ຍອດຜູ້ຕິດເຊື້ອໄຂ້ເລືອດອອກທົ່ວປະເທດເພີ່ມຂຶ້ນຫຼາຍກ່ວາ 480 ກໍລະນີແລ້ວ

  ໜ່ວຍເຝົ້າລະວັງພະຍາດ, ກະຊວງສາທາລະນະສຸກລາຍງານວ່າ: ປັດຈຸບັນການລະບາດຂອງໄຂ້ຍຸງລາຍຢູ່ຫລາຍແຂວງເຫັນວ່າຍັງມີແນວໂນ້ມເພີ່ມຂຶ້ນ, ໂດຍສະເພາະຢູ່ນະຄອນຫລວງວຽງຈັນ ແລະ ບາງແຂວງພາກໃຕ້, ຊຶ່ງນັບແຕ່ປີໃໝ່ມາຮອດປັດຈຸບັນທົ່ວປະເທດມີຍອດຜູ້ຕິດເຊື້ອແລ້ວຫລາຍກວ່າ 480 ກໍລະນີ, ໂຊກດີຍັງບໍ່ມີຜູ້ເສຍຊີວິດຈາກພະຍາດດັ່ງກ່າວ. ໃນນັ້ນຢູ່ນະຄອນຫລວງວຽງຈັນມີຈຳນວນຜູ້ຕິດເຊື້ອ 137 ກໍລະນີ, ຈຳປາສັກມີ 120 ກໍລະນີ, ອັດຕະປື 110 ກໍລະນີ, ບໍລິຄຳໄຊ 32 ກໍລະນີ, ສະຫວັນນະເຂດ 26 ກໍລະນີ, ສາລະວັນ 19 ກໍລະນີ, ເຊກອງ 17 ກໍລະນີ, ຄຳມ່ວນ 12 ກໍລະນີ ແລະ ແຂວງອື່ນໆອີກຈຳນວນໜຶ່ງ, ຜ່ານມາກະຊວງສາທາລະນະສຸກ ແລະ ອຳນາດການປົກຄອງໄດ້ສຸມໃສ່ການປ້ອງກັນ ແລະ ສະກັດກັ້ນພະຍາດດັ່ງກ່າວຢ່າງຈິງຈັງດ້ວຍການຮ່ວມມືກັນໂຄສະນາແນະນຳປະຊາຊົນຮູ້ປ້ອງກັນຕົນເອງ ແລະ ທຳລາຍແຫລ່ງເພາະພັນຂອງຍຸງລາຍຢູ່ຕາມບ້ານເຮືອນ ແລະ ເຂດທີ່ມີຄວາມສ່ຽງຕ່າງໆ, ແຕ່ກໍເຫັນວ່າການລະບາດຂອງພະຍາດດັ່ງກ່າວຍັງມີລັກສະນະເພີ່ມຂື້ນ, ຂະນະດຽວກັນສິ່ງທີ່ໜ້າເປັນຫ່ວງໃນປັດຈຸບັນແມ່ນສະພາບອາກາດມີການປ່ຽນແປງຄາວໜຶ່ງຝົນຕົກ-ຄາວໜຶ່ງແດດອອກ, ຊຶ່ງເປັນເງື່ອນໄຂໃຫ້ຍຸງລາຍທີ່ເປັນພາຫະນຳເຊື້ອໄຂ້ເລືອດອອກແຜ່ພັນໄດ້ງ່າຍ ແລະ ມີຄວາມສ່ຽງຕໍ່ການລະບາດຂອງພະຍາດດັ່ງກ່າວ, ດັ່ງນັ້ນພາກສ່ວນກ່ຽວ ແລະ ປະຊາຊົນເຮົາຕ້ອງເອົາໃຈໃສ່ປ້ອງກັນ ແລະ ສະກັດກັ້ນພະຍາດນີ້ໃຫ້ແຂງແຮງກວ່າເກົ່າ, ເພື່ອບໍ່ໃຫ້ເກີດການລະບາດໃຫຍ່ດັ່ງທີ່ເຄີຍເປັນມາ ແລະ ສິ່ງສຳຄັນແມ່ນທຸກຄອບຄົວ ແລະ ທຸກຊຸມຊົນຕ້ອງເປັນເຈົ້າການທຳລາຍແຫລ່ງເພາະພັນຂອງໜອນນ້ຳຍຸງລາຍທີ່ເປັນພາຫະນຳເຊື້ອ, ດ້ວຍການປະຕິບັດຄຳຂັວນ 5ປ ທີ່ກະຊວງສາທາລະນະສຸກວາງອອກໃຫ້ເຂັ້ມງວດກວ່າເກົ່າຄື: 1 ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່. 2 ປ່ຽນນ້ຳໃນພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ. 3 ປ່ອຍປາຫາງນົກຍູງເພື່ອກິນໜອນນ້ຳ. 4 ປັບປຸງການອະນາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະ, ກະປ໋ອງ, ຢາງຕີນລົດເກົ່າທີ່ມີນ້ຳຂັງ ແລະ 5 ປະຕິບັດໃຫ້ເປັນນິໃສປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປພົບແພດໝໍດ່ວນ, ພ້ອມທັງເຮັດທຸກວິທີທາງທີ່ສາມາດຈຳກັດພະຍາດນີ້ໃຫ້ນັບມື້ຫລຸດໜ້ອຍຖອຍລົງ ແລະ ດັບສູນໄປ.

error: Alert: Content is protected !!