ສະພາຜູ້ແທນປະຊາຊົນ ສະຫະລັດອາເມລິກາ ສົ່ງສຳນວນຄະດີ ຖອດຖອນ ທຣຳ ຂຶ້ນຫາ ລັດຖະສະພາ.

ສຳນັກຂ່າວ ຣອຍເຕີ ລາຍງານເມື່ອວັນທີ 26 ມັງກອນນີ້ວ່າ ສະມາຊິກຜູ້ແທນປະຊາຊົນ ພັກ ເດໂມແຄຣດ 9 ຄົນ ໃນນາມ ເປັນໂຈດ ໄດ້ສົ່ງຄຳກ່າວຟ້ອງໂທດ ທຣຳ ຂຶ້ນຫາ ລັດຖະສະພາໃນວັນທີ 25 ມັງກອນ ນີ້.

ເນື້ອໃນຄຳກ່າວຟ້ອງ ສຸມໃສ່ການມີຄຳເຫັນຂອງ ທຣຳ ຕໍ່ຜູ້ປະທ້ວງ ທີ່ມີລັກສະນະ ຍຸຍົງສົ່ງເສີມ ພາໃຫ້ກໍ່ເກີດການກໍ່ຈາລະຈົນ ໃນຫໍລັດຖະສະພາ ໃນວັນທີ 6 ມັງກອນທີ່ຜ່ານມາ. ເຮັດໃຫ້ມີຜູ້ເສຍຊີວິດ ແລະ ຫຼາຍສິບຄົນໄດ້ຮັບບາດເຈັບ.

ການມີຄຳເຫັນຕໍ່ຜູ້ປະທ້ວງນັ້ນ, ທຣຳ ຮຽກຮ້ອງໃຫ້ທຸກຄົນທີ່ສະໜັບສະໜູນຕົນເອງ ບຸກເຂົ້າໄປໃນຫໍລັດຖະສະພາ Capitol ເພື່ອສະແດງ ພະລັງແຮງ ຕໍ່ສູ້ຢ່າງອົງອາດກ້າແກ່ນ ກ່ວາເວລາໃດໝົດ ແລະ ຮຽກຮ້ອງໃຫ້ມີການຕໍ່ສູ້ຫຼາຍຮູບແບບ ທີ່ແຕກຕ່າງກັນ.

ເຖິງຢ່າງໃດກໍຕາມ, ບັນດານັກກົດໝາຍຂອງພັກ ຣີພັບຣີກັນ ໄດ້ອອກມາກ່າວປະນາມ ການກ່າວໂທດ ອະດີດປະທານາທິບໍດີ, ຍິ່ງໄປກວ່ານັ້ນ ມີບາງຄົນຍັງເອີ້ນນີ້ວ່າ ເປັນການກ່າວໂທກ ນອກກົດໝາຍ ທັງໆ ທີ່ ທຣຳ ກໍໄດ້ໝົດວາລະໄປແລ້ວ.