ທ່ານ ໄບເດນ ເຊັນຄຳສັ່ງພາອາເມລິກາກັບເຂົ້າຮ່ວມ ຂໍ້ຕົກລົງປາຣີສເພື່ອແກ້ໄຂບັນຫາໂລກຮ້ອນ ໃນມື້ທຳອິດຂອງການເຮັດວຽກ

- Untitled design - ທ່ານ ໄບເດນ ເຊັນຄຳສັ່ງພາອາເມລິກາກັບເຂົ້າຮ່ວມ ຂໍ້ຕົກລົງປາຣີສເພື່ອແກ້ໄຂບັນຫາໂລກຮ້ອນ ໃນມື້ທຳອິດຂອງການເຮັດວຽກ

ບໍ່​ເທົ່າ​ໃດ​ຊົ່ວ​ໂມງ​ຫລັງ​ພິທີ​ສາບານ​ຮັບ​ຕຳ​ແໜ່​ງຂອງ​ທ່ານ ​ໂຈ ​ໄບ​ເດນ ປະທານາທິບໍດີ​ຄົນ​ໃໝ່​ຂອງ​ອາ​ເມ​ລິ​ກາ ລົງ​ນາມ​ໃນ​ຄຳ​ສັ່ງ​ພິ​ເສດ ນຳພາ​ອາ​ເມ​ລິ​ກາ​ກັບ​ເຂົ້າ​ເປັນ​ພາຄີ​ໃນ​ຂໍ້​ຕົກລົງ​ປາຣີສ ທີ່​ນາໆ​ຊາດ ລວມທັງ​ອາ​ເມ​ລິ​ກາ ລົງ​ນາມ​ເມື່ອ​ປີ 2015 ​ເພື່ອ​ຮ່ວມ​ກັນ​ແກ້​ໄຂ​ບັນຫາ​ການ​ປ່ຽນ​ແປງ​ຂອງ​ສະພາບ​ອາກາດ. ການ​ເຄື່ອນ​ໄຫວ​ດັ່ງກ່າວ​ຖື​ເປັນ​ການ​ສົ່ງ​ສັນຍານ​ຈະ​ແຈ້ງວ່າ: ທ່ານ ​ໄບ​ເດນ ຕ້ອງການ​ແກ້​ໄຂ​ບັນຫາ​ໂລກ​ຮ້ອນ​ຢ່າງ​ຈິງ​ຈັງ ​ແລະ ຮີບ​ດ່ວນ​ຕາມ​ທີ່​ເຄີຍ​ຫາ​ສຽງ​ໄວ້.

ກ່ອນ​ໜ້າ​ນີ້, ທ່ານ ​ໂດ​ນັລ ທຣຳ ​ເປັນ​ຄົນ​ນຳພາ​ອາ​ເມ​ລິ​ກາ ຖອນ​ຕົວ​ຈາກ​ຂໍ້​ຕົກລົງ​ດັ່ງກ່າວ​ເມື່ອ​ປີຜ່ານມາ ​ໂດຍ​ໃຫ້​ເຫດຜົນ​ວ່າ: ການ​ຫລຸດ​ແກັສ​ເຮືອນ​ແກ້ວ​ຈະ​ທຳລາຍ​ຂະ​ແໜງ​ອຸດສາຫະກຳ​ສຳຄັນ​ຂອງ​ອາ​ເມ​ລິ​ກາ. ຂະນະ​ທີ່​ທ່ານ​ເອງ​ບໍ່​ເຊື່ອ​ວ່າ​ມີ​ບັນຫາ​ໂລກ​ຮ້ອນ​​ແທ້.

ຜູ້​ຊ່ຽວຊານ​ຫລາຍ​ຄົນ​ເບິ່ງ​ວ່າ: ການ​ກັບ​ເຂົ້າຮ່ວມ​ຂໍ້​ຕົກລົງ​ປາຣີສຂອງ​ອາ​ເມ​ລິ​ກາ ຖື​ເປັນ​ບາດກ້າວ​ສຳຄັນ​ຂອງ​ຄະນະ​ບໍລິຫານ ​ໄບ​ເດນ ​ໃນ​ການ​ກັບນະ​ໂຍບ​າຍທີ່​ດຳ​ເນີນ​​ໄລຍະ 4 ປີຜ່ານມາ. ​ເຖິງ​ຢ່າງ​ໃດ​ກໍ​ຕາມ, ຍັງ​ມີ​ວຽກ​ຍາກ ​ແລະ ຄວາມ​ທ້າ​ທາຍ​ລໍ​ຢູ່​ຂ້າງ​ໜ້າ ​ເຊິ່ງລວມທັງ​ການ​ຊຸກຍູ້​ນະ​ໂຍບາຍ​ສີຂຽວ​ຕ່າງໆ ​ແລະ ສົ່ງ​ເສີມ​ພະລັງງານ​ສະອາດ ​ເພື່ອ​ທົດ​ແທນ​ເຊື້ອ​ໄຟ​ຈາກ​ຟໍຊິ​ລ.

ການ​ອອກ​ຄຳ​ສັ່ງ​ປະທານາທິບໍດີ​ສະບັບ​ໃໝ່​ຂອງ​ທ່ານ ​ໄບ​ເດນ ​ເປັນ​ການ​ສົ່ງ​ສັນຍານ​ທີ່​ຈະ​ແຈ້ງວ່າ: ອາ​ເມ​ລິ​ກາ​ພ້ອມ​ຈະ​ຮ່ວມ​ມື​ກັບ​ນາໆ​ຊາດ​ໃນ​ການ​ຕໍ່ສູ້​ກັບ​ບັນຫາ​ໂລກ​ຮ້ອນ ​ແລະ ຕ້ອງການ​ຟື້ນຟູ​ບົດບາດ​ການ​ເປັນ​ຜູ້ນຳ​ຂອງ​ອາ​ເມ​ລິ​ກາ​ໃນ​ເລື່ອງ​ນີ້ ​ໂດຍ​ຂໍ້​ຕົກລົງ​ດັ່ງກ່າວ​ກຳນົດ​ໃຫ້​ປະ​ເທດ​ຕ່າງໆ ພະຍາຍາມ​ຫລຸດ​ປະລິມານ​ການ​ປ່ອຍ​ແກັສ​ເຮືອນ​ແກ້ວ​ໃຫ້​ໄດ້​ຕາມ​ເປົ້າໝາຍ.

ຄະນະ​ບໍລິຫານ​ຂອງ​ທ່ານ ​ໄບ​ເດນ ມີ​ຄວາມ​ຕັ້ງ​ໃຈ​ຈະ​ໂຈະ​ໂຄງການ​ກໍ່ສ້າງ​ທໍ່​ສົ່ງ​ນ້ຳມັນ Keystone XL ທີ່​ວາງ​ມາ​ຈາກ​ກາ​ນາ​ດາ ​ແລະ ຈະ​ລົງ​ນາມ​ໃນ​ຄຳ​ສັ່ງ​ພິ​ເສດອີກ​ຫລາຍ​ສະບັບ ​ເພື່ອ​ລົ້ມລ້າງ​ມາດ​ຕະການ​ຫລາຍ​ຢ່າງ​ຂອງ ທຣຳ ທີ່​ສົ່ງ​ຜົນ​ກະທົບ​ຕໍ່​ສິ່ງ​ແວດ​ລ້ອມ ລວມທັງ​ການ​ສະຫງວນ​ຜືນ​ດິນ ​ແລະ ​ແຫ​ລ່ງນ້ຳ 30% ຂອງ​ອາ​ເມ​ລິ​ກາ​ພາຍ​ໃນ​ປີ 2030 ​ແລະ ປົກ​ປ້ອງ​ເຂດ​ປ່າ​ໄມ້​ແຫ່ງ​ຊາດ​ອາກຕິກ​ຈາກ​ການ​ຖືກ​ຂຸດ​ເຈາະ​ຫາ​ແຫ​ລ່ງນ້ຳມັນ.

- Wave100S AD to Website 2020 0 - ທ່ານ ໄບເດນ ເຊັນຄຳສັ່ງພາອາເມລິກາກັບເຂົ້າຮ່ວມ ຂໍ້ຕົກລົງປາຣີສເພື່ອແກ້ໄຂບັນຫາໂລກຮ້ອນ ໃນມື້ທຳອິດຂອງການເຮັດວຽກ

​ເຖິງ​ຢ່າງ​ໃດ​ກໍ​ຕາມ, ຫລາຍ​ນະ​ໂຍບາຍ​ຂອງ​ທ່ານ ​ໄບ​ເດນ ອາດ​ພົບ​ອຸປະສັກ ​ເນື່ອງ​ຈາກ​ພັກ​ເດ​​ໂມ​ແຄຣດຄອງ​ສຽງ​ສ່ວນ​ຫລາຍ​ແບບ​ຫວຸດ​ຫວິດ​ໃນ​ວຸດ​ທິສະພາ ​ເຮັດ​ໃຫ້​ທ່ານ ​ໄບ​ເດນ ຕ້ອງການ​ສຽງ​ສະໜັບສະໜູນ​ຈາກ​ພັກ​ແບບ​ບໍ່​ແຕກ​ແຖວ ລວມທັງ​ສຽງ​ສະໜັບສະໜູນ​ຈາກ ສ.ວ ທີ່​ມີ​ແນວ​ຄິດ​ອະນຸລັກ​ນິຍົມ.

​ແຕ່​ຄາດ​ວ່າ​ທ່ານ ​ໄບ​ເດນ ຈະ​ສາມ​າດຊຸກຍູ້​ແຜນ​ເສດຖະກິດ​ມູນ​ຄ່າ 2 ຕື້​ໂດ​ລາ ​ເພື່ອ​ເດີນ​ໜ້າ​ຂະ​ບວນການ​ປ່ຽນ​ແປງ​ຜ່ານ​ໄປ​ສູ່​ພະລັງງານ​ສະອາດ, ຫລຸດ​ການ​ປ່ອຍ​ແກັສກາກ​ບອນ​ຈາກ​ໂຮງ​ໄຟຟ້າ​ພາຍ​ໃນ​ປີ 2035 ​ແລະ ບັນລຸ​ເປົ້າໝາຍ​ປ່ອຍ​ແກັສ​ເຮືອນ​ແກ້ວ​ສຸດທິ​ເປັນ​ສູນ​ພາຍ​ໃນ​ປີ 2050.

ນອກຈາກ​ນະ​ໂຍບາຍ​ດ້ານ​ສິ່ງ​ແວດ​ລ້ອມ​ແລ້ວ, ຄຳ​ສັ່ງ​ປະທານາທິບໍດີ​ສະບັບ​ໃໝ່​ຂອງ​ທ່ານ ​ໄບ​ເດນ ຍັງ​ກ່ຽວຂ້ອງ​ກັບ​ມາດ​ຕະການ​ຮັບ​ມື​ການ​ແຜ່​ລະບາດ​ໂຄ​ວິດ-19, ຢັບຢັ້ງການ​ຖອນ​ຕົວ​ຈາກ​ອົງການ​ອະນາ​ໄມ​ໂລກ (WHO), ຢຸດ​ການ​ໃຊ້​ມາດ​ຕະການ​ທີ່​ເຂັ້ມງວດ​ຕໍ່​ຜູ້​ອົບ​ພະຍົບຜິດ​ກົດໝາຍ​ບໍລິ​ເວນ​ຊາຍ​ແດນ, ຍົກ​ເລີກ​ກົດ​ຫ້າມ​ທີ່​ບໍ່​ໃຫ້​ຊາວ​ມຸດ​ສະ​ລິ​ມຈາກ​ຫລາຍ​ປະ​ເທດ​ເຂົ້າປະ​ເທດ ຕະຫລອດ​ຈົນ​ຢຸດ​ການຈັດ​ສັນ​ງົບປະມານ​ສ້າງ​ກຳ​ແພງ​ກັ້ນຊາຍ​ແດນ​ທາງ​ໃຕ້​ນຳ​ອີກ.

- WhatsApp Image 2020 05 27 at 5 - ທ່ານ ໄບເດນ ເຊັນຄຳສັ່ງພາອາເມລິກາກັບເຂົ້າຮ່ວມ ຂໍ້ຕົກລົງປາຣີສເພື່ອແກ້ໄຂບັນຫາໂລກຮ້ອນ ໃນມື້ທຳອິດຂອງການເຮັດວຽກ
error: Alert: ເນື້ອຫາຂ່າວມີລິຂະສິດ !!