ລາຄາອາຫານໂລກເພີ່ມຂຶ້ນຮອດລະດັບສູງສຸດໃນຮອບເກືອບ 7 ປີ
ວັນທີ 8 ເມສາ, ອົງການອາຫານ ແລະ ກະສິກຳແຫ່ງສະຫະປະຊາຊາດ (FAO) ລາຍງານວ່າ: ລາຄາອາຫານໂລກເພີ່ມສູງຂຶ້ນ 2,1% ໃນເດືອນມີນາຜ່ານມາ ຮອດລະດັບດຽວກັບທີ່ເຄີຍພົບຫລ້າສຸດເມື່ອເດືອນມິຖຸນາ 2014.
FAO ລະບຸວ່າ: ລາຄາເມັດພືດ ແລະ ທັນຍາພືດ ເຊິ່ງເປັນອົງປະກອບຂະໜາດໃຫຍ່ທີ່ສຸດໃນດັດຊະນີລາຄາອາຫານໂລກຫລຸດລົງ 1,7% ໃນເດືອນມີນາ ຖືເປັນຈຸດສິ້ນສຸດຂອງທ່າອ່ຽງລາຄາທີ່ເພີ່ມຂຶ້ນໄລຍະ 8 ເດືອນ, ແຕ່ດັດຊະນີຍ່ອຍຍັງສູງກວ່າປີກ່ອນໜ້າ 26,5%, ສ່ວນລາຄາເຂົ້າສາລີ, ເຂົ້າໂພດ, ເຂົ້າບາເລ ແລະ ເຂົ້າສານຫລຸດລົງເຊັ່ນກັນ ເຖິງວ່າມີອຸປະສົງທີ່ແຂງແຮງຈາກປະເທດຈີນ ແລະ ອິນເດຍ.
ຂະນະລາຄານ້ຳມັນຫລຸດລົງ 4% ເມື່ອທຽບໃສ່ເດືອນກຸມພາ, ແຕ່ຍັງສູງກວ່າລະດັບຂອງປີກ່ອນໜ້າ 30%. ເຖິງຢ່າງໃດກໍດີ, ການຫລຸດລົງຂອງລາຄາອາຫານເຫລົ່ານີ້ບໍ່ພຽງພໍຈະຊົດເຊີຍລາຄາທີ່ເພີ່ມຂຶ້ນຂອງອາຫານປະເພດອື່ນ ເນື່ອງຈາກລາຄາອາຫານຂອງດັດຊະນີຍ່ອຍອື່ນໆລ້ວນເພີ່ມສູງຂຶ້ນ.
ລາຄາຜະລິດຕະພັນນົມເພີ່ມຂຶ້ນ 3,9% ໃນເດືອນມີນາ ຫລັງເກີດແຮງກົດດັນຈາດບັນຫາການຂົນສົ່ງໃນເອີຣົບ ແລະ ອາເມລິກາເໜືອ ອີກທັງຄວາມຕ້ອງການນົມຜົງທີ່ເພີ່ມຂຶ້ນໃນອາຊີ ໂດຍສະເພາະຈາກປະເທດຈີນ.
ຂະນະດຽວກັນ, ລາຄາຊີ້ນສັດເພີ່ມຂຶ້ນ 2,3% ເນື່ອງຈາກມີຄວາມຕ້ອງການສັດປີກ ແລະ ຊີ້ນໝູເພີ່ມຂຶ້ນ, ສ່ວນລາຄານ້ຳມັນພືດເພີ່ມຂຶ້ນ 8% ຮອດລະດັບສູງສຸດນັບແຕ່ປີ 2011.
ທັງນີ້, ຂໍ້ມູນດັດຊະນີລາຄາອາຫານແຕ່ລະເດືອນຂອງ FAO ອ້າງອີງຈາກລາຄາສິນຄ້າອາຫານ 23 ປະເພດທົ່ວໂລກ ເຊິ່ງຄວບຄຸມຜະລິດຕະພັນທີ່ແຕກຕ່າງກັນ 73 ລາຍການເມື່ອທຽບໃສ່ປີຖານ.
ອ້າງອີງ: ສຳນັກຂ່າວຊິນຮົວ
