ໄບເດນ ລົງນາມ 10 ຄຳສັ່ງພິເສດ ເດີນໜ້າແຜນຍຸດທະສາດຊາດ ຮັບມືໂຄວິດ-19 ຢືນຢັນອີງວິທະຍາສາດຫລາຍກວ່າການເມືອງ
ປະທານາທິບໍດີ ໂຈ ໄບເດນ ຂອງອາເມລິກາ ເດີນໜ້າມື້ທຳອິດຂອງການປະຕິບັດໜ້າທີ່ເຕັມຮູບແບບຢູ່ທຳນຽບຂາວ ໃນວັນທີ 21 ມັງກອນ ດ້ວຍການລົງນາມຄຳສັ່ງພິເສດ 10 ສະບັບ ຕາມແຜນຍຸດທະສາດຊາດ ເພື່ອຮັບມືພະຍາດໂຄວິດ-19 ທີ່ກຳລັງແຜ່ລະບາດໜັກທົ່ວປະເທດ ຄ້າຍຄືແຜນຮັບມືສະຖານະການໃນສະພາບສົງຄາມ.
ແຜນຮັບມືໂຄວິດ-19 ດັ່ງກ່າວ ປະກອບມີການເລັ່ງໃຫ້ວັກຊີນປະຊາຊົນ, ເພີ່ມການກວດເຊື້ອແນວບຸກ ແລະ ບັງຄັບໃຫ້ຜູ້ທີ່ເດີນທາງເຂົ້າອາເມລິກາຕ້ອງສະແດງເອກະສານຢືນຢັນຜົນກວດໂຄວິດ-19 ເປັນລົບກ່ອນເດີນທາງ ແລະ ຕ້ອງກັກຕົວ 14 ວັນ ເມື່ອເດີນທາງມາເຖິງ. ນອກຈາກນີ້ ຈະມີການອອກກົດໝາຍສຸກເສີນເພື່ອເພີ່ມກຳລັງການຜະລິດອຸປະກອນທີ່ຈຳເປັນເຊັ່ນ: ຜ້າອັດປາກ-ດັງ.
ຂະນະທີ່ທ່ານ ໄບເດນ ຢືນຢັນວ່າ: ແຜນຮັບມືດັ່ງກ່າວ ເຊິ່ງມີເອກະສານຈຳນວນ 198 ໜ້າ ແລະ ເຜີຍແຜ່ທາງເວັບໄຊ WhiteHouse.gov ຈະຢຶດໝັ້ນຫລັກວິທະຍາສາດ ແລະ ຂໍ້ມູນຄວາມຈິງ ບໍ່ແມ່ນການເມືອງ.
ແຜນຮັບມືໂຄວິດ-19 ຂອງທ່ານ ໄບເດນ ຈະເລີ່ມຕົ້ນດ້ວຍໂຄງການສັກວັກຊີນປະຊາຊົນໃຫ້ໄດ້ຕາມເປົ້າໝາຍ 100 ລ້ານໂດສ ພາຍໃນ 100 ວັນທຳອິດ ຫລັງຮັບຕຳແໜ່ງ ເຊິ່ງຄວບຄຸມຈຳນວນປະຊາກອນ 50 ລ້ານຄົນ ທີ່ຕ້ອງສັກຄົນລະ 2 ໂດສ.
ຂະນະທີ່ທ່ານກ່າວວ່າ: ແຜນດຳເນີນງານທັງໝົດພັດທະນາໂດຍອ້າງອີງຂໍ້ມູນຈາກ ດຣ. ແອນໂທນີ ເຟົາຊີ ຜູ້ຊ່ຽວຊານພະຍາດຕິດເຊື້ອ ແລະ ຫົວໜ້າທີມທີ່ປຶກສາດ້ານໂຄວິດ-19 ຂອງທຳນຽບຂາວ ແລະ ທ່ານ ເຈບ ໄຊເອນ ຜູ້ປະສານງານພິເສດດ້ານໂຄວິດ-19 ຂອງທ່ານ ໄບເດນ ເຊິ່ງທ່ານ ໄບເດນ ກ່າວວ່າ: ຊາວອາເມລິກາຈະໄດ້ຮັບຂໍ້ມູນດ້ານໂຄວິດ-19 ຈາກ ດຣ. ເຟົາຊີ ເຊິ່ງເປັນຜູ້ຊ່ຽວຊານ ແລະ ນັກວິທະຍາສາດທີ່ແທ້ຈິງອີກ ຫລັງຈາກທ່ານຖືກຫລຸດບົດບາດລົງໃນຍຸກອະດີດປະທານາທິບໍດີ ໂດນັລ ທຣຳ.
ທັງນີ້, ທ່ານ ໄບເດນ ເຕືອນວ່າ: ສະຖານະການຈະຮ້າຍແຮງອີກກ່ອນຈະດີຂຶ້ນ, ພ້ອມຄາດວ່າຈຳນວນຜູ້ເສຍຊີວິດຈາກໂຄວິດ-19 ຢູ່ອາເມລິກາ ຈະເພີ່ມຂຶ້ນເຖິງ 500.000 ຄົນໃນເດືອນໜ້າ.
ເຖິງຢ່າງໃດກໍຕາມ, ເຖິງວ່າຄຳສັ່ງພິເສດຂອງປະທານາທິບໍດີອາເມລິກາຈະບໍ່ຕ້ອງຜ່ານການລົງຄະແນນຮັບຮອງຈາກສະພາຄອງເກຣດ, ແຕ່ງົບປະມານສ່ວນຫລາຍສຳລັບແຜນຮັບມືໂຄວິດ-19 ນັ້ນລວມຢູ່ໃນໂຄງການຟື້ນຟູເສດຖະກິດ ແລະ ຊ່ວຍເຫລືອຜູ້ໄດ້ຮັບຜົນກະທົບໂຄວິດ-19 ຈຳນວນ 1,9 ຕື້ໂດລາສະຫະລັດ ທີ່ທ່ານ ໄບເດນ ປະກາດເມື່ອອາທິດຜ່ານມາ.
ເຊິ່ງໝາຍຄວາມວ່າ: ທ່ານຍັງຈຳເປັນຕ້ອງໄດ້ຮັບການຮ່ວມມືຈາກສະພາຜູ້ແທນລາຊະດອນ ແລະ ວຸດທິສະພາອາເມລິກາ ເພື່ອໃຫ້ໂຄງການງົບປະມານດັ່ງກ່າວຜ່ານການຮັບຮອງຢ່າງລາບລື່ນ.
