ອິສຣາເອນຍົກເລີກໃສ່ຜ້າອັດປາກ-ດັງ ໃນພື້ນທີ່ສາທາລະນະແລ້ວ
ທາງການອິສຣາເອນ ໄດ້ຍົກເລີກການບັງຄັບໃສ່ຜ້າອັດປາກ-ດັງໃນພື້ນທີ່ສາທາລະນະແລ້ວ ພ້ອມກັບມາເປີດໂຮງຮຽນເຕັມຮູບແບບອີກ ຖືເປັນການຫລຸດຜ່ອນມາດຕະການປ້ອງກັນໂຄວິດ-19 ຄັ້ງຫລ້າສຸດຂອງປະເທດ ຫລັງດຳເນີນໂຄງການສັກວັກຊີນໃຫ້ປະຊາຊົນເປັນວົງກວ້າງໃນເດືອນທັນວາປີຜ່ານມາ ຈົນຈຳນວນຜູ້ຕິດເຊື້ອຮ້າຍແຮງ ແລະ ຜູ້ເສຍຊີວິດຫລຸດລົງຢ່າງວ່ອງໄວ.
ທັງນີ້ ກ່ອນນີ້ຂໍ້ກຳນົດຂອງເຈົ້າໜ້າທີ່ສາທາລະນະສຸກນັ້ນ ບັງຄັບໃຫ້ປະຊາຊົນທຸກຄົນຕ້ອງໃສ່ຜ້າອັດປາກ-ດັງໃນພື້ນທີ່ສາທາລະນະ ເຊິ່ງມີຜົນມາກວ່າ 1 ປີແລ້ວ. ເຖິງຢ່າງໃດກໍຕາມ, ເຖິງວ່າຈະຍົກເລີກຂໍ້ບັງຄັບດັ່ງກ່າວ ແຕ່ປະຊາຊົນຍັງຕ້ອງໃສ່ຜ້າອັດປາກ-ດັງໃນບ່ອນຮົ່ມ ແລະ ເມື່ອລວມກຸ່ມຂະໜາດໃຫຍ່.
ຂະນະທີ່ ໂຮງຮຽນປະຖົມ ແລະ ມັດທະຍົມທັງໝົດ ໄດ້ກັບມາເປີດຮຽນໃນວັນທີ 18 ເມສາ ໂດຍນາຍົກລັດຖະມົນຕີ ເບນຈາມິນ ເນທັນຢາຮູ ພ້ອມລັດຖະມົນຕີກະຊວງສຶກສາທິການ ຍັງໄດ້ລົງພື້ນທີ່ຢ້ຽມຢາມໂຮງຮຽນແຫ່ງໜຶ່ງ ແລະ ກ່າວວ່າ: ອິສຣາເອນຖືເປັນປະເທດຜູ້ນຳໃນໂລກທີ່ຈະກ້າວອອກຈາກການລະບາດຂອງໂຄໂຣນາໄວຣັສ.
ທັງນີ້, ອິສຣາເອລສັກວັກຊີນໃຫ້ປະຊາກອນສ່ວນໃຫຍ່ຢ່າງວ່ອງໄວ ເພື່ອປ້ອງກັນການລະບາດຂອງໄວຣັສ ເຊິ່ງຖືວ່ານຳໜ້າໄປກວ່າຫລາຍປະເທດທົ່ວໂລກ ແລະ ຍັງຍົກເລີກຂໍ້ຈຳກັດສ່ວນໃຫຍ່ຕາມມາດຕະການປ້ອງກັນການລະບາດ. ອີກທັງຍັງປະກາດໃນອາທິດກ່ອນວ່າ: ຈະກັບມາເປີດປະເທດອີກ ເພື່ອສັກວັກຊີນໃຫ້ນັກທ່ອງທ່ຽວຕ່າງປະເທດໃນເດືອນພຶດສະພາຈະເຖິງນີ້.
ຫລ້າສຸດ ອິສຣາເອລມີຜູ້ຕິດເຊື້ອສະສົມ 836.936 ຄົນ, ປິ່ນປົວຫາຍແລ້ວເກືອບ 99% ຂອງຜູ້ຕິດເຊື້ອສະສົມທັງໝົດ, ເສຍຊີວິດແລ້ວ 6.334 ຄົນ ອັດຕາການເສຍຊີວິດປະມານ 0,75%.
