ພ້ອມ​ກັນ​ອວ່າຍໜ້າ​ສູ່​ການ​ເລືອກ​ຕັ້ງ ສສຊ ​ແລະ ສສຂ

- 666 5 scaled - ພ້ອມ​ກັນ​ອວ່າຍໜ້າ​ສູ່​ການ​ເລືອກ​ຕັ້ງ ສສຊ ​ແລະ ສສຂ
- Untitled design - ພ້ອມ​ກັນ​ອວ່າຍໜ້າ​ສູ່​ການ​ເລືອກ​ຕັ້ງ ສສຊ ​ແລະ ສສຂ

ໂດຍ: ທິດ​ກໍ່າ

ກອງ​ປະຊຸມ​​ໃຫຍ່​ຜູ້​​ແທນ​ທົ່ວ​ປະ​ເທດ ຄັ້ງທີ XI ຂອງ​ພັກ​ປະຊາຊົນ​ປະຕິວັດ​ລາວ​ຫາ​ກໍ​ປິດ​ສາກ​ລົງ​ໃນ​ຕອນ​ແລງ​ຂອງ​ວັນ​ທີ 15 ມັງກອນ 2021 ຜ່ານ​ມາ​ນີ້​ເອງ. ຜ່ານ​ກອງ​ປະຊຸມ​ໃຫຍ່​ຂອງ​ພັກ​ຄັ້ງນີ້ ນອກຈາກ​ພວກ​ເຮົາ​ໄດ້​ພ້ອມ​ກັນ​ຮັບ​ຮູ້ ​ແລະ ​ໄດ້​ເຫັນ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງທີ XI ​ແລ້ວ, ຍັງ​ໄດ້​ເຂົ້າ​ໃຈ​ເຖິງ​ທິດ​ທາງ ​ແລະ ​ເປົ້າໝາຍ​ແຜນ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ​ທີ່​ພັກ​ໄດ້​ວາງ​ອອກ​ຢ່າງ​ຈະ​ແຈ້ງ​ຊັດ​ເຈນ ​ໂດຍ​ສະ​ເພາະ​ແມ່ນ​ນັບ​ແຕ່​ປີ 2021 ຫາ 2025. ສ່ວນ​ຜົນ​ຂອງ​ການ​ປ່ອນ​ບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງທີ XI ​ໃນ​ຕົວ​ຈິງ​ກໍ​ມີ​ເຖິງ 71 ສະຫາຍ, ຍິງ 12 ສະຫາຍ ​ແລະ ກຳມະການ​ສຳຮອງ​ສູນ​ກາງ​ພັກ 10 ສະຫາຍ, ຍິງ 2 ສະຫາຍ. ​ໃນ​ກອງ​ປະຊຸມ​ຄັ້ງປະຖົມ​ມະລຶກ​ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ສະ​ໄໝ​ທີ XI ​ເຊິ່ງ​ໄດ້​ເປີດ​ຂຶ້ນ​ໃນ​ຕອນ​ເຊົ້າຂອງ​ວັນ​ທີ 15 ມັງກອນ 2021 ​ໄດ້​ເລືອກ​ຕັ້ງ​ເອົາ​ກົມ​ການ​ເມືອງ​ສູນ​ກາງ​ພັກ​ຈຳນວນ 13 ສະຫາຍ, ຄະນະ​ເລຂາທິການ​ສູນ​ກາງ​ພັກ 9 ສະຫາຍ, ຄະນະ​ກວດກາ​ສູນ​ກາງ​ພັກ 6 ສະຫາຍ. ກອງ​ປະຊຸມ​ຍັງ​ໄດ້​ເປັນ​ເອກະສັນ​ເລືອກ​ເອົາ ສະຫາຍ ທອງ​ລຸນ ສີ​ສຸ​ລິດ ​ເປັນ​ເລຂາທິການ​ໃຫຍ່​ຂອງ​ພັກ​ປະຊາຊົນ​ປະຕິວັດ​ລາວ, ​ເລືອກ​ເອົາ​ສະຫາຍ ບຸນ​ທອງ ຈິດ​ມະນີ ​ເປັນ​ຜູ້​ປະຈຳການ​ຄະນະ​ເລຂາທິການ​ສູນ​ກາງ​ພັກ ​ແລະ ​ເລືອກ​ເອົາ ສະຫາຍ ຄຳ​ພັນ ພົມ​ມະ​ທັດ ​ເປັນ​ປະທານ​ຄະນະ​ກວດກາ​ສູນ​ກາງ​ພັກ. ນີ້​ຄື​ໝາກຜົນ​ອັນ​ໃຫຍ່​ຫລວງ​ໃນ​ການ​ຄັດ​ເລືອກ​ບຸກຄະລາ​ກອນ​ການ​ນຳ​ຂັ້ນສູງ​ສຸດ​ຂອງ​ພັກ​ທີ່​ຈະ​ເປັນ​ຜູ້ນຳ​ພາ​ຊີ້​ຂາດ​ຕໍ່​ໂຊກ​ຊະ​ຕາ​ກໍາ​ຂອງ​ປະ​ເທດ​ຊາດ​ໃນ​ສະພາວະ​ປັດຈຸບັນ ​ແລະ ອະນາຄົດ ​ໂດຍ​ສະ​ເພາະ​ແມ່ນ​ໄລຍະ 5 ປີ​ຂ້າງ​ໜ້າ (2021-2025).

​ແຕ່​ແນວ​ໃດ​ກໍ​ຕາມ, ນີ້​ແມ່ນ​ພາລະກິດ​ຂອງ​ພັກ​ທີ່​ຈະ​ນຳພາ​ຊາດ​ບ້ານ​ເມືອງ​ກ້າວ​ສູ່​ຍຸກ​ໃໝ່​ທັນ​ສະ​ໄໝ​ໃນ​ເງື່ອນ​ໄຂ​ທີ່​ປະ​ເທດ​ຊາດ, ພາກພື້ນ ​ແລະ ສາກົນ​ພວມ​ມີ​ການ​ປ່ຽນ​ແປງ​ໄປ​ຢ່າງ​ຄາດ​ເດົາ​ໄດ້​ຍາກ. ສ່ວນ​ພາລະກິດ​ຂອງ​ຊາດ, ຂອງ​ພັກ, ຂອງ​ລັດຖະບານ ​ແລະ ຂອງ​ສະພາ​ແຫ່ງ​ຊາດ​ນັ້ນ, ​ໃນ​ໄລຍະ​ອັນ​ໃກ້ໆ​ນີ້ ພວກ​ເຮົາ​ຍັງ​ມີ​ພາລະກິດ​ອັນ​ໃຫຍ່​ຫລວງ​ຂວາງ​ໜ້າ​ອີກ​ຕື່ມ ກໍ​ຄື​ການ​ເລືອກ​ຕັ້ງ​ເອົາ​ສະມາຊິກ​ສະພາ​ແຫ່ງ​ຊາດ​ຊຸດ​ທີ IX ​ແລະ ສະມາຊິກ​ສະພາ​ຂັ້ນ​ແຂວງ​ຊຸດ​ທີ II ​ເຊິ່ງຈະ​ມີ​ການ​ປ່ອນ​ບັດ​ເລືອກ​ຕັ້ງ​ໃນ​ວັນ​ທີ 21 ກຸມພາ 2021 ທີ່​ຈະ​ມາ​ເຖິງ​ໃນ​ມໍ່ໆ​ນີ້. ຕໍ່​ຈາກ​ນັ້ນ ກອງ​ປະຊຸມ​ຄັ້ງປະຖົມ​ມະລຶກ ຫລື​ວ່າ ກອງ​ປະຊຸມ​ສະ​ໄໝ​ທີ I ຂອງ​ສະພາ​ແຫ່ງ​ຊາດ​ຊຸດ​ທີ IX ກໍ​ຈະ​ໄດ້​ໄຂ​ຂຶ້ນຢ່າງ​ເປັນ​ທາງ​ການ​ໃນ​ວັນ​ທີ 22 ມີນາ 2021 ນີ້​ເອງ. ​ໃນ​ກອງ​ປະຊຸມ​ດັ່ງກ່າວ​ກໍ​ຈະ​ໄດ້​ຄົ້ນຄວ້າ​ຮັບຮອງ​ເອົາ​ຫລາຍ​ບັນຫາ​ທີ່​ພົວພັນ​ເຖິງ​ຊະ​ຕາ​ກຳ​ຂອງ​ຊາດ ​ເປັນຕົ້ນນອກຈາກ​ຮັບຮອງ​ເອົາ​ກົດໝາຍ​ຈຳນວນ​ໜຶ່ງ​ແລ້ວ ຍັງ​ມີ​ການ​ແຕ່ງຕັ້ງຮັບຮອງ​ເອົາ​ປະທານ​ສະພາ​ແຫ່ງ​ຊາດ, ກົງຈັກ​ສະພາ​ແຫ່ງ​ຊາດ, ​ແຕ່ງຕັ້ງຮັບຮອງ​ເອົາ​ປະມຸກ​ລັດ ອັນ​ໄດ້​ແກ່ ປະທານ​ປະ​ເທດ, ນາຍົກລັດຖະມົນຕີ ​ແລະ ບັນດາ​ກົງຈັກ​ບໍລິຫານ​ຂອງ​ລັດຖະບານ​ໃນ​ແຕ່​ລະ​ກະຊວງ.

ພາຍຫລັງ​ສຳ​ເລັດ​ກອງ​ປະຊຸມ​ສະພາ​ແລ້ວ, ຂັ້ນຕໍ່​ໄປ​ກໍ​ມີ​ແຕ່​ພ້ອມ​ກັນ​ອວ່າຍໜ້າ​ເຂົ້າສູ່​ພາລະກິດ​ຂອງ​ຊາດ​ຕາມ​ໜ້າ​ທີ່​ພາລະ​ບົດບາດ​ຂອງ​ແຕ່​ລະສະ​ຫາຍ, ​ແຕ່ລະ​ທ່ານ, ​ແຕ່​ລະ​ອົງການ ບໍ່​ວ່າ​ໃນ​ສາຍ​ພັກ ກໍ​ຄື​ສາຍ​ລັດ ​ເພື່ອ​ນຳພາ​ປະຊາຊົນ​ບັນດາ​ເຜົ່າ​ໃນ​ທົ່ວ​ປະ​ເທດ​ບຸກທະລຸ​ເປົ້າໝາຍ​ຍຸດ​ທະ​ສາດ​ແຜນ​ພັດທະນາ​ເສດຖະກິດ-ສັງຄົມ​ທີ່​ຄະນະ​ບໍລິຫານ​ງານ​ສູນ​ກາງ​ພັກ ຄັ້ງທີ XI ​ແລະ ຂອງ​ລັດຖະບານ​ຊຸດ​ທີ IX ​ໄດ້​ວາງ​ອອກ​ໃຫ້​ປາກົດ​ຜົນ​ເປັນ​ຈິງ​ທຸກ​ປະການ.

​ໄປ​ຄຽງ​ຄູ່​ກັນນັ້ນ, ​ໃນ​ເງື່ອນ​ໄຂ​ທີ່​ປະ​ເທດ​ຊາດ​ບ້ານ​ເມືອງ​ຂອງ​ພວກ​ເຮົາ​ພວມ​ເລັ່ງລັດ​ພັດທະນາ​ໃຫ້​ກ້າວ​ສູ່​ຄວາມ​ຈະ​ເລີ​ນຮຸ່ງ​ເຮືອງ ພວກ​ເຮົາ​ຍັງ​ຕ້ອງ​ໄດ້​ຜ່ານ​ຜ່າ​ກັບ​ອຸປະສັກ​ຫຍຸ້ງຍາກ​ທີ່​ຈະ​ມາ​ກີດຂວາງ​ກົດ​ໜ່ວງ​ໃນ​ຫລາຍ​ດ້ານ ​ເປັນຕົ້ນ​ໂຣຄາ​ພະຍາດ, ​ໂຣກລະບາດ ​ໂດຍ​ສະ​ເພາະ​ໃນ​ສະພາບ​ປັດຈຸບັນ​ແມ່ນ​ພະຍາດ​ໂຄ​ວິດ-19 ທີ່​ພວມ​ລະບາດ​ໄປ​ທົ່ວ​ໂລກ, ບັນຫາ​ໄພພິບັດ​ທາງ​ທຳ​ມະ​ຊາດ, ບັນຫາ​ການ​ສໍ້​ລາດ​ບັງ​ຫລວງ​ໃນ​ຖັນ​ແຖວ​ພະນັກງານ​ລັດ​ຍັງ​ໜັກໜ່ວງ, ການ​ຄ້າຂາຍ​ຢາ​ເສບ​ຕິດ​ທີ່​ຍັງ​ເປັນ​ຊຳ​ເຮື້ອ, ບັນຫາ​ຄົນ​ຕາຍ​ຍ້ອນ​ອຸປະຕິ​ເຫດ​ຕາມ​ທ້ອງ​ຖະໜົນ ​ແລະ ບັນຫາ​ປາກົດການ​ຫຍໍ້​ທໍ້​ອື່ນໆ ຄື​ສິ່ງ​ທີ່​ພວກ​ເຮົາ​ຈະ​ຕ້ອງ​ໄດ້​ພ້ອມ​ກັນ​ແກ້​ໃຫ້​ຫລຸດ​ໜ້ອຍ​ຖອຍ​ລົງ​ເທື່ອ​ລະ​ກ້າວ.

- Wave100S AD to Website 2020 0 - ພ້ອມ​ກັນ​ອວ່າຍໜ້າ​ສູ່​ການ​ເລືອກ​ຕັ້ງ ສສຊ ​ແລະ ສສຂ

​ເພາະສະນັ້ນ ຈຶ່ງ​ເຫັນ​ວ່າການ​ປ່ອນ​ບັດ​ເລືອກ​ຕັ້ງ​ເອົາ​ຜູ້​ແທນ​ປະຊາຊົນ​ເຂົ້າ​ໄປ​ແກ້​ໄຂ​ບັນຫາ​ຕ່າງໆ​ໃນ​ສະພາ​ຄັ້ງນີ້​ຍິ່ງ​ມີ​ຄວາມ​ສຳຄັນ ​ເຊິ່ງກ່ອນ​ອື່ນ​ໝົດ​ແມ່ນ​ຕ້ອງ​ເລືອກ​ເອົາ​ຄົນ​ຜູ້​ທີ່​ດີ​ມີ​ຄວາມ​ຮູ້, ຄວາມ​ສາມາດ, ມີ​ຄຸນສົມບັດ​ທັດສະນະ​ຖື​ຜົນ​ປະ​ໂຫຍດຂອງ​ຊາດ​ເໜືອກ​ວ່າ​ຜົນ​ປະ​ໂຫຍ​ດຂອງ​ຕົນ​ເອງ ສົມ​ກັບ​ວ່າ​ເປັນ​ຜູ້​ແທນ​ປະຊາຊົນ​ຢ່າງ​ແທ້​ຈິງ.

 

- WhatsApp Image 2020 05 27 at 5 - ພ້ອມ​ກັນ​ອວ່າຍໜ້າ​ສູ່​ການ​ເລືອກ​ຕັ້ງ ສສຊ ​ແລະ ສສຂ
error: Alert: ເນື້ອຫາຂ່າວມີລິຂະສິດ !!