກືນກິນຈິດວິນຍານຂອງໄວລຸ້ນໄປເກືອບຫມົດປະເທດແລ້ວ. ມາເບີ່ງໄວລຸ້ນສູ່ມື້ນີ້ ແທັກເມັດແຊັດ ພວກເຂົາກໍ່ແທັກ “ຈະ ຈະ”. ພວກເຂົາບໍ່ເຫັນຊິແທັກວ່າ “ໂດຍ” ເລີຍ.

    ຖ້າພັກ ແລະ ລັດ ຮຸ້ຈັກແຕ່ສ້າງລະບົບ, ສ້າງໂອກາດ ແລະ ສະຫນັບສະຫນູນໃຫ້ແກ່ແຕ່ພັກພວກ ແລະ ລູກຫລານໂຕເອງແລ້ວກໍ່, ໄວລຸ້ນໃນປະເທດເຮົາສ່ວນຫລາຍຈະຖືກການພັດທາ ແລະ ເທັກໂນໂລຈີທີ່ກ້າວຫນ້າຂອງປະເທດອື່ນຄວບຄຸມ ແລະ ກືນກິນວິທີຄິດໄປຫມົດ.

    ຫລືວ່າພັກ ແລະ ລັດບໍ່ສົນໃຈຊິຈະເອົາໄວລູ້ນຄົນລາວທົ່ວໄປມາພັດທະນາປະເທດບໍ? ຊິສ້າງແຕ່ລະບົບ, ສ້າງໂອກາດ ແລະ ສະຫນັບສະຫນູນແຕ່ພັກພວກໂຕເອງ ແລະ ລູກຫລານໂຕເອງຢ່າງດຽວບໍ? ລູກຫລານຄົນອື່ນປະປ່ອຍໃຫ້ພວກເຂົາດ້ອຍໂອກາດ, ດ້ອຍການສຶກສາ, ກີນຢາບ້າ ແລະ ໄປທຳງານໄທຊັ້ນບໍ?

    ຢາກປ່ຽນຄອບຄົວຕ້ອງປ່ຽນຄົນໃນຄອບຄົວ. ຢາກປ່ຽນຄົນໃນຄອບຄົວຕ້ອງປ່ຽນຄວາມຄິດຂອງຄົນໃນຄອບຄົວ, ຢາກປ່ຽນຄວາມຄິດຂອງຄົນໃນຄອບຄົວຕ້ອງໃຫ້ຄົນໃນຄອບຄົວມີການສຶກສາ. ຢາກໃຫ້ຄົນມີການສຶກສາຕ້ອງໃຫ້ໂອກາດ ແລະ ສະຫນັບສະຫນູນພວກເຂົາ.

    ປະເທດຊາດກໍ່ເຊັ່ນດຽວກັນນັ້ນແຫລະ, ຢາກປ່ຽນປະເທດຊາດກໍ່ຕ້ອງປ່ຽນຄົນໃນຊາດສາກ່ອນ. ຢາກປ່ຽນຄົນໃນຊາດກໍ່ຕ້ອງປ່ຽນວິທີຄິດ ແລະ ຄວາມຄິດຂອງຄົນໃນຊາດ. ຢາກປ່ຽນວິທີຄິດ ແລະ ຄວາມຄິດຂອງຄົນໃນຊາດກໍ່ຕ້ອງສ້າງລະບົບການສຶກສາທີ່ດີໃຫ້ພວກເຂົາໄດ້ສຶກສາ, ຢາກໃຫ້ພວກເຂົາໄດ້ຮັບການສຶກສາທີ່ດີກໍ່ຕ້ອງສ້າງ ແລະ ເປີດໂອກາດ ແລະ ສະຫນັບສະຫນູນພວກເຂົາ.

    ພວກເຮົາມາພິສູດນຳກັນໄດ້ງ່າຍໆວ່າ: ທຸກໆຄອບຄົວທ່ານຜູ້ນຳ ແລະ ຂ້າລັດຖະການລະດັບສູງຂອງລາວ, ກ່ອນປົດປ່ອຍບາງທ່ານກໍ່ເປັນຊາວນາ, ເປັນພໍ່ຄ້າມີຫນ້ອຍ, ເປັນຂ້າລາຊະການກໍ່ມີຫນ້ອຍເຫມືອນກັນ, ໂອກາດການສຶກສາກໍ່ມີຫນ້ອຍ ແລະ ລະດັບການສຶກສາບາງທ່ານກໍ່ຕ່ຳ.

    ແຕ່ເວລາມາເປັນທ່ານຜູ້ນຳ ແລະ ຂ້າລັດຖະການລະດັບສຸງແລ້ວ, ຄອບຄົວ ແລະ ລູກຫລານຂອງເພື່ນຊ້ຳພັດກີນດີ, ຢູ່ດີ, ມີການສຶກສາສູງ ແລະ ລູກຫລານຂອງບາງທ່ານເຫລົ່ານັ້ນມີຮອດບໍລິສັດ. ຖ້າມາຕັ້ງຄຳຖາມວ່າ ຍ້ອນຫຍັງ? ກໍ່ຍ້ອນວ່າເພີ່ນມີໂອກາດ ແລະ ມີຄວາມພ້ອມໃນການສະຫນັບສະຫນູນລຸູກຫລານຂອງເພີ່ນ.

    ແຕ່ຖ້າພວກເພີ່ນສ້າງລະບົບ, ສ້າງໂອກາດ ແລະ ເປີດໂອກາດ ແລະ ສະຫນັບສະຫນູນຄົນລາວທຸກຄົນເຫມືອນພວກເພີ່ນທຳກັບຄົນໃນຄອບຄົວຂອງພວກເພີ່ນ, ຄົນລາວທຸກຄົນຄົງຈະໄດ້ມີໂອກາດ, ມີການສະຫນັບສະຫນູນ, ມີການສຶກສາເຫມືອນກັບຄອບຄົວ ແລະ ລູກຫລານຂອງພວກເພີ່ນນັ້ນແຫລະ.

Comments are closed.

error: Alert: ເນື້ອຫາຂ່າວມີລິຂະສິດ !!