ຍີ່ປຸ່ນ ພົບເຫັນ ໂຄວິດ-19 ກາຍພັນແຕກຕ່າງກັບຢູ່ ອັງກິດ ແລະ ແອຟຣິກກາໃຕ້
January 13, 2021 - 2:12 PM
ວັນທີ 10 ມັງກອນນີ້, ກະຊວງສາທາລະນະສຸກ ແລະ ກະຊວງແຮງງານ ແລະ ສະຫວັດດີການສັງຄົມຂອງຍີ່ປຸ່ນ ປະກາດວ່າ ພວກຕົນ ພົບເຫັນ ໂຄວິດ-19 ກາຍພັນເພີ່ມເຕີມ ຊຶ່ງແຕກຕ່າງກັບທີ່ພົບເຫັນຢູ່ໃນ ອັງກິດ ແລະ ແອຟຣິກກາໃຕ້.
ພົບເຫັນໂຄວິດ-19 ກາຍພັນໃໝ່ນີ້ ຈາກ ຄົນຍີ່ປຸ່ນ 4 ຄົນທີ່ເດີນທາງມາຈາກ ບຣາຊີລ, ຜົນຂອງການກວດຫາເຊື້ອພົບວ່າເປັນບວກ, ເຊື້ອໄວຣັດດັ່ງກ່າວມີຮູບຮ່າງຄ້າຍກັບສາຍພັນທີ່ພົບເຫັນຢູ່ໃນ ອັງກິດ ແລະ ແອຟຣິກກາໃຕ້ ແຕ່ ມີຫຼາຍຈຸດທີ່ແຕກຕ່າງ.
ສູນຄົ້ນຄວ້າລະບາດວິທະຍາຂອງຍີ່ປຸ່ນ ໄດ້ສົ່ງຕົວຢ່າງດັ່ງກ່າວໃຫ້ກັບອົງການຈັດຕັ້ງ ອະນາໄມໂລກແລ້ວ. ຂະນະນີ້ບໍ່ທັນຮູ້ວ່າ ຄວາມອັນຕະລາຍ ແລະ ການແຜ່ເຊື້ອຂອງມັນຢູ່ໃນລະດັບໃດ. ອົງການອະນາໄມໂລກກຳລັງຄົ້ນຄວ້າຢູ່.
