ຈະເລືອກທາງລົດໄຟ ຫຼື ໄປດ້ວຍເຮືອບິນ ລ້ວນແຕ່ເປັນສິ່ງອຳນວຍຄວາມສະດວກ ແລະ ເປັນທາງເລືອກທີ່ດີ
ເມື່ອສົມທຽບການເດີນທາງລະຫວ່າງທາງລາງ(ທາງລົດໄຟ) ກັບທາງອາກາດ(ທາງເຮືອບີນ) ທາງໃດຈະສະດວກກວ່າກັນ?
ໃນຂະນະນີ້ ຫຼາຍປະເທດທີ່ກຳລັງພັດທະນາ ຫຼື ປະເທດທີ່ທຸກຍາກ ສ່ວນຫຼາຍແມ່ນເລືອກເອົາການເດີນທາງດ້ວຍເຮືອບິນຫຼາຍກວ່າ ວ່າມັນມີຄວາມສະດວກສະບາຍ ກວ່າເດີນທາງດ້ວຍລົດໄຟ, ປະຢັດເວລາໄດ້ດີກວ່າ, ການບໍລິການກໍມາດຕະຖານກວ່າ…
ຄຳເຫັນດັ່ງກ່າວ ແມ່ນບໍ່ຜິດຈາກຄວາມເປັນຈິງໃນຂະນະນີ້. ຍ້ອນເຫດຜົນດັ່ງກ່າວ ຫຼາຍປະເທດຈຶ່ງເລືອກການລົງທຶນສ້າງສະໜາມບິນທີ່ໄດ້ມາດຕະຖານເປັນສ່ວນໃຫຍ່ ໂດຍລືມຄຳນຶງເຖິງຄວາມສະດວກສະບາຍຂອງການເດີນທາງດ້ວຍລົດໄຟທີ່ມີຄວາມສະດວກສະບາຍຫຼາຍກວ່າທີ່ຄິດ.
ບັນດານັກຊ່ຽວຊານວິເຄາະ ວິໄຈໃຫ້ເຫັນຄວາມສະດວກສະບາຍ ແລະ ປະຢັດເວລາຂອງການເດີນທາງດ້ວຍທາງອາກາດ ແລະ ເດີນທາງດ້ວຍທາງລົດໄຟ ໂດຍໃຫ້ການສົມມຸດສົມທຽບກັນແບບນີ້: ສົມມຸດວ່າຂີ່ເຮືອບິນແຕ່ນະຄອນຫຼວງວຽງຈັນໄປນະຄອນຫຼວງພະບາງ ເສຍເວລາພຽງ 1 ຊົ່ວໂມງ ແຕ່ຖ້າເດີນດ້ວຍທາງລົດໄຟ ອາດຈະເສຍເວລາ 2 ຊົ່ວໂມງ. ແຕ່ບັນດາຜູ້ຊ່ຽວຊານຄິດໄລ່ວ່າ ຜູ້ໂດຍສານ ເມື່ອລົງຍົນແລ້ວ ຍັງເສຍເລລາເພີ່ມເຕີມໃນຂອດ ແຈ້ງໜັງສືເຂົ້າ-ອອກເມືອງ, ລໍຖ້າເອົາເຄື່ອງສຳພາລະທີ່ຝາກໄປກັບຍົນ…ເມື່ອລວມກັນເຂົ້າແລ້ວ ກໍບໍ່ຕໍ່າກວ່າ 2 ຊົ່ວໂມງ ເຊັ່ນດຽວກັນກັບເດີນທາງດ້ວຍລົດໄຟ.
ແຕ່ໃນທ່າອ່ຽງຂອງບັນດາປະເທດທີ່ຈະເລີນແລ້ວ ແມ່ນມີທ່າອ່ຽງເດີນທາງດ້ວຍທາງລາງຫຼາຍຂຶ້ນ ແລະ ເລືອກການລົງທຶນສ້າງທາງລາງຫຼາຍຂຶ້ນ ໂດຍສະເພາະ ແມ່ນທາງລົດໄຟຄວາມໄວສູງນັບແຕ່ 200 ກມ/ຊົ່ວໂມງຂຶ້ນໄປ ແມ່ນປະຢັດເວລາໄດ້ດີ, ການບໍລິການໃນລົດໄຟໃນເວລາເດີນທາງກໍມີຄວາມສະດວກບໍ່ຕ່າງຫຍັງກັບໄປທາງເຮືອບິນ. ເມື່ອຮອດສະຖານທີ່ແລ້ວກໍບໍ່ຈຳເປັນຕ້ອງໄດ້ຖ້າເອົາເຄື່ອງສຳພາລະ ຫຼື ແຈ້ງໜັງສືເຂົ້າ-ອອກເມືອງ ຄືກັນກັບທາງເຮືອບິນ.
ໃນອະນາຄົດ ຜູ້ຊ່ຽວຊານຄາດວ່າ ຫຼາຍປະເທດຈະເລືອກເອົາການເດີນທາງດ້ວຍທາງລາງຫຼາຍກວ່າການເດີນທາງດ້ວຍທາງອາກາດ ເມື່ອມີທາງລົດໄຟຄວາມໄວສູງແຕ່ 200 ກມ/ຊົ່ວໂມງຂຶ້ນເມືອ. ການບໍລິການທຸກຢ່າງໃນລົດໄຟ ກໍບໍ່ຕ່າງຫຍັງກັບມາດຕະຖານເດີນທາງດ້ວຍເຮືອບິນ, ແຖມຍັງມີຄວາມປອດໄພສູງກວ່າເຄື່ອງບິນ. ສົມມຸດວ່າເກີດອຸບັດຕິເຫດຂຶ້ນມາ ການສູນເສຍກໍຈະບໍ່ສູງເທົ່າກັບການເກີດອຸຍັດຕິເຫດທາງອາກາດ.
ສິ່ງເຫລົ່ານີ້ ເປັນພຽງຄຳສັນນິຖານ ແລະ ທິດທາງທ່າອ່ຽງການເລືອກການເດີນທາງຂອງມະນຸດໃນອະນາຄົດ ວ່າຈະເລືອກທາງໃດກັນດີ?
