ຍີ່ປຸ່ນໃຫ້ທຶນຊ່ວຍເຫລືອ 1,8 ລ້ານກວ່າໂດລາ ໃນວຽກງານເກັບກູ້ລະເບີດບໍ່ທັນແຕກ, ສຶກສາ, ທັນຕະແພດ ແລະ ການຝຶກອົບຮົມວິຊາຊີບໃນລາວ
ທ້າຍອາທິດຜ່ານມາ ທີ່ນະຄອນຫລວງວຽງຈັນ, ລັດຖະບານຍີ່ປຸ່ນໄດ້ເຊັນສັນຍາຊ່ວຍເຫລືອມູນຄ່າ 1,8 ລ້ານກວ່າໂດລາສະຫະລັດ ໃຫ້ອົງການຈັດຕັ້ງທີ່ບໍ່ຂຶ້ນກັບລັດຖະບານ (NGOs) ເພື່ອຈັດຕັ້ງປະຕິບັດ 5 ໂຄງການຄື: ໂຄງການເກັບກູ້ລະເບີດບໍ່ທັນແຕກ ຢູ່ແຂວງຊຽງຂວາງ, 2 ໂຄງການສຶກສາຢູ່ແຂວງສະຫວັນນະເຂດ ແລະ ວຽກງານ, ໂຄງການທັນຕະແພດ ຢູ່ນະຄອນຫລວງວຽງຈັນ, ແຂວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ແລະ ໂຄງການຝຶກອົບຮົມວິຊາຊີບ ຢູ່ນະຄອນຫລວງວຽງຈັນ ລະຫວ່າງ ທ່ານ ເຄອິຈິ ອິວາໂມໂຕະ ອັດຄະຣາຊະທູດຍີ່ປຸ່ນປະຈຳລາວ ແລະ ບັນດາຕົວແທນຈາກອົງການເກັບກູ້ລະເບີດ JMAS, ອົງການສຸພານິມິດສາກົນຍີ່ປຸ່ນ (World Vision Japan), ສະມາຄົມເດັກນ້ອຍລາວ (ALC), ອົງການຊ່ວຍເຫລືອສາກົນດ້ານການສຶກສາທັນຕະກຳ (OISDE) ແລະ ອົງການ IV-JAPAN.
ໃນພິທີ, ທ່ານອັກຄະຣາຊະທູດ ໄດ້ກ່າວຊື່ນຊົມຄວາມພະຍາຍາມຂອງບັນດາອົງການເຫລົ່ານີ້ທີ່ໄດ້ຕັ້ງໃຈເຮັດວຽກຍົກລະດັບຄຸນນະພາບການດຳລົງຊີວິດຂອງປະຊາຊົນໃນຂັ້ນຮາກຖານຂອງລາວ, ເຖິງວ່າຈະຢູ່ໃນວິກິດການແຜ່ລະບາດຂອງເຊື້ອພະຍາດໂຄວິດ-19 ກໍຕາມ, ລັດຖະບານຍີ່ປຸ່ນກໍໃຫ້ຄຳໝັ້ນສັນຍາວ່າຈະສະໜັບສະໜູນ ແລະ ສົ່ງເສີມວຽກງານຂອງບັນດາ NIGO ໃຫ້ດີທີ່ສຸດ.
