ສປປ ລາວ ເລີ່ມໃຫ້ບໍລິການສັກວັກຊີນກັນພະຍາດໂຄວິດ-19 ຈາກໂຄງການຮ່ວມມື (COVAX Facility)
ໃນວັນທີ 2-3 ເມສາ, ລາວເຮົາໄດ້ເລີ່ມຕົ້ນໃຫ້ບໍລິການສັກວັກຊີນ ກັນພະຍາດໂຄວິດ-19 ທີ່ໄດ້ຮັບຈາກໂຄງການ ການຮ່ວມມືເພື່ອວັກຊີນ ກັນພະຍາດ ໂຄວິດ-19 (COVAX Facility). ຂຶ້ນທີ່ ໂຮງໝໍມິດຕະພາບ 150 ຕຽງ, ໃນນະຄອນຫລວງວຽງຈັນ, ຊຶ່ງສະເພາະສອງມື້, ຈະສຸມໃສ່ກຸ່ມຄົນທີ່ມີ ຄວາມສ່ຽງສູງ ທີ່ສຸດ ຕໍ່ການຕິດເຊື້ອພະຍາດໂຄວິດ-19 ແລະຜູ້ທີ່ມີແນວໂນ້ມຈະເກີດອາການຮຸນແຮງ ຈາກການຕິດເຊື້ອຈຳນວນທັງໝົດປະມານ4000ຄົນ.
ວັກຊີນຈໍານວນ 132.000 ໂດສ ຫຼົ່ານີ້ເເມ່ນໄດ້ນຳເຂົ້າມາ ສປປ ລາວ ໃນວັນທີ່ 20 ມີນາ ຜ່ານໂຄງການ COVAX Facility,ໂດຍການຮ່ວມມືກັນລະຫວ່າງ ອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ອົງການກາວີ (Gavi), ອົງການຢູນິເຊັບ (UNICEF) ແລະ ອົງການອະນາໄມໂລກ (WHO), ເປັນວັກຊີນ AstraZeneca/Oxford ທີ່ຜະລິດໂດຍສະຖາບັນ Serum ຂອງອິນເດຍ (Serum Institute of India). ຊຸດນີ້ແມ່ນຊຸດທຳອິດ ຂອງຈໍານວນທັງໝົດ480.000 ໂດສ ທີ່ຈະໄດ້ຈັດສົ່ງໃຫ້ ສປປລາວ ໃນປີນີ້ ໂດຍໂຄງ ການ COVAX Facility ເພື່ອເປົ້າໝາຍ ສະໜອງຈຳນວນວັກຊີນ ໃຫ້ພຽງພໍ ຢ່າງໜ້ອຍ 20% ຂອງປະຊາກອນໃນປີນີ້, ຊຶ່ງຈະໄດ້ຖືກນໍາໃຊ້ໃນໂຮງໝໍ 7 ແຫ່ງໃນ ນະຄອນຫລວງວຽງຈັນແລະແຂວງຕ່າງໆ.
ທ່ານ ດຣ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ໄດ້ມີຄຳເຫັນໃນໂອກາດເຂົ້າຮ່ວມຂະບວນການສັກວັກຊິນໃນດັ່ງກ່າວວ່າ: “ການໃຫ້ບໍລິການສັກວັກຊີນກັນພະຍາດໂຄວິດ-19 ໂດຍນໍາໃຊ້ ວັກຊີນ AstraZeneca/Oxford ຊຸດທຳອິດຈາກໂຄງການ COVAX Facility ໃນຄັ້ງນີ້ເປັນບາດກ້າວອັນສຳຄັນສຳລັບ ລາວ ເຮົາໃນເປົ້າໝາຍເພື່ອຈະ ຢຸດຕິການເເຜ່ ລະບາດຂອງພະຍາດໂຄວິດ-19.” ດັ່ງນັ້ນ, ພວກເຮົາທູກຄົນ ຕ້ອງຮ່ວມມືຮ່ວມໃຈກັນ. ການສັກວັກຊີນໃຫ້ກຸ່ມ ທີ່ມີຄວາມ ສ່ຽງສູງທີ່ສຸດ ເເມ່ນມີຄວາມສຳຄັນເປັນຢ່າງຍິ່ງ ເພື່ອຊ່ວຍປົກປ້ອງ ຊຸມຊົນ ເຮົາຈາກ ໂຄວິດ-19.”
ຕາມແຜນປະຕິບັດການສັກວັກຊີນກັນພະຍາດໂຄວິດ-19 ແຫ່ງຊາດ ສຳລັບກຸ່ມ ບູລິມະສິດ ໃນສປປ ລາວ ເເມ່ນ ກຸ່ມຄົນທີ່ມີຄວາມສ່ຽງສູງ ທີ່ສຸດ ຕໍ່ການຕິດເຊື້ອພະຍາດໂຄວິດ-19 ແລະຜູ້ທີ່ມີແນວໂນ້ມທີ່ຈະເກີດ ອາການຮຸນແຮງ ຈາກການຕິດເຊື້ອ. ປະກອບມີບຸກຄະລາກອນທາງການແພດ, ຜູ້ທີ່ມີອາຍຸຫຼາຍກວ່າ 60 ປີ ແລະ ຄົນທີ່ເປັນພະຍາດຊໍ້າເຮື້ອ.ລວມທັງ ບຸກຄະລາກອນທີ່ມີຄວາມສ່ຽງ ຕໍ່ການ ຕິດເຊື້ອພະຍາດໂຄວິດ-19 ເຊັ່ນ ບຸກຄະລາກອນທີ່ເຮັດວຽກ ຢູ່ເຂດສູນ ຈໍາກັດບໍລິເວນເເລະ ພະນັກງານການທູດ.
ທ່ານ Mark Jacobs, ຜູ້ຕາງໜ້າອົງການອະນາໄມໂລກ, ກ່າວວ່າ “ບໍ່ມີປະເທດໃດທີ່ຈະປອດໄພຈາກ ໂຄວິດ-19 ຈົນກວ່າທຸກໆປະເທດ ຈະໄດ້ຮັບການ ປ້ອງກັນຈາກວັກຊີນ,ຊຶ່ງມັນປຽບເຫມືອນກະແຈອັນສໍາຄັນທີ່ຈະຊ່ວຍພວກເຮົາບັນລຸເປົ້າໝາຍນີ້. ຊຶ່ງວັກຊີນດັ່ງກ່າວນີ້ ແມ່ນໄດ້ຮັບການກວດສອບຢ່າງລະອຽດຮອບຄອບໂດຍ ອົງການອະນາໄມໂລກ ແລະ ໄດ້ຖືກປະເມີນວ່າມີຄຸນນະພາບ, ປອດໄພ ແລະ ມີປະສິທິຜົນ.” ທ່ານຍັງໄດ້ກ່າວຕື່ມອີກວ່າ “ຂ້າພະເຈົ້າ ຂໍສະແດງຄວາມຍິນດີກັບລັດຖະບານ ສປປ ລາວ ສໍາລັບການຈັດກຽມການໃຫ້ບໍລິການການສັກວັກຊີນໃນຄັ້ງນີ້ ຢ່າງມີປະສິດທິພາບ ແລະ ວ່ອງໄວ, ພາຍໃນເວລາອັນບໍ່ດົນຫລັງຈາກທີ່ໄດ້ຮັບການຈັດສົ່ງວັກຊີນໂຄວິດ-19 ຈາກ COVAX Facility.”
