ອິດສະລາແອນຍົກເລີກຂໍ້ບັງຄັບໃສ່ຜ້າປິດປາກໃນການຝຶກທະຫານ ເຫດຜູ້ຕິດເຊື້ອໂຄວິດ-19 ໃນທະຫານຫລຸດລົງ
ວັນທີ 4 ເມສາ, ກະຊວງສາທາລະນະສຸກຂອງອິດສະລາແອນ ປະກາດຍົກເລີກຂໍ້ບັງຄັບໃສ່ຜ້າປິດປາກໃນບາງໜ່ວຍທະຫານຂອງອິດສະລາແອນເຊັ່ນ: ໜ່ວຍຝຶກຊ້ອມ ແລະ ໜ່ວຍສູ້ຮົບ.
ການດຳເນີນດັ່ງກ່າວເປັນຜົນຈາກຈຳນວນຜູ້ຕິດເຊື້ອໂຄວິດ-19 ໃນທະຫານຫລຸດລົງຢ່າງວ່ອງໄວຈົນເຫລືອພຽງ 32 ຄົນ ເຊິ່ງຖືວ່າຕໍ່າສຸດນັບແຕ່ວັນທີ 17 ມິຖຸນາ 2020 ແລະ ເປັນຜົນຈາກຄຳຮ້ອງຂອງກອງກຳລັງປ້ອງກັນອິດສະລາແອນ (IDF).
ການຍົກເລີກດັ່ງກ່າວມີຜົນບັງຄັບໃຊ້ເປັນເວລາ 3 ເດືອນ ເຮັດໃຫ້ຈະບໍ່ມີຂໍ້ບັງຄັບໃສ່ຜ້າປິດປາກລະຫວ່າງການຝຶກ ແລະ ກິດຈະກຳໃນສະຖານທີ່ເປີດ ພາຍໃຕ້ເງື່ອນໄຂວ່າ: ທະຫານທີ່ເຂົ້າຮ່ວມຢ່າງໜ້ອຍ 90% ຕ້ອງຜ່ານການສັກວັກຊີນປ້ອງກັນ ຫລື ເຊົາຈາກໂຄວິດ-19 ແລ້ວ.
ກະຊວງສາທາລະນະສຸກ ລະບຸວ່າ: ກອງກຳລັງທະຫານຈະຕິດຕາມອາການເຈັບເປັນໃນໜ່ວຍທະຫານ ແລະ ລາຍງານຕໍ່ກະຊວງອາທິດລະ 1 ຄັ້ງ ຍົກເວັ້ນແຕ່ຈະມີການລະບາດຂອງໂຄວິດ-19 ທີ່ຕ້ອງລາຍງານທັນທີ. ພ້ອມກ່າວວ່າ: ບໍ່ມີການປ່ຽນແປງມາດຕະການທີ່ກ່ຽວຂ້ອງກັບສາທາລະນະ ເຊິ່ງກຳນົດໃຫ້ໃສ່ຜ້າປິດປາກຕໍ່ໄປຈົນກວ່າຈະມີປະກາດເພີ່ມຕື່ມ.
ອ້າງອີງ: ສຳນັກຂ່າວຊິນຮົວ
