ທາຍາດຊຳຊຸງຕິດຄຸກ 2 ປີ 6 ເດືອນ ຂໍ້ຫາໃຫ້ສິນບົນ-ສໍ້ໂກງ
ສຳນັກຂ່າວຍອນຮັບ ລາຍງານໃນວັນທີ 18 ມັງກອນວ່າ: ທ່ານ ອີ ແຈຍອງ ຮອງປະທານ ບໍລິສັດ ຊຳຊຸງ ເອເລັກໂຕຣນິກ ຖືກສານສູງນະຄອນຫລວງເຊອຸນ ຕັດສິນວ່າມີຄວາມຜິດໃນຂໍ້ຫາໃຫ້ສິນບົນ ແລະ ສໍ້ໂກງ ເຊື່ອມໂຍງກັບເລື່ອງຮືຮາທີ່ນຳໄປສູ່ການຖອດຖອນປະທານາທິບໍດີ ປາກກິນເຮ.
ຄຳພິພາກສາກ່າວວ່າ: ທ່ານ ອີ ແຈຍອງ ໃຫ້ສິນບົນໂດຍກົງ ແລະ ຂໍຮ້ອງຕໍ່ອະດີດປະທານາທິບໍດີ ປາກກິນເຮ ໃຫ້ໃຊ້ອຳນາດຂອງນາງຊ່ວຍລາວໃຫ້ສືບທອດຕຳແໜ່ງປະທານອານາຈັກຊຳຊຸງຢ່າງລາບລື່ນ. ຖືເປັນເລື່ອງໜ້າເສຍດາຍຢ່າງຍິ່ງທີ່ຊຳຊຸງ ເຊິ່ງເປັນບໍລິສັດຊັ້ນນຳຂອງປະເທດ ແລະ ເປັນຜູ້ສ້າງນະວັດຕະກຳລະດັບໂລກທີ່ເປັນຄວາມພູມໃຈ, ແຕ່ພັດກ່ຽວຂ້ອງກັບອາຊະຍາກຳຊ້ຳແລ້ວຊ້ຳອີກເມື່ອມີການປ່ຽນອຳນາດທາງການເມືອງ.
ສານຕັດສິນວ່າ: ທ່ານ ອີ ແຈຍອງ ມີຄວາມຜິດໃນຂໍ້ຫາໃຫ້ສິນບົນ, ສໍ້ໂກງ ແລະ ປົກປິດການກະທຳຄວາມຜິດອາຍາ ໂດຍມີການຕິດສິນບົນມູນຄ່າປະມານ 8.600 ລ້ານວອນ ແລະ ພິພາກສາໃຫ້ລາວຕິດຄຸກ 2 ປີ 6 ເດືອນ.
