ສະຫລອງ​ປີ​ໃໝ່​ບົນ​ຈິດ​ໃຈ​ເບີກບານ​ສະຫງົບ​ຈົບງາມ

- img laophotomag4 2013may - ສະຫລອງ​ປີ​ໃໝ່​ບົນ​ຈິດ​ໃຈ​ເບີກບານ​ສະຫງົບ​ຈົບງາມ
- Untitled design - ສະຫລອງ​ປີ​ໃໝ່​ບົນ​ຈິດ​ໃຈ​ເບີກບານ​ສະຫງົບ​ຈົບງາມ

ໂດຍ: ທິດ​ກໍ່າ

ປີ​ເກົ່າ ພສ 2563 ​ໄດ້​ຜ່ານ​ພົ້ນ​ໄປ ປີ​ໃໝ່ ພສ 2564 ​ໄດ້​ໝູນວຽນ​ມາ​ບັນຈົບ​ຄົບຮອບ​ຕາມ​ກົດ​ເກນ​ວັດຕະ​ຈັກ​ຂອງ​ໂລກ. ປີ​ນີ້ ອີງ​ຕາມ​ໂຫລາ​ສາດ ​ແລະ ປະຕິທິນ​ວັນ​ສັງຂານ​ລ່ວງ​ແມ່ນມື້ວັນ​ພຸດ (​ມື້​ເຕົ່າ​ສີ) ຂຶ້ນ 3 ຄໍ່າ​ເດືອນ 6 ພສ 2563 ກົງ​ກັບ​ວັນ​ທີ 14 ​ເມສາ 2021 ​ເວລາ 3 ​ໂມງ 39 ນາທີ 36 ວິນາທີ, ມື້ສັງຂານ​ຂຶ້ນ​ແມ່ນ​ວັນ​ສຸກ (ມື້ກາບສະ​ງ້າ) ຂຶ້ນ 5 ຄໍ່າ​ເດືອນ 6 ກົງ​ກັບ​ວັນ​ທີ 16 ​ເມສາ 2021 ​ເວລາ 7 ​ໂມງ 37 ນາທີ 12 ວິນາທີ ປ່ຽນ​ວັນ​ຖະ​ເຫລີ​ງສົກ​ປີ​ໃໝ່​ລາວ 2564. ປີ​ນີ້​ຖື​ວ່າ​ເປັນ​ປີ 8 ສອງ​ຫົນ, ນາງ​ສັງຂານ​ຊື່ວ່າ: ນາງ ມົນ​ທາ​ເທວີ ​ເປັນ​ລູກ​ຜູ້​ທີ 4 ຂອງ​ພະຍາ​ກະບິນລະ​ພົມ ພະຫັດ​ຂວາ​ຖື​ຫອກ, ພະຫັດ​ຊ້າຍ​ຖື​ໄມ້​ເທົ້າ, ສະ​ເຫວີຍ​ນົມ​ເນີຍ​ເປັນ​ຜັກ​ສາ​ຫານ. ​ເກນ​ພິລຸນ​ນະ​ສາດ​ມີນາ​ກຫລິ້ນນ້ຳ 6 ​ໂຕ​ບັນດາ​ໃຫ້​ມີ​ຝົນຕົກ 400 ຫ່າ, ຕົກ​ໃນ​ຈັກກະວານ 160 ຫ່າ, ​ໃນ​ປ່າ​ຫິມະພານ 120 ຫ່າ, ຕົກ​ໃນ​ມະຫາ​ສະໝຸດ 80 ຫ່າ ​ແລະ ຕົກ​ໃນ​ໂລກ​ມະນຸດ​ເຮົາ 40 ຫ່າ. ຈະ​ມີ​ຝົນຕົກ​ດີ​ທຸກ​ແຫ່ງ ນາ​ລຸ່ມ​ນາ​ໂນນ​ກໍ​ຈະ​ງອກ​ງາມ​ດີ, ​ແຕ່​ວ່າ​ຈະ​ມີ​ບົ້ງ, ມີ​ດ້ວງ, ມີ​ແມງ​ໄມ້​ມາ​ລົບ​ກວນ ຖ້າ​ບໍ່​ເອົາ​ໃຈ​ໃສ່​ບົວລະບັດ​ຈະ​ເສຍ​ໄປ​ເຄິ່ງໜຶ່ງ ​ໄດ້​ຮັບ​ຜົນ​ເຄິ່ງໜຶ່ງ ວ່າ​ຊັ້ນ !. ນີ້​ຄື​ໂຫລາ​ສາດ​ທີ່​ໄດ້​ຄິດ​ໄລ່​ກະ​ຕວງ​ຕາມ​ປີ​ເດືອນ​ຂອງ​ເຖົ້າ​ແກ່​ຄູບາ​ອາຈານ​ທີ່​ເຄີຍ​ໂຫລາ​ສາດ​ມາ​ແຕ່​ບູຮານ​ນະ​ການ, ສ່ວນວ່າ​ໃຜ​ຈະ​ເຊື່ອ ຫລື ບໍ່​ເຊື່ອນັ້ນ ມັນ​ກໍ​ແມ່ນ​ເລື່ອງ​ຂອງ​ບຸກຄົນ ​ແລະ ວິຈາລະ​ນາ​ຍານ​ເອົາ​ເອງ.

- Wave100S AD to Website 2020 0 - ສະຫລອງ​ປີ​ໃໝ່​ບົນ​ຈິດ​ໃຈ​ເບີກບານ​ສະຫງົບ​ຈົບງາມ

​ແຕ່​ວ່າ​ແນວ​ໃດ​ກໍ​ຕາມ, ກ່ຽວ​ກັບ​ການສະ​ເຫລີ​ມສະຫລອງ​ບຸນປີ​ໃໝ່​ລາວ​ເຮົາ​ປີ​ນີ້ ທາງ​ການ​ເພິ່ນກໍ​ມີ​​ແຈ້ງ​ການ​ມາ​ຢ່າງ​ຄັກ​ແນ່ ​ໂດຍ​ມີ​ຈຸດປະສົງ​ໃຫ້​ປະຊາຊົນ​ລາວ​ບັນດາ​ເຜົ່າ ກໍ​ຄື​ທົ່ວ​ສັງຄົມ​ໃນ​ທົ່ວ​ປະ​ເທດ​ໄດ້​ຮັບ​ຊາບ ​ແລະ ​ເຂົ້າ​ໃຈ ທັງ​ພ້ອມ​ກັນ​ປະຕິບັດ​ຢ່າງ​ເປັນ​ເອກະ​ພາບ ​ແລະ ທົ່ວ​ເຖິງ​ກັນ. ​ໃນ​ແຈ້ງ​ການ​ແນະນຳ​ນີ້​ກໍ​ມີ​ທັງ​ຂໍ້​ຫ້າມ ​ແລະ ມີ​ທັງ​ຂໍ້​ໃຫ້​ປະຕິບັດ​ຄື​ດັ່ງ​ນີ້: ອັນ​ທີ​ໜຶ່ງ ຂໍ້​ປະຕິບັດ​ແມ່ນ​ໃຫ້​ຖື​ເອົາ​ການ​ສະຫລອງ​ບຸນປີ​ໃໝ່​ເປັນ​ການ​ສົ່ງ​ເສີມ​ປະ​ເພນີ​ວັດທະນະທຳ​ອັນ​ດີງາມ​ຂອງ​ຊາດ​ລາວ​ເຮົາ ​ເປັນຕົ້ນການ​ພົບ​ປະ​ສັງ​ສັນ, ການ​ບາສີສູ່ຂວັນ​ໃນ​ຄອບຄົວ, ການ​ຫົດ​ນ້ຳອວຍພອນ​ໄຊ​ໃຫ້​ຜູ້​ອາວຸ​ໂສ​ເຊິ່ງກັນ ​ແລະ ກັນ, ການ​ເຂົ້າວັດ​ຫົດສົງ​ພະພຸດທະ​ຮູບ, ຕົບ​ພະທາດ​ຊາຍ ​ແລະ ກິດຈະກຳ​ປິ່ນ​ອ້ອມ​ອື່ນໆ ​ແມ່ນ​ໃຫ້​ຢູ່​ໃນ​ຂອບ​ເຂດ​ເຮືອນ​ຊານ, ວັດ​ວາ​ອາ​ຮາມ, ສະ​ໂມ​ສອນ​ຂອງ​ບ້ານ, ສຳນັກງານ​ອົງການ, ​ແຫ​ລ່ງທ່ອງ​ທ່ຽວ, ສວນ​ວັດທະນະທຳ, ຫາດ​ຊາຍ, ຕາມ​ແມ່ນ້ຳທີ່​ມີ​ເງື່ອນ​ໄຂ, ການ​ຫົດ​ນໍ້າ​ແບບ​ມວນ​ຊົນ​ແມ່ນ​ກຳນົດ 3 ມື້ຄື: ວັນ​ທີ 14, 15 ​ແລະ 16 ​ເມສາ 2021, ນ້ຳທີ່​ເອົາ​ມາ​ຫົດສົງ​ກັນ​ຕ້ອງ​ແມ່ນ​ນ້ຳຫອມ ຫລື ນ້ຳສະອາດ ຈຶ່ງ​ຖື​ວ່າ​ເປັນ​ສິລິ​ມຸງຄຸນ. ສ່ວນ​ຂໍ້​ຫ້າມ​ນັ້ນກໍ​ມີ​ຄື: ​ເມົາ​ແລ້ວ​ຫ້າມ​ຂັບ​ລົດ​ເດັດຂາດ (ຂັບ​ບໍ່​ດື່ມ-ດື່ມ​ບໍ່​ຂັບ), ຫ້າມ​ໃຊ້​ນ້ຳສີ, ນ້ຳ​ເປື້ອນນ້ຳຄັນ​ຄາຍ ​ແລະ ນ້ຳກ້ອນ​ຫົດ ຫລື ​ແກວ່ງ​ໃສ່​ກັນ, ຫ້າມ​ນຸ່ງ​ໂປ້​ເປືອຍ​ເຂົ້າວັດ ​ແລະ ສະຖານ​ທີ່​ຊຸມ​ຊົນ, ຫ້າມ​ຕັນ​ທາງ​ສັນຈອນ, ຫ້າມ​ລັດ​ລົດ​ຫົດ​ກັນ, ຫ້າມ​ຈັດ​ຄອນ​ເສີດ​ໃນ​ບ້ານ, ​ໃນ​ວັດ, ​ໃນ​ສະຖານ​ທີ່​ສາທາລະນະ, ຕາມ​ຫາດ​ຊາຍ​ຕ່າງໆ, ຫ້າມ​ກໍ່​ສຽງ​ແຕກ ​ແລະ ​ໃຊ້​ສຽງ​ດັງ​ເກີນ​ຂອບ​ເຂດ​ເຊັ່ນ: ຈູດ​ໝາກກະ​ໂພ​ກ, ​ເປີດ​ສຽງ​ດົນຕີ​ລົບ​ກວນ​ຜູ້​ອື່ນ ​ແລະ ​ເດິກ​ດື່ນຈົນ​ກາຍ​ໂມງ​ທີ່​ກຳນົດ. ກ່ຽວ​ກັບ​ມາດ​ຕະການ​ຈັດຕັ້ງປະຕິບັດ​ນັ້ນ ​ແມ່ນ​ມອບ​ໃຫ້​ທ່ານ​ເຈົ້​າ​ເມືອງ, ຫົວໜ້າ​ພະ​ແນ​ກການ, ກົມ​ກອງ​ທ້ອງ​ຖິ່ນ​ເປັນ​ຜູ້​ກຳກັບ​ເບິ່ງ​ແຍງ ​ເພື່ອ​ເຮັດ​ໃຫ້ການ​ສະຫລອງ​ຫລິ້ນບຸນ​ສົ່ງ​ທ້າຍ​ປີ​​ເກົ່າ ຕ້ອນຮັບ​ປີ​ໃໝ່​ປີ​ນີ້​ເຕັມ​ໄປ​ດ້ວຍ​ຄວາມ​ໝາຍ ​ແລະ ຖືກຕ້ອງ​ສອດຄ່ອງ​ກັບ​ຮີດຄອງ​ປະ​ເພນີ​ລາວ​ຢ່າງ​ແທ້​ຈິງ. ​ໄປ​ຄຽງ​ຄູ່​ກັນນັ້ນ ກໍ​ຕ້ອງ​ໃຫ້​ມີ​ຄວາມ​ສະຫງົບ​ຈົບງາມ ​ແລະ ປອດ​ໄພ​ທຸກ​ປະການ. ປີ​ໃໝ່​ລາວ​ຂໍ​ໃຫ້​ທຸກ​ຄົນ​ໂຊກ​ໃຫຍ່​ໄຊ​ງາມ, ປະສົບ​ຜົນສຳ​ເລັດ​ໃນ​ໜ້າ​ທີ່​ການ​ງານ​ຢ່າງ​ລາບ​ລື່ນ ​ແລະ ຂໍ​ຢ່າ​ເອົາ​ໂຄ​ວິດ-19 ມາ​ຕິດ​ໃສ່​ກັນ​ເດີ້ ສາທຸ !.

- WhatsApp Image 2020 05 27 at 5 - ສະຫລອງ​ປີ​ໃໝ່​ບົນ​ຈິດ​ໃຈ​ເບີກບານ​ສະຫງົບ​ຈົບງາມ
- WhatsApp Image 2020 05 27 at 5 - ສະຫລອງ​ປີ​ໃໝ່​ບົນ​ຈິດ​ໃຈ​ເບີກບານ​ສະຫງົບ​ຈົບງາມ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!