Johnson & Johnson ກຽມເຜີຍຜົນການທົດລອງວັກຊີນໂຄວິດ-19 ອາທິດໜ້າ ທົ່ວໂລກຕິດຕາມເປັນ “ຕົວພິກເກມ” ເພາະໃຊ້ວັກຊີນໂດສດຽວຕໍ່ຄົນ

- download 3 - Johnson & Johnson ກຽມເຜີຍຜົນການທົດລອງວັກຊີນໂຄວິດ-19 ອາທິດໜ້າ ທົ່ວໂລກຕິດຕາມເປັນ “ຕົວພິກເກມ” ເພາະໃຊ້ວັກຊີນໂດສດຽວຕໍ່ຄົນ
- Untitled design - Johnson & Johnson ກຽມເຜີຍຜົນການທົດລອງວັກຊີນໂຄວິດ-19 ອາທິດໜ້າ ທົ່ວໂລກຕິດຕາມເປັນ “ຕົວພິກເກມ” ເພາະໃຊ້ວັກຊີນໂດສດຽວຕໍ່ຄົນ

Johnson & Johnson ​ເປີດ​ເຜີຍ​ວ່າ: ບໍລິສັດ​ອາດ​ເປີດ​ເຜີຍ​ລາຍ​ງານ​ຜົນ​ການ​ທົດ​ລອງ​ທາງ​ຄລີ​ນິກ​ໄລຍະ​ທີ 3 ຂອງ​ວັກ​ຊີ​ນ​ໂຄ​ວິດ-19 ພາຍ​ໃນ​ອາທິດ​ໜ້າ ​ແລະ ຄາດ​ວ່າ​ຈະ​ສາມາດ​ສົ່ງ​ມອບ​ວັກ​ຊີ​ນຈຳນວນ 100 ລ້ານ​ໂດ​ສສຳລັບ​ນຳ​ໃຊ້​ຢູ່​ອາ​ເມ​ລິ​ກາ ພາຍ​ໃນ​ເດືອນ​ມິຖຸນາ​ນີ້ ຖ້າ​ໄດ້​ຮັບ​ການ​ອະນຸມັດ​ໂດຍ​ໜ່ວຍ​ງານ​ທີ່​ກ່ຽວຂ້ອງ​ແລ້ວ.

ທ່ານ ອາ​ເລັກ ກໍ​ສກີ ປະທານ ​ແລະ CEO ຂອງ Johnson & Johnson ກ່າວ​ວ່າ: ທ່ານ​ເບິ່ງ​ໃນ​ແງ່​ດີ​ກ່ຽວ​ກັບ​ຜົນ​ການ​ທົດ​ລອງ​ວັກ​ຊີ​ນ​ໃນ​ຄົນ​ທີ່​ມີ​ອາສາ​ສະໝັກ​ເຂົ້າຮ່ວມ 45.000 ຄົນ ​ໂດຍ​ລະບຸ​ວ່າ: “ພວກ​ເຮົາ​ຫວັງ​ວ່າ​ມັນ​ຈະ​ເປັນ​ຈຸດ​ເລີ່​ມຕົ້ນທີ່​ດີ​ສຳລັບ​ປະສິດທິພາບ ​ແລະ ຄວາມ​ປອດ​ໄພ​ທີ່​ພວກ​ເຮົາ​ຈະ​ໄດ້​ເຫັນ​ໃນ​ກຸ່ມ​ປະຊາກອນ​ທີ່​ໃຫຍ່​ຂຶ້ນ, ​ແຕ່​ແນ່ນອນ​ວ່າ: ພວກ​ເຮົາ​ຍັງ​ບໍ່​ຮູ້​ຫຍັງ​ແນ່ນອນ​ຈົນ​ກວ່າ​ພວກ​ເຮົາ​ຈະ​ໄດ້​ເຫັນ​ຜົນ​ການ​ທົດ​ລອງ​ຂັ້ນສຸດ​ທ້າຍ​ນີ້​ແລ້ວ”.

ທັງ​ນີ້ ຖ້າ​ອົງການ​ອາຫານ ​ແລະ ຢາ​ຂອງ​ອາ​ເມ​ລິ​ກາ (FDA) ອະນຸມັດ​ໃຫ້​ນຳ​ໃຊ້​ວັກ​ຊີ​ນ​ເປັນ​ກໍລະນີ​ສຸກ​ເສີນ​ແລ້ວ, ລັດຖະບານ​ອາ​ເມ​ລິ​ກາ​ອາດ​ມີ​ທາງ​ເລືອກ​ຫລາຍ​ຂຶ້ນ​ໃນ​ການ​ສັ່ງ​ຊື້ວັກ​ຊີ​ນ​ເພີ່ມ​ຕື່ມ ຈາກ​ທີ່​ເຄີຍ​ສັ່ງ​ໄປ 100 ລ້ານ​ໂດ​ສ. ຂະນະ​ທີ່​ຜູ້​ຜະລິດ​ວັກ​ຊີ​ນ​ລາຍ​ໃຫຍ່ຄື Pfizer ຂອງ​ອາ​ເມ​ລິ​ກາ ​ແລະ AstraZeneca ຂອງ​ອັງກິດ ຕ່າງ​ກຳລັງ​ປະສົບ​ບັນຫາ​ໃນ​ການຈັດ​ຫາ​ວັກ​ຊີ​ນ​ໃຫ້​ຫລາຍ​ປະ​ເທດ​ໄດ້​ບໍ່​ກົງ​ຕາມ​ເປົ້າໝາຍ.

ຂໍ້​ໄດ້​ປຽບ​ສຳຄັນ​ຂອງ​ວັກ​ຊີ​ນ Johnson & Johnson ທີ່​ອາດ​ເປັນ​ຕົວ​ພິ​ກ​ເກ​ມ​ໃນ​ສົງຄາມ​ຕໍ່ສູ້​​ໂຄ​ວິດ-19 ກໍ​ຄື ບໍລິສັດ​ໄດ້​ທົດ​ລອງ​ກັບ​ກຸ່ມ​ທົດ​ລອງ​ດ້ວຍ​ວັກ​ຊີ​ນພຽງ​ເຂັມ​ດຽວ ​ເຊິ່ງຖ້າ​ໄດ້ຜົນ ໝາຍ​ຄວາມ​ວ່າການ​ສັກ​ວັກ​ຊີ​ນຈະ​ງ່າຍ​ຂຶ້ນ ​ເພາະ​ໃຊ້​ພຽງ​ໂດ​ສດຽວ​ຕໍ່​ຄົນ. ຂະນະ​ທີ່​ວັກ​ຊີ​ນຂອງ​ບໍລິສັດ​ອື່ນໆ​ຕ້ອງ​ໃຊ້​ຢ່າງ​ໜ້ອຍ​ຄົນ​ລະ 2 ​ໂດ​ສ​ໃນ​ໄລຍະ​ເວລາ​ຫ່າງ​ກັນ​ຫລາຍ​ອາທິດ. ນອກຈາກ​ນີ້ ວັກ​ຊີ​ນຂອງ Johnson & Johnson ຍັງ​ສາມາດ​ເກັບ​ຮັກສາ​ໃນ​ຕູ້​​ເຢັນ​ອຸນຫະພູມ​ປົກກະຕິ. ຂະນະ​ທີ່​ວັກ​ຊີ​ນຂອງ Pfizer ​ແລະ Moderna ຕ້ອງ​ໃຊ້​ຕູ້​ແຊ່​ພິ​ເສດ ​ເຊິ່ງ​ເປັນອຸປະສັກ​ຕໍ່​ການ​ເກັບ​ຮັກສາ ​ແລະ ຂົນ​ສົ່ງ.

- Wave100S AD to Website 2020 0 - Johnson & Johnson ກຽມເຜີຍຜົນການທົດລອງວັກຊີນໂຄວິດ-19 ອາທິດໜ້າ ທົ່ວໂລກຕິດຕາມເປັນ “ຕົວພິກເກມ” ເພາະໃຊ້ວັກຊີນໂດສດຽວຕໍ່ຄົນ

ຂໍ້​ມູນ​ເບື້ອງຕົ້ນທີ່​ມີ​ການ​ເປີດ​ເຜີຍ​ກ່ອນ​ໜ້າ​ນີ້​ລະບຸ​ວ່າ: ວັກ​ຊີ​ນຂອງ Johnson & Johnson ​ໃຊ້​ເຕັກ​ໂນ​ໂລ​ຊີ Viral-Vector ຫລື ການ​ໃຊ້​ໄວຣັສທີ່​ເຮັດ​ໃຫ້​ອ່ອນ​ລົງ ​ແລະ ບໍ່​ເຮັດ​ໃຫ້​ເກີດ​ພະຍາດ ມາ​ຕັດ​ຕໍ່​ສານ​ພັນທຸ​ກຳ ​ເພື່ອ​ກະ​ຕຸ້ນ​ໃຫ້​ຮ່າງກາຍ​ສ້າງ​ພູມ​ຄຸ້ມ​ກັນ ​ເຊິ່ງ​ເປັນ​ເຕັກ​ໂນ​ໂລ​ຊີ​ແບບ​ດຽວ​ກັບ​ວັກ​ຊີ​ນຂອງ​ມະຫາວິທະຍາ​ໄລ​ອອກ​ຟອດ ​ແລະ AstraZeneca ລວມທັງ​ວັກ​ຊີ​ນ Sputnik V ຂອງຣັດ​ເຊຍ.

​ແລະ ຈາກ​ຂໍ້​ມູນ​ຊຸດ​ທຳ​ອິດ​ທີ່ Johnson & Johnson ​ເຜີຍ​ແຜ່​ໃນ​ເດືອນ​ກັນຍາ​ປີຜ່ານມາ ພົບ​ວ່າ: ວັກ​ຊີ​ນ​ໂດ​ສດຽວ​ຂອງ Johnson & Johnson ​ໃຫ້​ຜົນ​ໃນ​ການ​ກະ​ຕຸ້ນ​ພູມ​ຄຸ້ມ​ກັນ​ໄດ້​ຄື​ກັບ​ວັກ​ຊີ​ນ​ແບບ 2 ​ໂດ​ສ ຂອງ Pfizer-BioNTech ​ເຖິງ​ວ່າ​ວິທີ​ການ​ວັດ​ແທກ​ລະດັບ​ພູມ​ຄຸ້ມ​ກັນຈະ​ແຕກຕ່າງ​ກັນ ​ແລະ ບໍ່​ສາມາດ​ນຳ​ມາ​ປຽບທຽບ​ກັນ​ໂດຍ​ກົງ​ໄດ້, ​ແຕ່​ຂໍ້​ດີ​ທີ່​ເຫັນ​ຈະ​ແຈ້ງ​ຂອງ​ວັກ​ຊີ​ນຈາກ Johnson & Johnson ຄື​ການ​ຕອບ​ສະໜອງ​ຂອງ​ພູມ​ຄຸ້ມ​ກັນ​ທີ່​ຍັງ​ເຫັນ​ຜົນ​ດີ ​ແລະ ດີ​ຂຶ້ນອີກ​ຫລັງ​ຈາກ​ສັກ​ວັກຊີ​ນ​ໄປ​ແລ້ວ 71 ວັນ ​ເຊິ່ງຜົນ​ໄດ້​ຮັບ​ນີ້​ເກີດ​ຂຶ້ນຄື​ກັນ​ທັງ​ໃນ​ກຸ່ມ​ຜູ້​ອາຍຸ​ເກີນ 65 ປີ ​ແລະ ກຸ່ມ​ໄວ​ໜຸ່ມ​ອາຍຸ 18 ປີ​ຂຶ້ນ​ໄປ.

​ເຖິງ​ຢ່າງ​ໃດ​ກໍ​ຕາມ, ຍັງ​ບໍ່​ແນ່ນອນ​ວ່າ​ວັກ​ຊີ​ນ Johnson & Johnson ມີ​ປະສິດທິພາບ​ຕໍ່​ເຊື້ອ​ໂຄ​ວິດ-19 ສາຍ​ພັນ​ໃໝ່ ຫລື ບໍ່. ຂະນະ​ທີ່​ທົ່ວ​ໂລກ​ກຳລັງ​ກັງວົນ​ຕໍ່​ການ​ແຜ່​ລະບາດ​ຂອງ​ເຊື້ອ​ໂຄ​ວິດ-19 ສາຍ​ພັນ​ຈາກ​ອັງກິດ ​ແລະ ອາ​ຟຣິກາ​ໃຕ້. ຂະນະ​ທີ່​ຜູ້​ຜະລິດ​ເຕືອນ​ວ່າ: ປະສິດທິພາບ​ຂອງ​ວັກ​ຊີ​ນອາດ​ຫລຸດ​ລົງ, ​ແຕ່​ພວກ​ເຂົາ​ສາມາດ​ປັບປຸງ​ວັກ​ຊີ​ນ​ໂດຍ​ໃຊ້​ເວລາ​ບໍ່​ດົນ ​ເພື່ອ​ໃຫ້​ສາມາດ​ປ້ອງ​ກັນ​ເຊື້ອສາຍ​ພັນ​ໃໝ່​ໄດ້.

- WhatsApp Image 2020 05 27 at 5 - Johnson & Johnson ກຽມເຜີຍຜົນການທົດລອງວັກຊີນໂຄວິດ-19 ອາທິດໜ້າ ທົ່ວໂລກຕິດຕາມເປັນ “ຕົວພິກເກມ” ເພາະໃຊ້ວັກຊີນໂດສດຽວຕໍ່ຄົນ
error: Alert: ເນື້ອຫາຂ່າວມີລິຂະສິດ !!