ຊົມເຊີຍວັນສ້າງຕັ້ງກອງທັບປະຊາຊົນລາວຄົບຮອບ 72 ປີຢ່າງສຸດໃຈ

- 20374809 540250193005118 303901620317827952 n - ຊົມເຊີຍວັນສ້າງຕັ້ງກອງທັບປະຊາຊົນລາວຄົບຮອບ 72 ປີຢ່າງສຸດໃຈ
- Untitled design - ຊົມເຊີຍວັນສ້າງຕັ້ງກອງທັບປະຊາຊົນລາວຄົບຮອບ 72 ປີຢ່າງສຸດໃຈ

ໂດຍ: ລູກເມືອງພວນ
ມື້ນີ້ ວັນທີ 20 ມັງກອນ ເປັນວັນສ້າງຕັ້ງກອງທັບປະຊາຊົນລາວຄົບຮອບ 72 ປີ(20/01/1949 – 20/01/2021).
ໂດຍປະຕິບັດຕາມມະຕິຕົກລົງ ຂອງສູນກາງພັກຄອມມຸຍນິດອີນດູຈີນ, ຢູ່ເຂດທີ່ໝັ້ນການປະຕິວັດ ຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ “ກອງລາດຊະວົງ” ໄດ້ກໍາເນີດເກີດຂຶ້ນຢ່າງເປັນທາງການໃນວັນທີ 20 ມັງກອນ 1949 ພາຍໃຕ້ການກໍ່ຕັ້ງ ແລະ ບັນຊາໂດຍກົງ ຂອງປະທານ ໄກສອນພົມວິຫານ. ຊຶ່ງແມ່ນຕົ້ນກຳເນີດຂອງກອງທັບປະຊາຊົນລາວໃນປັດຈຸບັນ. ນັບແຕ່ນັ້ນມາກໍໄດ້ຖືເອົາ ວັນທີ 20 ມັງກອນ 1949 ເປັນວັນສ້າງຕັ້ງກອງທັບປະຊາຊົນລາວ. ມາເຖິງວັນທີ 20 ມັງກອນນີ້ກໍຄົບຮອບ 72 ປີພໍດີ.
ນັບແຕ່ມື້ກຳເນີດເກີດຂຶ້ນມາ, ກອງທັບປະຊາຊົນລາວໄດ້ເຕີບໃຫ່ຍຂະຫຍາຍຕົວ ແລະ ເຂັ້ມແຂງຢ່າງບໍ່ຢຸດຢັ້ງ ພາຍໃຕ້ການຊີ້ນຳນຳພາ, ສຶກສາອົບຮົມຈາກພັກ. ຍິ່ງຕີກໍຍິ່ງມີໄຊຊະນະ, ຍິ່ງສູ້ຮົບກໍຍິ່ງເຕີບໃຫ່ຍເຂັ້ມແຂງ. ການປະຕິວັດກ້າວໄປບ່ອນໃດ ກອງທັບເຮົາກໍຂະຫຍາຍຕົວຮອດບ່ອນຫັ້ນ, ເປັນກຳລັງຫຼັກແຫຼ່ງ ແກ່ນສານ ແລະ ເຂັ້ມແຂງ ໃຫ້ແກ່ການຕໍ່ສູ້ຂອງປະຊາຊົນ ເພື່ອຄວາມເປັນເອກະລາດແຫ່ງຊາດ, ເພື່ອຄວາມສົມບູນພູນສຸກ ແລະ ຄວາມວັດທະນາຖາວອນຂອງປະເທດ.
ໂດຍປະສານສົມທົບກັບກອງທັບອາສາສະໝັກ ຫວຽດນາມ, ກອງທັບປະຊາຊົນລາວ ໄດ້ກາຍເປັນກຳລັງຫຼັກແຫຼ່ງປະຈັນບານ ຕ້ານກັບສັດຕູຜູ້ຮຸກຮານທັງແບບເກົ່າ ແລະ ແບບໃໝ່, ຕີເອົາໄຊຊະນະສັດຕູ 2 ໂຕທີ່ຮ້າຍກາດທີ່ສຸດຂອງໂລກມາໄດ້.
ຜ່ານການຕໍ່ສູ້ອັນຍືດເຍື້ອຍາວນານ, ກອງທັບລາວໄດ້ເຕີບໃຫ່ຍເຂັ້ມແຂງ ແລະ ສາມາດປົດປ່ອຍປະເທດຊາດໄດ້ຢ່າງສົມບູນໃນວັນທີ 2 ທັນວາ 1975 ແລະ ໄດ້ປະກາດສ້າງຕັ້ງປະເທດ ສາທາລະນະລັດ ປະຊາທິປະໄຕປະຊາຊົນລາວ ຕໍ່ຊາວໂລກຢ່າງສະຫງ່າຜາເຜີຍ.
ຕະຫຼອດໄລຍະ 72 ປີ, ກອງທັບລາວ ໄດ້ຮັບການຊີ້ນຳນຳພາ, ຝຶກຝົນບົ່ມເຄາະ ໂດຍກົງຈາກພັກ,ກອງທັບລາວໄດ້ເຮັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາປະເທດຊາດ ໄດ້ຢ່າງເຂັ້ມແຂງ ແລະ ອາດຫານຊານໄຊທີ່ສຸດ.
ກອງທັບປະຊາຊົນລາວ ແມ່ນຜູ້ສືບທອດມູນເຊື້ອພິລະອາດຫານ, ຕໍ່ສູ້ບໍ່ຍອມຈຳນົນຂອງວິລະບູລຸດຂອງຊາດ. ຕະຫຼອດ 72 ປີ, ກອງທັບເຮົາທັງສູ້ຮົບ ທັງປັບປຸງກໍ່ສ້າງຕົນເອງ ພາຍໃຕ້ການອົບຮົມບົ່ມສອນຈາກພັກປະຊາຊົນປະຕິວັດລາວ ແລະ ການຊ່ວຍເຫຼືອອູ້ມຊູ ລ້ຽງດູຂອງປະຊາຊົນບັນດາເຜົ່າ, ກອງທັບເຮົາຈຶ່ງສາມາດເສີມຂະຫຍາຍມູນເຊື້ອຕໍ່ສູ້ພິລະອາດຫານຂອງຊາດຂຶ້ນສູ່ຄຸນນະພາບໃໝ່ ກາຍເປັນມູນເຊື້ອສະຫງ່າງາມໃນໜ້າປະຫວັດສາດຂອງຊາດລາວ. ມູນເຊື້ອດັ່ງກ່າວສະແດງອອກຄື: 1).ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ປະຊາຊົນ ແລະ ອຸດົມການສັງຄົມນິຍົມຂອງພັກເຮົາ. 2).ມີນໍ້າໃຈຕໍ່ສູ້ພິລະອາດຫານ, ກ້າແກ່ນໜຽວແໜ້ນ ແລະ ມີໄຫວພິບ. 3).ມີນໍ້າໃຈດຸໝັ່ນຂະຫຍັນພຽນໃນການອອກແຮງງານ, ຝຶກແອບ, ເພີ່ມພູນຜະລິດຜົນ ແລະ ປະຍັດຊັດທ່ຽງ. 4). ກອງທັບປະຊາຊົນລາວ ຍາມໃດກໍມີຄວາມສາມັກຄີອັນແໜ້ນແຟ້ນກັບປະຊາຊົນບັນດາເຜົ່າ. 5).ກອງທັບປະຊາຊົນລາວໄດ້ສາມັກຄີກັບກອງທັບປະເທດສັງຄົມນິຍົມອ້າຍນ້ອງ ແລະ ບັນດາປະເທດເພື່ອນມິດທີ່ກ້າວໜ້າໃນໂລກ ໂດຍສະເພາະແມ່ນສາມັກຄີຮ່ວມສຳພັນສູ້ຮົບແບບພິເສດກັບກອງທັບປະຊາຊົນຫວຽດນາມອ້າຍນ້ອງ. 6).ກອງທັບປະຊາຊົນລາວຍາມໃດກໍຮັກສາມູນເຊື້ອອັນດີງາມ ມີປະຊາທິປະໄຕ ມີລະບຽບວີໄນດີ.
ທັງໝົດນັ້ນ ແມ່ນແນໃສ່ສ້າງກອງທັບປະຊາຊົນລາວ ໃຫ້ກາຍເປັນກອງທັບປະຕິວັດທີ່ມີແບບແຜນທັນສະໄໝ, ເປັນກຳລັງຫຼັກແຫຼ່ງໃຫ້ພາລະກິດປ້ອງກັນຊາດທົ່ວປວງຊົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ. ທັງເປັນການສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນດີງາມຂອງຕົນໃຫ້ແຕກດອກອອກຜົນຍິ່ງໆ ຂຶ້ນ. ຝຶກຝົນຫຼໍ່ຫຼອມຕົນເອງກ້າວຂຶ້ນໃຫ້ສົມກັບວ່າກອງທັບປະຊາຊົນລາວ ແມ່ນກອງທັບປະຊາຊົນ, ຈາກປະຊາຊົນ ແລະ ສູ້ຮົບເພື່ອຜົນປະໂຫຍດຂອງປະຊາຊົນລາວບັນດາເຜົ່າ, ແມ່ນພາຫະນະອັນແຫຼມຄົມຂອງພັກ ແລະ ແມ່ນກອງທັບວິລະຊົນຂອງຊາດລາວຢ່າງແທ້ຈິງ.

- Wave100S AD to Website 2020 0 - ຊົມເຊີຍວັນສ້າງຕັ້ງກອງທັບປະຊາຊົນລາວຄົບຮອບ 72 ປີຢ່າງສຸດໃຈ
- WhatsApp Image 2020 05 27 at 5 - ຊົມເຊີຍວັນສ້າງຕັ້ງກອງທັບປະຊາຊົນລາວຄົບຮອບ 72 ປີຢ່າງສຸດໃຈ
error: Alert: ເນື້ອຫາຂ່າວມີລິຂະສິດ !!