ຂໍຄວາມຮ່ວມມືນຳ ບັນດາເຈົ້າຂອງໂຮງເກັບຊື້ເຫຼັກເສດໃຫ້ກວດເບິ່ງກ່ອນຊື້ ຖ້າຫາກບໍ່ຢາກຖືກຂໍ້ຫາຮັບຊື້ຂອງໂຈນ

ກອງບັນຊາການ ປກສ ນະຄອນຫຼວງວຽງຈັນ ຂໍຄວາມຮ່ວມມືນຳ ບັນດາເຈົ້າຂອງໂຮງເກັບຊື້ເຫຼັກເສດທັງຫຼາຍທົ່ວນະຄອນຫລວງວຽງຈັນ ໃຫ້ກວດກາລະອຽດຊິ້ນສ່ວນເຫຼັກເສດທີ່ມີຄົນນຳມາຂາຍໃຫ້ ຖ້າສົງໄສວ່າແມ່ນເຫຼັກທີ່ຖືກລັກມາ ໃຫ້ແຈ້ງຫາອຳນາດການປົກຄອງບ້ານ ແລະ ເຈົ້າໜ້າທີ່ຕຳຫຼວດບ່ອນໃກ້ສຸດ ຫລື ຖ່າຍຮູບສົ່ງແຈ້ງເຂົ້າຫາເບີວອດແອັບ ກອງບັນຊາການ ນະຄອນຫລວງວຽງຈັນ 020 ​28899774.

ແຕ່ຖ້າຫາກກວດພົບເຫັນຮ້ານໃດຮັບຊື້ເອົາທັ້ງໆທີ່ຮູ້ແລ້ວວ່າເປັນຊັບທີ່ຖືກລັກມາ ຈະຖືກດຳເນີນຄະດີຕາມປະມວນກົດໝາຍອາຍາ ມາດຕາ 244 ການຊຸກເຊື່ອງ, ການຊື້ຂາຍຊັບຢ່າງຜິດກົດໝາຍ: ບຸກຄົນໃດຫາກຮູ້ວ່າຊັບທີ່ຜູ້ອື່ນໄດ້ມາຈາກການປຸ້ນ, ການຍາດຊີ, ການສໍ້ໂກງ, ການຍັກຍອກ ຫລື ດ້ວຍວິທີອື່ນທີ່ຜິດກົດໝາຍແລ້ວ ຮັບເອົາ, ຊື້ເອົາ, ເກັບຮັກສາ, ຊຸກເຊື່ອງ ຫລື ນຳໄປຂາຍ ຈະຖືກລົງໂທດຕັດອິດສະລະພາບ ແຕ່ ສາມເດືອນ ຫາ ສອງປີ ແລະ ຖືກປັບໃຫມ ແຕ່ 3-5 ລ້ານກີບ.

ກໍລະນີກະທຳຜິດເປັນອາຈິນ, ມີການຈັດຕັ້ງເປັນກຸ່ມ ຫລື ໃນກໍລະນີກໍຄວາມເສຍຫາຍຢ່າງຫລວງຫລາຍ ຈະຖືກລົງໂທດຕັດອິດສະລະພາບ ແຕ່ ໜຶ່ງປີ ຫາ ຫ້າປີ ແລະ ຈະຖືກປັບໃຫມ ແຕ່ 5-15 ລ້ານກີບ. .