ກຳປູເຈຍສັກວັກຊີນປ້ອງກັນໂຄວິດ-19 ຄົບລ້ານຄົນ ທ່ານ ຮຸນ ເຊນ ໃຫ້ເງິນລາງວັນ 5 ລ້ານຣຽວ ແກ່ຜູ້ຮັບວັກຊີນຄົນທີ 1 ລ້ານ
ວັນທີ 12 ເມສາ, ທ່ານ ອໍ ແວນດິນ ລັດຖະມົນຕີ ແລະ ໂຄສົກກະຊວງສາທາລະນະສຸກຂອງກຳປູເຈຍ ເປີດເຜີຍວ່າ: ປັດຈຸບັນ ກຳປູເຈຍໄດ້ສັກວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ 2019 (ໂຄວິດ-19) ໃຫ້ປະຊາຊົນ 1 ລ້ານຄົນ ຈາກປະຊາກອນລວມ 16 ລ້ານຄົນ.
ທ່ານ ແວນດິນ ກ່າວວ່າ: ປານ ສາວັນນາທິ ອາຍຸ 36 ປີ ຜູ້ອາໄສຢູ່ໃນນະຄອນຫລວງພະນົມເປັນ ເປັນຜູ້ຮັບວັກຊີນປ້ອງກັນພະຍາດໂຄວິດ-19 ຄົນທີ 1 ລ້ານຂອງປະເທດ. ພ້ອມກ່າວວ່າ: ທ່ານ ຮຸນ ເຊນ ນາຍົກລັດຖະມົນຕີກຳປູເຈຍ ມອບເງິນລາງວັນ 5 ລ້ານຣຽວ ໃຫ້ ສາວັນນາທິ ໃນຖານະຜູ້ຮັບວັກຊີນຄົນທີ 1 ລ້ານ.
ທ່ານ ແວນດິນ ໃຫ້ສຳພາຕໍ່ນັກຂ່າວຫລັງສົ່ງມອບເງິນລາງວັນດັ່ງກ່າວວ່າ: ປະຊາຊົນຄວນເຂົ້າຮັບວັກຊີນຕາມນັດໝາຍ ເພື່ອປ້ອງກັນຕົນເອງຈາກອາການປ່ວຍຮຸນແຮງ ແລະ ການເຂົ້າປິ່ນປົວໃນໂຮງໝໍ.
ຖະແຫລງການຈາກກະຊວງສາທາລະນະສຸກລະບຸວ່າ: ປັດຈຸບັນ ກຳປູເຈຍມີຜູ້ຕິດເຊື້ອໂຄວິດ-19 ສະສົມ 4.515 ຄົນ ແລະ ຜູ້ເສຍຊີວິດສະສົມ 30 ຄົນ, ສ່ວນການສັກວັກຊີນປ້ອງກັນພະຍາດໂຄວິດ-19 ເລີ່ມຕົ້ນມາແຕ່ວັນທີ 10 ກຸມພາ ໂດຍເນັ້ນສັກໃຫ້ປະຊາຊົນກຸ່ມສ່ຽງສູງ ແລະ ກຸ່ມບອບາງເຊັ່ນ: ແພດ ແລະ ບຸກຄະລາກອນການແພດແນວໜ້າ, ລັດຖະກອນ, ຄູ, ທະຫານ, ສື່ມວນຊົນ, ຄົນເກັບຂີ້ເຫຍື້ອ ແລະ ແຮງງານໃນໂຮງງານເສື້ອຜ້າ.
ທັງນີ້, ເມື່ອວັນທີ 10 ເມສາ, ທ່ານ ຮຸນ ເຊນ ກ່າວວ່າ: ກຳປູເຈຍໄດ້ຮັບວັກຊີນປ້ອງກັນພະຍາດໂຄວິດ-19 ຫລາຍກວ່າ 3,1 ລ້ານໂດສ ເມື່ອໄລ່ຮອດທ້າຍເດືອນມີນາ ແລະ ຄາດວ່າຈະໄດ້ຮັບວັກຊີນເພີ່ມອີກ 8 ລ້ານໂດສ ລະຫວ່າງເດືອນເມສາ-ສິງຫາ ໂດຍກຳປູເຈຍຕັ້ງເປົ້າໝາຍສັກວັກຊີນໃຫ້ປະຊາຊົນຢ່າງໜ້ອຍ 10 ລ້ານຄົນ.
ອ້າງອີງ: ສຳນັກຂ່າວຊິນຮົວ
