ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນວົງແຄບແບບທາງໄກ

- 003 - ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນວົງແຄບແບບທາງໄກ
- Untitled design - ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນວົງແຄບແບບທາງໄກ

ໃນວັນທີ 21 ມັງກອນນີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ນໍາຄະນະເຂົ້າຮ່ວມກອງປະຊຸມວົງແຄບລັດຖະມົນຕີຕ່າງປະເທດອາຊຽນ ແບບທາງໄກ ພາຍໃຕ້ກາເປັນປະທານອາຊຽນຂອງບຣູໄນ ດາຣູຊາລາມ (ສຳລັບສົກປີ 2021).

ກອງປະຊຸມໄດ້ຕີລາຄາສູງຕໍ່ຜົນການຈັດຕັ້ງປະຕິບັດບັນດາຂໍ້ຕົກລົງຂອງຜູ້ນໍາອາຊຽນໃນກອງປະຊຸມສຸດຍອດອາຊຽນ ຄັ້ງທີ 37 ຜ່ານມາ ລວມທັງຜົນສຳເລັດການທົບທວນກາງສະໄໝແຜນແມ່ບົດການສ້າງປະຊາຄົມອາຊຽນຮອດປີ 2025; ການປັບປຸງຂອດປະສານງານລະຫວ່າງຂະແໜງການກ່ຽວຂ້ອງພາຍໃນເສົາຄໍ້າ ແລະ ລະຫວ່າງເສົາຄໍ້າປະຊາຄົມອາຊຽນ; ການກະກຽມຮ່າງວິໄສທັດປະຊາຄົມອາຊຽນ ຫລັງປີ 2025. ພ້ອມນີ້, ກອງປະຊຸມຍັງໄດ້ປຶກສາຫາລືສືບຕໍ່ຈັດຕັ້ງປະຕິບັດແຜນຟື້ນຟູຮອບດ້ານອາຊຽນ; ການນຳໃຊ້ສ່ວນໜຶ່ງຂອງກອງທຶນຕ້ານໂຄວິດ-19 ອາຊຽນ ເພື່ອຈັດຊື້ຢາວັກແຊັງ ແລະ ອຸປະກອນການແພດສໍາລັບປະຊາຊົນອາຊຽນ; ການສ້າງຕັ້ງແລວການເດີນທາງພິເສດອາຊຽນ ແລະ ອື່ນໆ. ພ້ອມນັ້ນ, ຍັງໄດ້ປຶກສາຫາລື ແລະ ເຫັນດີເປັນເອກະພາບຕໍ່ບັນດາບູລິມະສິດການເປັນປະທານອາຊຽນຂອງ ບຣູໄນ ດາຣູຊາລາມ ສົກປີ 2021 ພາຍໃຕ້ຄໍາຂວັນ “ພວກເຮົາຫ່ວງໄຍ, ພວກເຮົາກຽມພ້ອມ, ພວກເຮົາພ້ອມກັນຈະເລີນ” (We Care, We Prepare, We Prosper) ໂດຍສຸມໃສ່ຄວາມເປັນເອກກະພາບ ເພື່ອສ້າງປະຊາຄົມອາຊຽນໃຫ້ມີຄວາມກົມກຽວ ໂດຍມີປະຊາຊົນເປັນແກນກາງ; ການກະກຽມຄວາມພ້ອມ ແລະ ການປັບຕົວເພື່ອຮັບມື ແລະ ຍາດເອົາກາລະໂອກາດອັນໃໝ່ທີ່ອາດຈະເກີດຂຶ້ນ; ການເພີ່ມທະວີຄວາມສະມັກຄີເປັນປຶກແຜ່ນພາຍໃນອາຊຽນ ແລະ ສືບຕໍ່ສົ່ງເສີມການຮ່ວມມືກັບພາຍນອກ.

ກອງປະຊຸມຄັ້ງນີ້, ຍັງໄດ້ປຶກສາຫາລືການຮ່ວມມືລະຫວ່າງອາຊຽນກັບພາຍນອກ ເຊິ່ງໃນນີ້ໄດ້ພິຈາລະນາຂໍ້ສະເໜີຂອງບັນດາປະເທດທີ່ສົນໃຈເຂົ້າເປັນຄູ່ຮ່ວມມືກັບອາຊຽນ ແລະ ການເຂົ້າເປັນພາຄີຂອງສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (TAC) ຂອງປະເທດນອກພາກພື້ນຈຳນວນໜຶ່ງ. ໃນໂອກາດນີ້, ບັນດາລັດຖະມົນຕີຕ່າງປະເທດອາຊຽນ ຍັງໄດ້ແລກປ່ຽນຄວາມຄິດເຫັນຕໍ່ບາງບັນຫາພົ້ນເດັ່ນຢູ່ພາກພື້ນ ແລະ ສາກົນ ເປັນຕົ້ນການກໍ່ການຮ້າຍ, ຄວາມປອດໄພທາງໄຊເບີ, ໄພພິ ບັດທາງທໍາມະຊາດ, ການປ່ຽນແປງຂອງສະພາບດິນຟ້າອາກາດ, ການຄ້າມະນຸດ, ຄວາມປອດໄພທາງທະເລ ແລະ ອື່ນໆ.

- Wave100S AD to Website 2020 0 - ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນວົງແຄບແບບທາງໄກ

ໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ຜົນສຳເລັດການເປັນປະທານອາຊຽນຂອງ ສສ. ຫວຽດນາມ ໃນປີ 2020 ໂດຍສະເພາະຄວາມຄືບໜ້າໃນການຜັນຂະຫຍາຍບັນດາຄໍາຕົກລົງຂອງຜູ້ນໍາອາຊຽນໃນກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດອື່ນຜ່ານມາ ພ້ອມທັງສະແດງຄວາມຊົມເຊີຍຕໍ່ການຮັບໜ້າທີ່ເປັນປະທານອາຊຽນຂອງ ບຣູໄນ ດາຣູຊາລາມ ສຳລັບສົກປີ 2021. ນອກນັ້ນ, ກໍໄດ້ຊຸກຍູ້ໃຫ້ຂະແໜງການກ່ຽວຂ້ອງຂອງອາຊຽນ ເລັ່ງລັດຈັດຕັ້ງປະຕິບັດບັນດາຂໍ້ລິເລີ່ມທີ່ກ່ຽວພັນການຮັບມື ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃຫ້ເປັນຮູບປະທໍາ ລວມທັງການຜັນຂະຫຍາຍແຜນຟື້ນຟູຮອບດ້ານອາຊຽນ ແລະ ການນໍາໃຊ້ກອງທຶນຕ້ານໂຄວິດອາຊຽນເພື່ອຈັດຊື້ຢາວັກແຊັງ ແລະ ຢາປົວພະຍາດສໍາລັບປະຊາຊົນອາຊຽນ ເຊິ່ງທັງໝົດນີ້ຈະປະກອບສ່ວນເຂົ້າໃນການຫລຸດຜ່ອນຜົນກະທົບທາງດ້ານເສດຖະກິດ-ສັງຄົມ ແລະ ສຸຂະພາບໃນພາກພື້ນ. ພ້ອມນັ້ນ, ທ່ານລັດຖະມົນຕີ ຍັງໄດ້ເນັ້ນຕື່ມວ່າ: ອາຊຽນຄວນສືບຕໍ່ສົ່ງເສີມບົດບາດຄວາມເປັນແກນກາງຂອງຕົນໃນການພົວພັນຮ່ວມມືກັບພາຍນອກ ແລະ ໃນໂຄງສ້າງພາກພື້ນທີ່ພວມຜັນແປ ໂດຍສະເພາະໃນສະພາບການແຜ່ລະບາດຂອງພະຍາດໂຄວິດ-19 ແລະ ຫລັງໂຄວິດ-19.

- WhatsApp Image 2020 05 27 at 5 - ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນວົງແຄບແບບທາງໄກ
- WhatsApp Image 2020 05 27 at 5 - ລັດຖະມົນຕີກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາຊຽນວົງແຄບແບບທາງໄກ
error: Alert: ເນື້ອຫາຂ່າວມີລິຂະສິດ !!