ອາເມລິກາໄຟຂຽວຜູ້ໄດ້ຮັບວັກຊີນປ້ອງກັນໂຄວິດ-19 ຄົບໂດສ ເດີນທາງແບບບໍ່ຕ້ອງກວດພະຍາດ-ກັກຕົວ
ວັນທີ 2 ເມສາ, ສູນຄວບຄຸມ ແລະ ປ້ອງກັນພະຍາດແຫ່ງອາເມລິກາ (CDC) ປະກາດປັບປຸງແນວທາງປະຕິບັດດ້ານການເດີນທາງສຳລັບຜູ້ທີ່ໄດ້ຮັບວັກຊີນປ້ອງກັນພະຍາດໂຄວິດ-19 ຄົບໂດສແລ້ວ ໂດຍຊີ້ວ່າ: ຄົນກຸ່ມນີ້ສາມາດເດີນທາງທ່ອງທ່ຽວແບບອິດສະຫລະໄດ້ ເນື່ອງຈາກມີຄວາມສ່ຽງຕໍ່າ.
CDC ລະບຸວ່າ: ຜູ້ທີ່ໄດ້ຮັບວັກຊີນຄົບຖ້ວນສາມາດເດີນທາງພາຍໃນອາເມລິກາ ໂດຍບໍ່ຈຳເປັນຕ້ອງເຂົ້າຮັບການກວດພະຍາດໂຄວິດ-19 ຫລື ກັກຕົວ ພາຍຫລັງການເດີນທາງ ຕາບໃດທີ່ພວກເຂົາຍັງປະຕິບັດຕາມມາດຕະການປ້ອງກັນຂະນະເດີນທາງເຊັ່ນ: ໃສ່ຜ້າປິດປາກ-ດັງ, ຫລີກລ່ຽງຝູງຊົນ, ເວັ້ນໄລຍະຫ່າງທາງສັງຄົມ ແລະ ລ້າງມືສະໝໍ່າສະເໝີ.
ອີກອັນໜຶ່ງ, ຜູ້ທີ່ໄດ້ຮັບວັກຊີນປ້ອງກັນພະຍາດໂຄວິດ-19 ຄົບຖ້ວນ ໝາຍເຖິງຜູ້ທີ່ໄດ້ຮັບວັກຊີນຄົບຈຳນວນໂດສທີ່ກຳນົດແລ້ວ 2 ອາທິດຫລັງຈາກໄດ້ຮັບວັກຊີນໃນປະລິມານທີ່ແນະນຳຄັ້ງສຸດທ້າຍ.
ສຳລັບການເດີນທາງລະຫວ່າງປະເທດ ຜູ້ທີ່ໄດ້ຮັບວັກຊີນຄົບຖ້ວນບໍ່ຈຳເປັນຕ້ອງເຂົ້າຮັບການກວດພະຍາດໂຄວິດ-19 ກ່ອນການເດີນທາງ, ຍົກເວັ້ນແຕ່ປະເທດປາຍທາງຈະກຳນົດໃຫ້ກວດ ແລະ ບໍ່ຈຳເປັນຕ້ອງກັກຕົວຫລັງເດີນທາງກັບມາອາເມລິກາ, ແຕ່ພວກເຂົາຄວນມີຜົນກວດພະຍາດເປັນລົບກ່ອນຂຶ້ນເຮືອບິນ ແລະ ຈຳເປັນຕ້ອງເຂົ້າຮັບການກວດພະຍາດອີກໃນໄລຍະເວລາ 3-5 ວັນຫລັງກັບມາເຖິງ.
ທັງນີ້, ຂໍ້ມູນຈາກ CDC ຊີ້ໃຫ້ເຫັນວ່າ: ທ່າອ່ຽງຂອງການລະບາດໃຫຍ່ກຳລັງປ່ຽນໄປໃນອາເມລິກາ ເມື່ອບໍ່ດົນມານີ້ ເນື່ອງຈາກຈຳນວນຜູ້ຕິດເຊື້ອເພີ່ມຂຶ້ນໃນໄລຍະ 12 ວັນຜ່ານມາ ໂດຍປັດຈຸບັນເສັ້ນຄ່າສະເລ່ຍເຄື່ອນທີ່ 7 ວັນຂອງຜູ້ຕິດເຊື້ອໃໝ່ຕໍ່ວັນມີປະມານ 62.000 ຄົນ ເພີ່ມຂຶ້ນ 8,4% ເມື່ອທຽບໃສ່ 7 ວັນກ່ອນໜ້າ.
ອ້າງອີງ: ສຳນັກຂ່າວຊິນຮົວ
