ເຕືອນອາຊີຈະຜະເຊີນຫາຍະນະ ຖ້າບໍ່ຄວບຄຸມການປ່ຽນສະພາບອາກາດ
ນັກວິທະຍາສາດເຕືອນວ່າ: ອາຊີ-ປາຊີຟິກຈະຜະເຊີນຫາຍະນະແບບບໍ່ເຄີຍມີມາກ່ອນ, ຖ້າບໍ່ປະຕິບັດຕາມຂໍ້ຕົກລົງຫລຸດໂລກຮ້ອນປາຣີຢ່າງຈິງຈັງ ເພື່ອຄວບຄຸມການປ່ຽນແປງສະພາບອາກາດ.
ທະນາຄານພັດທະນາອາຊີ (ADB) ແລະ ສະຖາບັນພອດສະດຳເພື່ອການວິໄຈຜົນກະທົບສະພາບອາກາດເຜີຍແຜ່ລາຍງານໃນວັນທີ 14 ກໍລະກົດນີ້ວ່າ: ການເຕີບໃຫຍ່ ແລະ ຄວາມໝັ້ນຄົງໃນອະນາຄົດຂອງພາກພື້ນນີ້ ລວມທັງສະຫວັດດີພາບຂອງຄົນຫລາຍລ້ານຄົນສ່ຽງຜະເຊີນໄພພິບັດ, ຖ້າບໍ່ເລັ່ງບັນເທົາ ແລະ ປັບຮັບການປ່ຽນແປງສະພາບອາກາດ, ທຸກປະເທດຈະຕ້ອງດຳເນີນມາດຕະການທາງບຸກແຕ່ຫົວທີ່ ເພື່ອບັນລຸເປົ້າໝາຍຄວບຄຸມອຸນຫະພູມສະເລ່ຍໂລກບໍ່ໃຫ້ສູງຂຶ້ນ 2 ອົງສາຈາກໄລຍະກ່ອນປະຕິວັດອຸດສາຫະກຳ ເພາະຖ້າທຸກປະເທດຍັງປ່ອຍແກັສເຮືອນແກ້ວໃນອັດຕາປັດຈຸບັນ ອຸນຫະພູມໂລກຈະສູງຂຶ້ນ 4 ອົງສາ ພາຍໃນຄຣິສສະຕະວັດນີ້, ບາງພື້ນທີ່ຂອງອາຊີ-ປາຊີຟິກອາດສູງຂຶ້ນ 6 ອົງສາ. ສະເພາະທາຈິກິດສະຖານ, ອັບການິດສະຖານ, ປາກິດສະຖານ ແລະ ຕາເວັນຕົກສຽງເໜືອຂອງຈີນອາດສູງຂຶ້ນເຖິງ 8 ອົງສາ.
ອຸນຫະພູມທີ່ສູງຂຶ້ນຈະເຮັດໃຫ້ເກີດຄວາມປັ່ນປ່ວນດ້ານສະພາບອາກາດ, ຄວາມຫລາກຫລາຍທາງຊີວະພາບ, ກະສິກຳ ແລະ ການປະມົງ. ອາຊີ-ປາຊີຟິກເປັນບ່ອນອາໄສຂອງຄົນ 2 ໃນ 3 ຂອງໂລກ, ເປັນທີ່ຕັ້ງ 9 ໃນ 15 ປະເທດທີ່ຖືກລະບຸວ່າສ່ຽງທີ່ສຸດຕໍ່ໄພທຳມະຊາດໂລກ ແລະ ມີຄົນ 1 ໃນ 10 ທີ່ຍັງທຸກຍາກ. ADB ຊີ້ວ່າ: ພາກພື້ນນີ້ຍັງໃຊ້ເຊື້ອໄຟຟອສຊິດເປັນພະລັງງານຕົ້ນຕໍ ຈຳເປັນຕ້ອງລົງທຶນ 4.000 ລ້ານໂດລາສະຫະລັດ ພາຍໃນປີ 2020 ເພື່ອສົ່ງເສີມການໃຊ້ພະລັງງານໝູນວຽນ ແລະ ການເຕີບໃຫຍ່ແບບເປັນມິດຕໍ່ສິ່ງແວດລ້ອມ.
