ທ່ານ ໄບເດນ ສາບານຮັບຕຳແໜ່ງຢ່າງເປັນທາງການ ໃຫ້ຄຳໝັ້ນຟື້ນຟູປະເທດທຸກດ້ານ ເປັນປະທານາທິບໍດີຂອງຊາວອາເມລິກາທຸກຄົນ

- AP21020607164641 - ທ່ານ ໄບເດນ ສາບານຮັບຕຳແໜ່ງຢ່າງເປັນທາງການ  ໃຫ້ຄຳໝັ້ນຟື້ນຟູປະເທດທຸກດ້ານ ເປັນປະທານາທິບໍດີຂອງຊາວອາເມລິກາທຸກຄົນ
- Untitled design - ທ່ານ ໄບເດນ ສາບານຮັບຕຳແໜ່ງຢ່າງເປັນທາງການ  ໃຫ້ຄຳໝັ້ນຟື້ນຟູປະເທດທຸກດ້ານ ເປັນປະທານາທິບໍດີຂອງຊາວອາເມລິກາທຸກຄົນ

ສະຫະລັດ​ອາ​ເມ​ລິ​ກາ​ປ່ຽນ​ສູ່​ການ​ບໍລິຫານປະ​ເທດ​ຂອງ​ປະທານາທິບໍດີ​ຄົນທີ 46 ຢ່າງ​ເປັນ​ທາງ​ການ ຫລັງ​ທ່ານ ​ໂຈ ​ໄບ​ເດນ ຈາກ​ພັກ​ເດ​ໂມ​ແຄຣດ ສຳ​ເລັດ​ພິສາ​ສາບານ​ຮັບ​ຕຳ​ແໜ່​ງຢູ່​ອາຄານ​ລັດຖະສະພາ ຫລື US Capitol ​ໃນ​ນະຄອນ​ຫລວງ​ວໍ​ຊິງ​ຕັນ ດີ.ຊີ ທ່າມກາງ​ມາດ​ຕະການ​ຮັກສາ​ຄວາມ​ປອ​ດ​ໄພ​ຢ່າງ​ເຂັ້ມງວດ.

ພິທີ​ເລີ່​ມຕົ້ນຂຶ້ນ​ໃນ​ເວລາ​ປະມານ 11:15 ​ໂມງ ຕາມ​ເວລາ​ທ້ອງ​ຖິ່ນ ຫລັງ​ມີ​ການ​ເຊີນ​ບຸກຄົນ​ສຳຄັນ​ເຂົ້າງານ​ຄົບ​ແລ້ວ. ທ່ານ ນາງ ​ເອມີ ​ໂຄລບູຊາ ສ.ວ ​ພັກ​ເດ​ໂມ​ແຄຣດ ຈາກ​ລັດ​ມິນ​ນິ​ໂຊ​ຕາ ​ເປັນ​ຕົວ​ແທນ​ກ່າວ​ຕ້ອນຮັບ​ຜູ້​ເຂົ້າຮ່ວມ​ງານ. ຈາກ​ນັ້ນ ນາງ ​ເລ​ດີ້​ ກາ​ກ້າ ສິລະ​ປິນຊື່​ດັງ ​ເປັນ​ຜູ້​ຮ້ອງ​ເພງ​ຊາດ​ອາ​ເມ​ລິ​ກາ ກ່ອນ​ຈະ​ເຂົ້າສູ່​ຊ່ວງ​ພິທີ​ສາບານ ​ໂດຍ​ນາງ ຄາ​ມາລາ ​ແຮຣິສ ​ເຊິ່ງສ້າງ​ປະຫວັດສາດ​ເປັນ​ຮອງ​ປະທານາທິບໍດີ​​ເພດຍິງ​ຄົນ​ທຳ​ອິດ​ຂອງ​ປະ​ເທດ ​ໄດ້​ກ່າວ​ຄຳ​ສາບານ​ຕາມຫລັງ​ນາງ ​ໂຊ​ເນຍ ​ໂຊ​ໂຕ​ເມ​ເຍີ ຜູ້​ພິພາກສາ​ສານ​ສູງ​ສຸດ​ຂອງ​ອາ​ເມ​ລິ​ກາ.

ຈາກ​ນັ້ນ, ນາງ ​ເຈນ​ນິ​ເຟີ ​ໂລ​ເປ​ຊ ​ໄດ້​ຮ້ອງ​ເພງ “America the Beautiful” ​ແລະ ນຳ​ເຂົ້າສູ່​ຊ່ວງ​ສຳຄັນ​ຂອງ​ງານ.

ທ່ານ ​ໂຈ ​ໄບ​ເດນ ຢືນ​ຄຽງ​ຂ້າງ​ນາງ ຈິລ ​ໄບ​ເດນ ​ແມ່ຍິງ​ໝາຍ​ເລກ​ໜຶ່ງ​ຄົນ​ໃໝ່ ​ໄດ້​ກ່າວ​ຄຳ​ສາບານ​ຕາມ​ຫລັງ​ທ່ານ ຈອນ ​ໂຣ​ເບິດ ປະທານ​ຄະນະ​ຜູ້​ພິພາກສາ​ສານ​ສູງ​ສຸດ ​ເຊິ່ງຖື​ເປັນ​ການ​ຮັບ​ຕຳ​ແໜ່​ງປະທານາທິບໍດີ​ຄົນທີ 46 ຢ່າງ​ເປັນ​ທາງ​ການ.

ຫລັງ​ກ່າວ​ຄຳ​ປະຕິຍານ​ແລ້ວ, ທ່ານ ​ໄບ​ເດນ ​ໄດ້​ກ່າວ​ສູນ​ທອນ​ພົດ​ໃນ​ຖານະ​ປະທານາທິບໍດີ​ເປັນຄັ້ງທຳ​ອິດ ​ໂດຍ​ປະກາດ​ວ່າ: “ນີ້​ຄື​ວັນ​ຂອງ​ອາ​ເມ​ລິ​ກາ”.

“ມື້ນີ້​ເປັນ​ວັນ​ຂອງ​ປະຊາທິປະ​ໄຕ ວັນ​ແຫ່ງ​ປະຫວັດສາດ​ ​ແລະ ຄວາມ​ຫວັງ​ຂອງ​ການ​ຟື້ນຟູ ​ແລະ ​ແກ້​ໄຂ” ທ່ານ ​ໄບ​ເດນ ກ່າວ.

ທ່ານ​ຍັງ​ບອກ​ອີກ​ວ່າ: ສຽງ​ເຈດ​ຕະນາ​ຂອງ​ປະຊາຊົນ​ຖືກ​ຮັບ​ຟັງ​ແລ້ວ ​ໂດຍ​ທ່ານ ​ໄບ​ເດນ ຍອມຮັບ​ຊ່ວງ​ເວລາ​ແຫ່ງ​ຄວາມ​ແຕກ​ແຍກ​ໃນ​ປະຫວັດສາດ​ອາ​ເມ​ລິ​ກາ, ​ແຕ່​ເຊື່ອ​ໝັ້ນວ່າຄວາມ​ສາມັກຄີ​ຈະ​ເອົາ​ຊະນະ​ໄດ້.

ທ່ານ​ລະບຸ​ວ່າ: ອາ​ເມ​ລິ​ກາ​ຜ່ານ​ຊ່ວງ​ເວລາ​ທີ່​ຍາກ​ລຳບາກ​ມາ​ແລ້ວ​ຫລາຍ​ຄັ້ງ​ໃນ​ໜ້າ​ປະຫວັດສາດ ບໍ່​ວ່າ​ຈະ​ເປັນ​ສົງຄາມ​ກາງ​ເມືອງ, ຍຸກ​ເສດຖະກິດ​ຕົກ​ຕໍ່າ, ສົງຄາມ​ໂລກ​ທັງ​ສອງ​ຄັ້ງ ​ແລະ ​ເຫດ​ວິນາດສະກຳ​ໂຈມ​ຕີ​ເວິດ​​ເທຣດ​ເຊັນ​ເຕີ ຫລື 9/11 “​ເຊິ່ງພວກ​ເຮົາ​ມີ​ໄຊ​ສະ​ເໝີ”.

ທ່ານ ​ໄບ​ເດນ ຍັງ​ປະກາດ​ນຳພາ​ອາ​ເມ​ລິ​ກາ​ກັບ​ໄປ​ສູ່​ຈຸດ​ທີ່​ເຄີຍ​ເປັນ​ໃນ​ເວທີ​ໂລກ ​ແລະ ​ໃຫ້​ຄຳ​ໝັ້ນວ່າ​ຈະ​ເປັນ​ປະທານາທິບໍດີ​ສຳລັບ​ຊາວ​ອາ​ເມ​ລິ​ກາ​ທຸກ​ຄົນ ລວມທັງ​ຄົນ​ທີ່​ບໍ່​ໄດ້​ສະໜັບສະໜູນ​ທ່ານ​ນຳ​ອີກ.

ທ່ານ ​ໄບ​ເດນ ​ເວົ້າ​ເຖິງ​ສະຖານະ​ການ​ການລະບາດ​ຂອງ​ໂຄ​ວິດ-19 ອີກ​ວ່າ: ອາ​ເມ​ລິ​ກາ​ມີ​ສິ່ງ​ທີ່​ຕ້ອງ​ສ້ອມ​ແປງ, ຟື້ນຟູ, ຊ່ວຍ​ເຫລືອ ​ແລະ ສ້າງ​ຂຶ້ນ​ໃໝ່​ອີກ​ຫລາຍ​ຢ່າງ ຈາກ​ຈຳນວນ​ຜູ້​ເສຍ​ຊີວິດ​ສູງ​ເຖິງ 4 ​ແສນ​ຄົນ​ໃນ​ອາທິດ​ນີ້, ອາ​ເມ​ລິ​ກາ​ຜະ​ເຊີນ​ຄວາມ​ທ້າ​ທາຍ​ຈາກ​ໄວຣັສຮ້າຍ​ແຮງ​ທີ່​ສຸດ​ໃນ​ຮອບ​ສະຕະວັດ ​ເຊິ່ງຂ້າ​ຊີວິດ​ຄົນ​ອາ​ເມ​ລິ​ກາ​ຫລາຍ​ກວ່າ​ການ​ສູນ​ເສຍ​ໃນ​ສົງຄາມ​ໂລກ​ຄັ້ງທີ 2 ອີກ.

“​ເພື່ອ​ເອົາ​ຊະນະ​ຄວາມ​ທ້າ​ທາຍ​ເຫລົ່າ​ນີ້ ​ເພື່ອຟື້ນຟູ​ຈິດ​ວິນ​ຍານ ​ແລະ ອະນາຄົດ​ຂອງ​ອາ​ເມ​ລິ​ກາ ພວກ​ເຮົາ​ຈຶ່ງ​ຕ້ອງການ​ຫລາຍ​ກວ່າ​ຄຳ​ເວົ້າ, ພວກ​ເຮົາ​ຕ້ອງການ​ສິ່ງ​ສຳຄັນ​ໃນ​ລະບອບ​ປະຊາທິປະ​ໄຕ ນັ້ນຄື​ຄວາມ​ສາມັກຄີ”.

- Wave100S AD to Website 2020 0 - ທ່ານ ໄບເດນ ສາບານຮັບຕຳແໜ່ງຢ່າງເປັນທາງການ  ໃຫ້ຄຳໝັ້ນຟື້ນຟູປະເທດທຸກດ້ານ ເປັນປະທານາທິບໍດີຂອງຊາວອາເມລິກາທຸກຄົນ

ທ່ານ ​ໄບ​ເດນ ຍັງ​ໃຫ້​ຄຳ​ໝັ້ນວ່າ: ຈະ​ຟື້ນຟູ​ການ​ພົວພັນ​ກັບປະ​ເທດ​ພັນທະ​ມິດ “ນີ້​ຄື​ສານ​ຈາກ​ຂ້າພະ​ເຈົ້າ​ເຖິງ​ຜູ້​ທີ່ຢູ່​ນອກ​ຊາຍ​ແດນ​ຂອງ​ພວກ​ເຮົາ, ອາ​ເມ​ລິ​ກາ​ໄດ້​ຮັບ​ການ​ທົດ​ສອບ ​ແລະ ພວກ​ເຮົາ​ເຂັ້ມ​ແຂງ​ຂຶ້ນ, ພວກ​ເຮົາ​ຈະ​ຟື້ນຟູ​ການ​ພົວພັນ​ກັບ​ພັນທະ​ມິດ ​ແລະ ມີ​ສ່ວນ​ຮ່ວມ​ກັບ​ໂລກ​ອີກ.

“ພວກ​ເຮົາ​ຈະ​ເປັນ​ຜູ້ນຳ ບໍ່​ພຽງ​ແຕ່​ດ້ວຍ​ຕົວຢ່າງ​ຂອງ​ພະລັງ​ຂອງ​ພວກ​ເຮົາ ​ແຕ່​ດ້ວຍ​ພະລັງ​ຂອງ​ຕົວຢ່າງ​ພວກ​ເຮົາ, ພວກ​ເຮົາ​ຈະ​ເປັນ​ພັນທະ​ມິດ​ທີ່​ແຂງ​ແກ່ນ ​ແລະ ​ເຊື່ອ​ຖື​ໄດ້​ສຳລັບ​ສັນຕິພາບ, ຄວາມ​ກ້າວໜ້າ ​ແລະ ຄວາມ​ໝັ້ນຄົງ” ທ່ານ ​ໄບ​ເດນ ກ່າວ.

ສຳລັບ​ພິທີ​ໃນ​ມື້ນີ້, ມີ​ແຂກ​ຜູ້​ມີ​ກຽດ, ຜູ້​ດຳລົງ​ຕຳ​ແໜ່​ງທາງ​ການ​ເມືອງ ​ແລະ ບຸກຄົນ​ສຳຄັນ​ໃນ​ວົງ​ການ​ຕ່າງໆ ​ເຂົ້າຮ່ວມ​ເປັນ​ຈຳນວນ​ຫລາຍ ລວມທັງ​ອະດີດ​ປະທານາທິບໍດີ ​ແລະ ​ແມ່ຍິງ​ໝາຍ​ເລກ​ໜຶ່ງ ຄື​ທ່ານ ບາຣັກ ​ແລະ ນາງ ມິ​ເຊ​ລ ​ໂອ​ບາ​ມາ, ທ່ານ ບິ​ລ ​ແລະ ນາງ ຮິລລາຣີ ຄລິ​ນຕັນ, ທ່ານ ຈ໊ອດ ​ແລະ ນາງ ລໍຣາ ບຸ​ສ ​ເຊັ່ນ​ດຽວ​ກັບ​ທ່ານ ​ໄມ ​ເພນ ຮອງ​ປະທານາທິບໍດີ ​ແລະ ນາງ ຄາ​ເຣນ ​ເພນ ພັນ​ລະ​ຍາ ກໍ​ມາ​ຮ່ວມ​ງານ​ນຳ, ຂາດ​ແຕ່​ທ່ານ ​ໂດ​ນັລ ທຣຳ ​ແລະ ນາງ ​ເມ​ລາ​ເນຍ ທຣຳ ທີ່​ປະຕິ​ເສດ​ເຂົ້າຮ່ວມ​ງານ​ກ່ອນ​ໜ້າ​ນີ້ ​ໂດຍ​ທຸກ​ຄົນ​ລ້ວນ​ໃສ່​ຜ້າ​ປິດ​ປາກ-ດັງ​ຕາມ​ມາດ​ຕະການ​ປ້ອງ​ກັນ​ການ​ຕິດ​ເຊື້ອ​ໂຄ​ວິດ-19 ​ເຊິ່ງ​ໃນ​ພິທີ​ຍັງ​ມີ​ການ​ຈຳກັດ​ຈຳນວນ​ຄົນ​ເຂົ້າງານ ​ແລະ ຈັດ​ບ່ອນ​ນັ່ງ​ຫ່າງ​ກັນ ​ເພື່ອ​ບໍ່​​ໃຫ້​ເກີດ​ຄວາມ​ແອ​ອັດ​ຈົນ​ເກີນ​ໄປ​ຕາມ​ມາດ​ຕະການ​ຮັກສາ​ໄລຍະ​ຫ່າງ​ທາງ​ສັງຄົມ.

ພິທີການ​ຄັ້ງນີ້​ຈັດ​ຂຶ້ນທ່າມກາງ​ມາດ​ຕະການ​ຮັກສາ​ຄວາມ​ປອດ​ໄພ​ຢ່າງ​ເຂັ້ມງວດ ​ໂດຍ​ມີ​ການວາງ​ກຳລັງ​ຕຳຫລວດ ​ແລະ ກອງ​ກຳລັງ​ພິທັກ​ມາຕຸພູມ​ປະມານ 25.000 ຄົນ​ອາລັກຂາ​ຕາມ​ຈຸດ​ຕ່າງໆ​ອ້ອມ​ຮອບ ຫລັງ​ຈາກ​ເມື່ອ​ຕົ້ນ​ເດືອນ​ຜ່ານ​ມາ ​ໄດ້​ເກີດ​ເຫດ​ຈະລາຈົນ​ໂດຍ​ກຸ່ມ​ຜູ້​ສະໜັບສະໜູນ ທຣຳ ທີ່​ພະຍາຍາມ​ຂັດຂວາງ​ການ​ຮັບຮອງ​ຜົນ​ການ​ເລືອກ​ຕັ້ງ​ໃນ​ລັດຖະສະພາ ຈົນ​ເກີດ​ຄວາມ​ກັງວົນ​ວ່າ​ອາດ​ເກີດ​ເຫດການ​ຮຸນ​ແຮງ​ອີກ​ໃນ​ລະຫວ່າງ​ພິທີ.

ຄາດ​ວ່າ​ຫລັງ​ຈາກ​ຮັບ​ຕຳ​ແໜ່​ງ​ແລ້ວ, ທ່ານ ​ໄບ​ເດນ ຈະ​ລົງ​ນາມ​ຄຳ​ສັ່ງ​ພິ​ເສດ​ປະທານາທິບໍດີ 17 ສະບັບ​ໃນ​ບໍ່​ເທົ່າ​ໃດ​ຊົ່ວ​ໂມງ​ທໍາ​ອິດ ນັບ​ແຕ່​ການ​ອອກ​ຄຳ​ສັ່ງ​ໃຫ້​ໜ່ວຍ​ງານ​ທີ່​ກ່ຽວຂ້ອງ​ໃຊ້​ມາດ​ຕະການ​ໃໝ່ ​ເພື່ອ​ຮັບ​ມື​ການລະບາດ​ຂອງ​ໂຄ​ວິດ-19 ລວມທັງ​ລຶບລ້າງ​ຫລາຍ​ນະ​ໂຍບາຍ​ທີ່​ອອກ​ໂດຍ​ປະທານາທິບໍດີ ​ໂດ​ນັລ ທຣຳ.

CNN ລາຍ​ງານ​ວ່າ: ໜຶ່ງ​ໃນ​ຫລາຍໆ​ມາດ​ຕະການ​ທີ່ທ່ານ ​ໄບ​ເດນ ຈະ​ປະກາດ​ໃຊ້​ທັນທີ ປະກອບ​ມີ​ການ​ກຳນົດ​ໃຫ້​ໃສ່​ຜ້າ​ປິດ​ປາກ-ດັງ​ປ້ອງ​ກັນ​ການ​ແຜ່​ເຊື້ອ​ໃນ​ສະຖານ​ທີ່​ທາງ​ການ​ຂອງ​ລັດຖະບານ ລວມທັງ​ການ​ແຕ່ງຕັ້ງຜູ້​ປະສານ​ງານ​ຮັບ​ມື​ພະຍາດ​ລະບາດ ​ເພື່ອ​ເບິ່ງ​ແຍງ​ການ​ແຈກ​ຢາຍ​ວັກ​ຊີ​ນ​ໂຄ​ວິດ-19, ຢາ ​ແລະ ອຸປະກອນ​ການ​ແພດ.

ນອກຈາກ​ນີ້, ທ່ານ ​ໄບ​ເດນ ຍັງ​ມີ​ແຜນ​ລົ້ມລ້າງ​ຄຳ​ສັ່ງ​ພິ​ເສດ​ທີ່​ອອກ​ໂດຍ ທຣຳ ຫລາຍ​ສະບັບ ​ໂດຍ​ຈະ​ນຳພາ​ອາ​ເມ​ລິ​ກາ​ກັບ​ເຂົ້າສູ່​ຂໍ້​ຕົກລົງ​ປາຣີສ ​ເພື່ອ​ຮ່ວມ​ແກ້​ໄຂ​ບັນຫາ​ໂລກ​ຮ້ອນ​ກັບ​ນາໆ​ຊາດ​ອີກ ​ແລະ ຢັບຢັ້ງການ​ຖອນ​ຕົວ​ຈາກ​ການ​ເປັນ​ສະມາຊິກ​ອົງການ​ອະນາ​ໄມ​ໂລກ (WHO) ຂອງ​ອາ​ເມ​ລິ​ກາ.

ອີກ​ໜຶ່ງ​ຄຳ​ສັ່ງ​ພິ​ເສດຂອງ​ທ່ານ ​ໄບ​ເດນ ທີ່​ຄາດ​ວ່າ​ຈະ​ລົງ​ນາມ​ນັບ​ແຕ່​ມື້ທຳ​ອິດ​ຄື ການ​ຢຸດ​ການ​ໃຊ້ມາດ​ຕະການ​ທີ່​ເຂັ້ມງວດ​ຕໍ່​ຜູ້​ອົບ​ພະຍົບຜິດ​ກົດໝາຍ​ໃນ​ບໍລິ​ເວນ​ຊາຍ​ແດນ ​ແລະ ການ​ຍົກ​ເລີກ​ກົດ​ຫ້າມ​ທີ່​ບໍ່​ໃຫ້​ຊາວ​ມຸດ​ສະ​ລິ​ມຈາກ​ຫລາຍ​ປະ​ເທດ​ເຂົ້າປະ​ເທດ. ນອກຈາກ​ນີ້ ຍັງ​ຢຸດ​ການຈັດ​ສັນ​ງົບປະມານ​ໃນ​ການ​ສ້າງ​ກຳ​ແພງ​ກັ້ນຊາຍ​ແດນ​ທາງ​ໃຕ້​ນຳ​ອີກ.

- WhatsApp Image 2020 05 27 at 5 - ທ່ານ ໄບເດນ ສາບານຮັບຕຳແໜ່ງຢ່າງເປັນທາງການ  ໃຫ້ຄຳໝັ້ນຟື້ນຟູປະເທດທຸກດ້ານ ເປັນປະທານາທິບໍດີຂອງຊາວອາເມລິກາທຸກຄົນ
error: Alert: ເນື້ອຫາຂ່າວມີລິຂະສິດ !!