ອົງການກວດກາແຫ່ງລັດ ກວດພົບຄວາມເສຍຫາຍບໍ່ຕໍ່າກວ່າ 6.000 ຕື້ກີບ ຈາກການສໍ້ລາດບັງຫລວງ
ໃນວາລະກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ໃນວັນທີ 25 ມີນາ 2021ນີ້ ທ່ານ ຄຳພັນ ພົມມະທັດປະທານອົງການກວດກາແຫ່ງລັດ ໄດ້ລາຍງານຜົນສຳເລັດໃນວຽກງານໄຍະ 5 ປີຜ່ານມາໃຫ້ຮູ້ວ່າ: ອົງການກວດກາແຫ່ງລັດ ໄດ້ຕິດຕາມກວດກາການປະຕິບັດພາລະບົດບາດ ສິດ ແລະ ໜ້າທີ່, ການປະຕິບັດກົດ ໝາຍ, ຂໍ້ກໍານົດ, ຄໍາສັ່ງ, ການປະຕິບັດແຜນງົບປະມານ, ແຜນການລົງທຶນກໍ່ສ້າງພື້ນຖານໂຄງລ່າງ, ການຄຸ້ມຄອງ-ນຳໃຊ້ຊັບສິນຂອງລັດ, ສາມາດກວດກາໄດ້ທັງໝົດ 4.129 ເປົ້າໝາຍ, ໃນນັ້ນຕິດຕາມກວດກາປົກກະຕິ 1.435 ເປົ້າໝາຍ, ກວດກາຕາມຄຳສັ່ງ 1.014 ເປົ້າໝາຍ, ກວດກາໂຄງການລົງທຶນຂອງລັດເລີ່ມແຕ່ຫົວທີ 535 ເປົ້າໝາຍ ແລະ ກວດກາຕາມຜົນການກວດສອບ 1.145 ເປົ້າໝາຍ, ໄດ້ເກັບກໍາ ແລະ ໄລ່ລຽງມູນຄ່າການລົງທຶນຂອງລັດ ຈໍານວນ 4.601 ໂຄງການ.
ໃນນີ້, ກວດກາສໍາເລັດ 692 ໂຄງການ, ກວດເຫັນຜົນເສຍຫາຍ 5.689,12 ຕື້ກວ່າກີບ, 31,77 ລ້ານໂດລາສະຫະລັດ ແລະ 38,89 ລ້ານບາດ.
ພ້ອມນັ້ນ, ຍັງໄດ້ກວດກາການຈັດຕັ້ງປະຕິບັດຄໍາສັ່ງ ເລກທີ 15/ນຍ ພົບເຫັນຜູ້ລະເມີດກົດໝາຍ 1.119 ຄົນ, ໃນນີ້, ມີພະນັກງານລັດ 127 ຄົນ, ຜູ້ປະກອບການ 246 ຄົນ, ປະຊາຊົນ 746 ຄົນ, ໄດ້ຮັັບຄໍາຮ້ອງຄໍາສະເໜີ 4.817 ສະບັບ, ແກ້ໄຂ 1.524 ສະບັບ, ທັງໝົດນັ້ນ, ເປັນການປະ ກອບສ່ວນສຳຄັນໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ເຮັດໃຫ້ບັນດາປາກົດການຫຍໍ້ທໍ້ໃນກົງຈັກລັດ ໄດ້ຮັບການແກ້ໄຂໃຫ້ຫລຸດໜ້ອຍຖອຍລົງເທື່ອລະກ້າວ.
