u-money ສືບຕໍ່ເຊັນບົດບັນທຶກຄວາມເຂົ້າໃຈ ກັບ ທະນາຄານ ຫວຽດຕິນ ລາວ ຈໍາກັດ
ໃນຕອນບ່າຍວັນທີ 30 ມີນາ 2021 ທີ່ສໍານັກງານໃຫຍ່ ທະນາຄານ ຫວຽດຕິນ ລາວ ຈໍາກັດ ໄດ້ມີພິທີລົງນາມເຊັນບົດບັນທຶກຄວາມເຂົ້າໃຈ ວ່າດ້ວຍ “ການຮ່ວມມືເຊື່ອມຕໍ່ການຊຳລະຮ່ວມກັນ” ລະຫວ່າງ ບໍລິສັດ ສະຕາ ຟິນເທັກ ຈໍາກັດຜູ້ດຽວ (u-money) ແລະ ທະນາຄານ ຫວຽດຕິນ ລາວ ຈໍາກັດ (VietinBank), ຕາງໜ້າລົງນາມໂດຍ ທ່ານ ຫງວຽນ ເຕິດ ທິງ ຮອງຜູ້ອໍານວຍການໃຫຍ່ ທະນາຄານ ຫວຽດຕິນ ລາວ ຈໍາກັດ ແລະ ທ່ານ ເຈິນ ມິງ ດຶກ ຮອງອໍານວຍການ ບໍລິສັດ ສະຕາ ຟິນເທັກ ຈໍາກັດຜູ້ດຽວ, ໃຫ້ກຽດເຂົ້າຮ່ວມເປັນປະທານໂດຍ ທ່ານ ສຸລິສັກ ທໍານຸວົງ ຫົວໜ້າກົມຄຸ້ມຄອງລະບົບຊໍາລະສະສາງ, ທ່ານ ໄຂ່ເເກ້ວ ຫຼວງສີວິໄລ ຫົວໜ້າກົມເຕັກໂນໂລຊີຂໍ້ມູນຂ່າວສານ ເເລະ ທ່ານ ນາງ ສົມມະໄລ ວົງຄໍາຊາວ ຫົວໜ້າພະແນກກວດກາກົມຄຸ້ມຄອງທະນາຄານທຸລະກິດ ຈາກທະນາຄານແຫ່ງ ສປປ ລາວ ພ້ອມດ້ວຍຄະນະຜູ້ບໍລິຫານ, ຄະນະພະແນກ, ຄະນະສູນບໍລິສັດ ສະຕາຟີນເທັກ , ບໍລິສັດ ສະຕາໂທລະຄົມ ແລະ ທະນາຄານ ຫວຽດຕິນ ລາວ ຈໍາກັດ.
ຈຸດປະສົງຂອງການເຊັນບົດບັນທຶກຄວາມເຂົ້າໃຈໃນຄັ້ງນີ້ ເພື່ອຄົ້ນຄວ້າເຊື່ອມຕໍ່ການຊຳລະຮ່ວມກັນເພື່ອເປີດກວ້າງໃຫ້ປະຊາຊົນສາມາດເຂົ້າເຖິງບໍລິການການເງິນ- ານທະນາຄານໃຫ້ສະດວກ, ປອດໄພ, ວ່ອງໄວຍິ່ງຂຶ້ນ ໂດຍສະເພາະລູກຄ້າທີ່ມີບັນຊີກະເປົາເງິນອີເລັກໂຕຼນິກຢູມັນນີ (u-money) ສາມາດໂອນເງິນຈາກບັນຊີໂດຍກົງ, ຖອນເງິນຢູ່ບັນດາຕູ້ ATM, ຊໍາລະຄ່າບໍລິການຕ່າງໆ ໂດຍຜ່ານບັນຊີທະນາຄານ ຫວຽດຕິນ ລາວ (VietinBank) ໄດ້ ແລະ ໃນທາງກັບກັນ ລູກຄ້າທີ່ມີບັນຊີທະນາຄານ ຫວຽດຕິນລາວ (VietinBank) ກໍສາມາດໂອນເງິນເຂົ້າບັນຊີກະເປົາເງິນອີເລັກໂຕຼນິກ u-money ສາມາດຖອນ-ໂອນເງິນໄດ້ທຸກຈຸດຕົວແທນບໍລິການຂອງຢູມັນນີ ກວ່າ 10.000 ຮ້ານຕົວແທນທົ່ວປະເທດ ໄດ້ຢ່າງງ່າຍດາຍ, ວ່ອງໄວ, ປອດໄພ ເຊິ່ງຈະສະໜອງບໍລິການດັ່ງກ່າວໃນໄວໆນີ້.
ການເຊັນບົດບັນທຶກຄວາມເຂົ້າໃຈໃນຄັ້ງນີ້ແມ່ນເພື່ອຄົົ້ນຄວ້າ ແລະ ພັດທະນາການຮ່ວມມື ເພື່ອການຮ່ວມມືເຊື່ອມຕໍ່ການຊໍາລະຮ່ວມກັນ ເພື່ອເຮັດໃຫ້ສາມາດຮອງຮັບການໂອນເງິນຈາກບັນຊີຜູ້ໃຊ້ແອັບ (u-money) ຫາບັນຊີລູກຄ້າຂອງທະນາຄານ ຫວຽດຕິນ ລາວ ຈໍາກັດ, ທັງນີ້ກໍເພື່ອເປັນການເປີດກວ້າງການເຂົ້າເຖິງການບໍລິການດ້ານການເງິນ, ການທະນາຄານ ເເລະ ກະເປົາເງິນອີເລັກໂຕຼນິກໃຫ້ສະດວກ ແລະ ເຂົ້າເຖິງທຸກພື້ນທີ່ໃນຂອບເຂດທົ່ວປະເທດ ເປັນຕົ້ນແມ່ນເຂດຫ່າງໄກສອກຫຼີກ ເນື່ອງຈາກລູກຄ້າທີ່ມີບັນຊີກະເປົາເງິນອີເລັກໂຕຼນິກ (u-money) ນຳໃຊ້ເທິງເຄືອຂ່າຍສັນຍານໂທລະສັບໂດຍບໍ່ຈຳເປັນຕ້ອງນຳໃຊ້ອິນເຕີເນັດ ກໍສາມາດໂອນເງິນເຂົ້າບັນຊີຂອງທະນາຄານຄູ່ຮ່ວມງານໄດ້. ນອກນັ້ນ ທະນາຄານ ຫວຽດຕິນ ລາວ ຈໍາກັດ ກໍສາມາດໂອນເງິນເຂົ້າບັນຊີກະເປົາເງິນອີເລັກໂຕຼນິ (u-money) ໄດ້ເຊັ່ນດຽວກັນ ເຊິ່ງເປັນການອໍານວຍຄວາມສະດວກສະບາຍໃຫ້ກັບບັນດາລູກຄ້າໃນການຊໍາລະສະສາງ ແລະ ເຮັດທຸລະກຳທາງການເງິນຕ່າງໆ ໂດຍສະເພາະແມ່ນການໂອນເງິນ, ການຊຳລະຄ່າບໍລິການຕ່າງໆ ໄດ້ຢ່າງງ່າຍດາຍ ແລະ ວ່ອງໄວຍິ່ງຂຶ້ນ. ປັດຈຸບັນ ຢູມັນນີ ກໍໄດ້ເຊື່ອມຕໍ່ສຳເລັດກັບບັນດາທະນາກຄານທຸລະກິດໃນລາວເຊັ່ນ: ທະນາຄານການຄ້າ ຕ່າງປະເທດລາວ, ທະນາຄານ ລາວ-ຫວຽດ, ທະນາຄານ ມາຣູຮານ ເຈແປນລາວ, ທະນາຄານ JDB, ທະນາຄານ MB Bank.
ໃນອະນາຄົດທີ່ຈະມາເຖິງນີ້ ບໍລິສັດ ສະຕາຟີນເທັກ ພາຍໃຕ້ສະໂລແກນ “ຢູມັນນີ ທາງເລືອກ ທີ່ດີກວ່າ” ຈະສືບຕໍ່ຮ່ວມມືກັບບັນດາທະນາຄານ ແລະ ບັນດາສະຖາບັນການເງິນ ເພື່ອຄົ້ນຄວ້າຜະລິດຕະພັນໃໝ່ໃຫ້ແທດເໝາະກັບຍຸກແຫ່ງການຫັນເປັນດີຈີຕອລ ເພື່ອນຳເອົາຜົນປະໂຫຍດສູງສຸດສະໜອງແກ່ປະປະຊາຊົນ ຄຽງຄູ່ໃຫ້ການພັດທະນາເສດຖະກິດສັງຄົມ ໂດຍສືບຕໍ່ພັດທະນາບໍລິການຂອງບໍລິສັດ ເພື່ອເປັນສ່ວນໜຶ່ງສ້າງໃຫ້ການນຳໃຊ້ບໍລິການຮູບແບບການຊຳລະທົດແທນການນໍາໃຊ້ເງິນສົດໃຫ້ມີບົດບາດຫຼາຍຂຶ້ນ.
