ຊົມເຊີຍກອງປະຊຸມໃຫຍ່ ຄັ້ງທີ XI ຂອງພັກຢ່າງສຸດໃຈ
ໂດຍ: ທິດກໍ່າ
ເນື່ອງໃນໂອກາດໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າຮູ້ສຶກປິຕິຊົມຊື່ນ ແລະ ຊົມເຊີຍເປັນຢ່າງຍິ່ງທີ່ເຫັນວ່າພັກເຮົາໄດ້ກຳເນີດ ແລະ ເຕີບໃຫຍ່ຂະຫຍາຍຕົວບົນເສັ້ນທາງແຫ່ງການຕໍ່ສູ້ປະຕິວັດ ແລະ ປົກປັກຮັກສາພັດທະນາປະເທດຊາດ ບໍ່ວ່າໃນໄລຍະສົງຄາມ ກໍຄືໄລຍະສັນຕິພາບ. ນັບແຕ່ກອງປະຊຸມໃຫຍ່ ຄັ້ງທີ I ຂອງພັກທີ່ໄດ້ໄຂຂຶ້ນໃນວັນທີ 22 ມີນາ ຫາວັນທີ 6 ເມສາ 1955 ເປັນຕົ້ນມາຮອດປັດຈຸບັນ ໄດ້ຊີ້ໃຫ້ເຫັນວ່າ ຜົນສຳເລັດຢ່າງຍິ່ງໃຫຍ່ໃນພາລະກິດການຊີ້ນຳ-ນຳພາຂອງພັກນັ້ນຄືໄຊຊະນະອັນໃຫຍ່ຫລວງຂອງການປະຕິວັດລາວ. ໄຊຊະນະທີ່ວ່ານີ້ໄດ້ສະແດງອອກສອງໄລຍະຢ່າງຈະແຈ້ງຄື: ຜົນສຳເລັດການປະຕິວັດຊາດປະຊາທິປະໄຕ ແມ່ນນັບແຕ່ມື້ທີ່ພັກໄດ້ກຳເນີດເກີດຂຶ້ນ ໄດ້ນຳພາຕໍ່ສູ້ປະຕິວັດຈົນສຳເລັດການປະຕິວັດຊາດປະຊາທິປະໄຕໃນປີ 1975. ໃນໄລຍະນີ້ເອງ ພັກໄດ້ຜະເຊີນຕໍ່ສິ່ງທ້າທາຍຫລາຍຢ່າງ ບໍ່ວ່າໃນດ້ານການຕໍ່ສູ້ທາງການເມືອງ, ການທະຫານ, ຍຸດທະວິທີ, ສິລະປະຍຸດ, ກ້າເສຍສະຫລະ, ກ້າເຮັດກ້ານຳພາຢ່າງມີເປົ້າໝາຍ ແລະ ມີອຸດົມການທີ່ແນ່ວແນ່ ຈຶ່ງສາມາດນຳພາການປະຕິວັດປົດປ່ອຍຊາດໄດ້ຢ່າງສົມບູນແບບ. ສ່ວນໄລຍະທີສອງນັ້ນ ເລີ່ມແຕ່ປີ 1975 ມາເຖິງປັດຈຸບັນ. ຖ້າຈະຄິດໄລ່ອາຍຸສັງຂານຂອງພັກເຮົາມາຮອດປີ 2021 ກໍມີອາຍຸ 66 ປີພໍດີ.
ໃນຊ່ວງການຊີ້ນຳ-ນຳພາປົກປັກຮັກສາ, ສ້າງສາ ແລະ ພັດທະນາປະເທດຊາດ ຍາມໃດພັກເຮົາກໍເປັນເສົາຄ້ຳອັນແໜ້ນແກ່ນໃນການນຳພາປະເທດຊາດກ້າວໄປສູ່ໄລຍະໃໝ່ຂອງການປະຕິວັດ. ໃນເງື່ອນໄຂທີ່ປະເທດຊາດຕົກຢູ່ໃນຄວາມທຸກຍາກ ແລະ ດ້ອຍພັດທະນາ ພັກເຮົາຍິ່ງໄດ້ຜະເຊີນກັບສິ່ງທ້າທາຍຫລາຍຢ່າງ ບໍ່ວ່າໃນດ້ານການເມືອງ, ເສດຖະກິດ ແລະ ສັງຄົມ-ວັດທະນະທຳ. ແຕ່ດ້ວຍຄວາມສະຫລາດສ່ອງໃສ, ມີໄຫວພິບໃນການນຳພາ ພັກໄດ້ວາງຍຸດທະສາດໃນການພັດທະນາປະເທດຊາດທີ່ສອດຄ່ອງກັບສະຖານະການໃໝ່ຢ່າງຮອບດ້ານແຕ່ລະໄລຍະ. ອັນທີ່ໂດດເດັ່ນທີ່ສຸດກໍຄືການກຳນົດແນວທາງການປະຕິວັດສາມປະການ ເພື່ອຮຳບາດແຜສົງຄາມ ແລະ ຟື້ນຟູເສດຖະກິດ. ຈາກນັ້ນໃນປີ 1986 ພັກໄດ້ວາງແນວທາງປ່ຽນແປງໃໝ່ຢ່າງຮອບດ້ານໃນການພັດທະນາເສດຖະກິດ-ສັງຄົມຂອງປະເທດ.
ເພາະສະນັ້ນ, ພາລະກຳປະຫວັດສາດທີ່ກ່າວມາຂ້າງເທິງນີ້ ແມ່ນລ້ວນແລ້ວໝາກຜົນແຫ່ງໄຊຊະນະຈາກການນຳພາຂອງພັກນັບແຕ່ມື້ເລີ່ມຕົ້ນຈົນມາຮອດປັດຈຸບັນ. ສ່ວນວ່າກອງປະຊຸມໃຫຍ່ຂອງພັກເຮົານັບແຕ່ຄັ້ງທີ I ໃນການວາງຍຸດທະສາດການຕໍ່ສູ້ປະຕິວັດແຕ່ລະໄລຍະນັ້ນ ຈົນມາຮອດປັດຈຸບັນກໍຖືວ່າກອງປະຊຸມຄັ້ງນີ້ເປັນຄັ້ງທີ XI ແລ້ວ ອັນເປັນໄລຍະທີ່ປະເທດຊາດບ້ານເມືອງຂອງພວກເຮົາພວມກ້າວສູ່ການສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ. ສຳລັບບັນຍາກາດກ່ອນຮອດກອງປະຊຸມໃຫຍ່ຂອງພັກໃນຄັ້ງນີ້ບໍ່ພໍເທົ່າໃດວັນຢູ່ຕາມຄຸ້ມບ້ານ, ສຳນັກງານອົງການ, ຖະໜົນຫົນທາງຕ່າງກໍມີຄວາມສວຍງາມ ດ້ວຍການປະດັບປະດາອາຄານສະຖານທີ່ໃຫ້ຈົບງາມ ປະດັບປະດາໄປດ້ວຍທຸງຊາດ, ທຸງພັກ, ທຸງທິວ, ດອກໄຟທີ່ຫລາກສີ ເຮັດໃຫ້ສີສັນບັນຍາກາດຂອງຕົວເມືອງ ກໍຄືທຸກທ້ອງຖິ່ນຊົນນະບົດເຕັມໄປດ້ວຍຄວາມໝາຍໃນປະຫວັດສາດຂອງຊາດ. ປະຊາຊົນລາວບັນດາເຜົ່າໃນທົ່ວປະເທດຮູ້ສຶກພູມໃຈ ແລະ ປິຕິຊົມຊື່ນຕໍ່ໝາກຜົນແຫ່ງໄຊຊະນະອັນໃຫຍ່ຫລວງຂອງພັກ, ເຫັນປະເທດຊາດບ້ານເມືອງພວມມີການສ້າງສາພັດທະນາໃຕ້ການນຳພາຂອງພັກປະຊາຊົນປະຕິວັດລາວອັນມີທຸງກາວົງເດືອນເປັນສັນຍາລັກປິວສະບັດຢູ່ເທິງຍອດເສົາທ່າມກາງທ້ອງຟ້າສີຄາມ, ປະເທດຊາດມີຄວາມສະຫງົບໝັ້ນຄົງ ແລະ ໜັກແໜ້ນນັ້ນ ຄືຍອດປາດຖະໜາຂອງຊາດ ແລະ ຂອງພັກ.
ຂໍຊົມເຊີຍ ແລະ ອວຍໄຊໃຫ້ພອນແກ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວຈົ່ງປະສົບຜົນສຳເລັດທຸກປະການ ໃຫ້ສົມກັບວ່າພັກເຮົາເປັນພັກທີ່ມີກຽດສະຫງ່ານຳພາຊາດລາວຈະເລີນຮຸ່ງເຮືອງກ້າວສູ່ຍຸກໃໝ່ໄຟແຮງຢ່າງແທ້ຈິງ.
