ຄະນະເລຂາທິການສູນກາງພັກ ອອກຄຳສັ່ງແນະນຳ ໃຫ້ຄະນະພັກທຸກຂັ້ນ ເພີ່ມທະວີຄວາມຮັບຜິດຊອບ ໃນການສະກັດກັ້ນ ແລະ ແກ້ໄຂ ພະຍາດໂຄວິດ-19

ຄະນະເລຂາທິການສູນກາງພັກ ໄດ້ອອກ ຄຳສັ່ງແນະນຳ ມາຍັງຄະນະພັກທຸກຂັ້ນ ໂດຍສະເພາະຄະນະພັກ ກະຊວງ, ອົງການ, ແຂວງ ແລະ ນະຄອນຫລວງວຽງຈັນ ສະບັບ ເລກທີ 82 /ຄລສພ, ລົງວັນທີ 25 ເມສາ 2021 ວ່າດ້ວຍການເພີ່ມທະວີຄວາມຮັບຜິດຊອບ ຂອງຄະນະພັກແຕ່ລະຂັ້ນໃນການສືບຕໍ່ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ພະຍາດໂຄວິດ-19 ດັ່ງນີ້:

1. ຄະນະພັກແຕ່ລະຂັ້ນ ຕ້ອງມີຄວາມເປັນເອກະພາບກັນວ່າ ຕ້ອງຖືກການຕ້ານ, ສະກັດກັນ, ຄວບຄຸມ ແລະ ປ້ອງກັນ ພະຍາດ ໂຄວິດ-19 “ເປັນໜ້າທີ່ຍຸດທະສາດສຳຄັນ ແລະ ຮີບດ່ວນໃນການນຳພາຊີ້ນຳ ແລະ ບັນຊາຕົວຈິງ ຄືໃນພາວະສົງຄາມ”. ອັນນີ້ ຖືເປັນປັດໄຈສຳຄັນຕັດສິນກວ່າໝູ່ ທີ່ຈະຮັບປະກັນໃຫ້ປະເທດເຮົາ ສາມາດຄວບຄຸມການແຜ່ລະບາດ ຂອງເຊື້ອພະຍາດດັ່ງກ່າວ, ຄາດໝາຍໃຫຍ່ ແມ່ນຕ້ອງຮັບປະກັນ “ບໍ່ໃຫ້ມີການລະບາດຄັ້ງໃໝ່ ແລະ ລະບາດຮອບໃຫຍ່ທີ່ທະວີຄູນຂຶ້ນກວ່າເກົ່າ” ເຊິ່ງຈະນຳໄປສູ່ການສ້າງຄວາມສູນເສຍດ້ານຊີວິດ, ສຸຂະພາບ ກໍຄື ຜົນກະທົບທີ່ບໍ່ສົມເຫດສົມຜົນ ຕໍ່ເສດຖະກິດ-ສັງຄົມ ແລະ ເດັດຂາດບໍ່ໃຫ້ມີຄວາມສັບສົນວາຍເກີດຂຶ້ນໃນສັງຄົມ.
2. ໃຫ້ຄະນະພັກແຕ່ລະຂັ້ນ ສືບຕໍ່ຕິດຕາມ, ຕີລາຄາ ແລະ ປະເມີນສະຖານະການ ການລະບາດ ຂອງພະຍາດ ໂຄວິດ-19 ຢ່າງໃກ້ສິດ ເພື່ອສືບຕໍ່ຈັດຕັ້ງປະຕິບັດ ທິດຊີ້ນຳທີ່ກຳ ນົດອອກໃນຄໍາສັ່ງ ຂອງຄະນະເລຂາທິການສູນກາງພັກ ສະບັບເລກທີ 07/ຄລສພ ລົງວັນທີ 6 ເມສາ 2020 ວ່າດ້ວຍເພີ່ມທະວີການນຳພາຊີ້ນຳ， ຕໍ່ການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງເຊື້ອພະຍາດ ໂຄວິດ-19 ແລະ ຄໍາສັ່ງ ຂອງນາຍົກລັດຖະ ມົນຕີ ສະບັບເລກທີ 15/ນຍ ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ໃຫ້ເຂັ້ມງວດ ແລະ ມີປະສິດທິຜົນສູງ. ພ້ອມກັນນັ້ນ ກໍໃຫ້ນຄວ້າ, ວາງມາດຕະການ ຮັບມື, ແກ້ໄຂ ແລະ ຟື້ນຟູຜົນກະທົບດ້ານເສດຖະກິດ-ສັງຄົມ ແຕ່ຫົວທີ, ນັບທັງມາດຕະການແກ້ໄຂຜົນກະທົບໂດຍກົງຕໍ່ການດຳລົງຊີວິດປະຈຳວັນ ກໍຄື ການເຄື່ອນໄຫວວຽກງານ ຂອງພະນັກງານ, ທະຫານ, ຕຳຫລວດ, ການຜະລິດ-ທຸລະກິດ ຂອງຜູ້ປະກອບການ ແລະ ປະຊາຊົນທົ່ວໄປ. ໃຫ້ເອົາໃຈໃສ່ປະກອບເຄື່ອງມື, ສິ່ງອຳນວຍຄວາມສະດວກ ໃຫ້ແກ່ການປະຕິບັດໜ້າທີ່ ຂອງພະນັກງານ, ແພດໝໍ ແລະ ບຸກຄະລາກອນອື່ນໆ ທີ່ມີໝ້າທີ່ໂດຍກົງກັບພະຍາດ ໂຄວິດ-19, ທັງຄົ້ນຄວ້າປະຕິບັດນະໂຍບາຍ ທາງດ້ານວັດຖຸ ແລະ ຈິດໃຈ ຕໍ່ເຂົາເຈົ້າຢ່າງເໝາະສົມ; ຕ້ອງສືບຕໍ່ປະຕິບັດຢ່າງເຂັ້ມງວດ ແລະ ເຄັ່ງຄັດ ກ່ຽວກັບມາດຕະການປ້ອງກັນ ໂດຍມີການຕິດຕາມ, ກວດກາ ແລະ ປະເມີນຜົນ ຢ່າງເປັນປະຈຳ; ບໍລິເວນໃດ, ທ້ອງຖິ່ນໃດ ຫລື ຂະແໝງການ ວຽກງານໃດ ທີ່ຍັງມີຄວາມສ່ຽງສູງ ກໍໃຫ້ສືບຕໍ່ປິດ (Lock Down) ແລະ ພິຈາລະນາຫລຸດຜ່ອນມາດຕະການຄວບຄຸມລົງເປັນກ້າວໆ ໃນແຕ່ລະໄລຍະຕາມການປ່ຽນແປງທີ່ຕັ້ງ ຂອງການປ້ອງກັນ ແລະ ຄວບຄຸມໄດ້ພະຍາດ ໂຄວິດ-19 ເຂົ້າສູ່ປົກກະຕິ.
3. ລັດຖະບານ ກໍຄື ອົງການປົກຄອງແຕ່ລະຂັ້ນ ປະເມີນຄວາມສ່ຽງ ການລະບາດ ຂອງພະຍາດ ເພື່ອກະກຽມບຸກຄະລາກອນ, ເຄື່ອງມື, ອຸປະກອນການແພດ, ຢາປະເພດຕ່າງໆ ນັບທັງຄວາມອາດສາມາດຮອງຮັບດ້ານສະຖານທີ່ກັກກັນ ແລະ ປິ່ນປົວພະຍາດ ໃນກໍລະນີຕ່າງໆ; ເພີ່ມທະວີຄວາມເປັນເຈົ້າ ໃນການປະສານງານ, ການຍາດແຍ່ງຄວາມຊ່ວຍເຫລືອ, ການຮ່ວມມື ດ້ານການແພດ, ດ້ານສາທາລະນະສຸກກັບປະເທດໃກ້ຄຽງ, ປະເທດເພື່ອນມິດຕ່າງໆ, ອົງການຈັດຕັ້ງສາກົນ, ອົງການຈັດຕັ້ງສັງຄົມ ເພື່ອສະກັດກັ້ນ, ປ້ອງກັນ ແລະ ຄວບຄຸມການລະບາດ ຂອງພະຍາດໂຄວິດ- 19
4. ໃຫ້ຈັດຕັ້ງນຳພາການວາງແຜນ, ຈັດສັນ ແລະ ສັກຢາວັກຊີນ ປ້ອງກັນພະຍາດ ໂຄວິດ-19 ໃຫ້ແຕ່ລະເປົ້າໝາຍໃນແຕ່ລະໄລຍະ ຢ່າງເປັນລະບົບ, ຄົບຖ້ວນ, ທົ່ວເຖິງ ແລະ ຮັບປະກັນ ຄວາມເປັນລະບຽບຮຽບຮ້ອຍ; ຕ້ານປະກົດການຫຍໍ້ທໍ້ ກໍຄືການສວຍໂອກາດທຸກຮູບແບບທີ່ບໍ່ດີ ຕໍ່ບັນຫາດັ່ງກ່າວ.
5. ໃຫ້ຄະນະພັກແຕ່ລະຂັ້ນ ຊີ້ນຳເອົາໃຈໃສ່ບັນຫາການໂຄສະນາ, ສຶກສາອົບຮົມ, ສ້າງຄວາມຮັບຮູ້ເຂົ້າໃຈ ແລະ ປະຕິບັດຖືກຕ້ອງ ວິທີການປ້ອງກັນພະຍາດ, ເຮັດເປັນປະຈຳ ແລະ ກາຍເປັນວັດທະນະທຳໃໝ່ ໃນການດຳລົງຊີວິດປະຈຳວັນ ຢູ່ໃນສັງຄົມ (ປິດປາກ-ດັງ, ລ້າງມື, ເວັນໄລຍະຫ່າງ), ສະມາຊິກພັກ, ພະນັກງານ-ລັດຖະກອນ, ທະຫານ, ຕຳ ຫລວດ ຕ້ອງເປັນແບບຢ່າງນຳໜ້າ ແລະ ເປັນເຈົ້າການ ປ້ອງກັນ, ສະກັດກັ້ນ ແລະ ແກ້ໄຂພະຍາດ ໂຄວິດ-19, ພ້ອມນັ້ນກໍປະຕິບັດມາດຕະການທາງວິໄນ, ການລົງໂທດ ຕໍ່ພະນັກງານ, ເຈົ້າໜ້າທີ່ ແລະ ບຸກຄົນໃດ ທີ່ລະເມີດຄຳສັ່ງ, ລະບຽບການຕ່າງໆ ຢ່າງເຂັ້ມງວດ ແລະ ເດັດຂາດ.
6. ໃຫ້ສືບຕໍ່ຊີ້ນຳການຜັນຂະຫຍາຍ ຈັດຕັ້ງປະຕິບັດການຫັນເປັນທັນສະໄໝ ເພື່ອຮັບໃຊ້ການບໍລິຫານ-ຄຸ້ມຄອງ ແລະ ແກ້ໄຂວຽກງານ ຢ່າງຮອບດ້ານ, ໃນເງື່ອນໄຂສະພາບຫຍຸ້ງຍາກແນວນີ້ ບັນຫາການຫັນເປັນທັນສະໄໝ ຖືເປັນປັດໄຈພື້ນຖານຮັບປະກັນໃຫ້ວຽກງານຕ່າງໆ ບໍ່ພຽງແຕ່ບໍ່ໃຫ້ຢຸດສະຫງັກ ຫາກຍັງເພີ່ມປະສິດທິຜົນ ແລະ ເພີ່ມຄຸນນະພາບຂຶ້ນຕື່ມອີກ; ຮັບປະການພົວພັນປະສານງານລະຫວ່າງສູນກາງ ແລະ ທ້ອງຖິ່ນ ລວມທັງການປະຊຸມທາງໄກ.
7. ຄະນະພັກແຕ່ລະຂັ້ນ ຊີ້ນຳການແຕ່ງຕັ້ງຄະນະຮັບຜິດຊອບ ເພື່ອປະຊາພັນ, ແຈ້ງຂໍ້ມູນຂ່າວສານ ທີ່ຖືກຕ້ອງ, ຕົວຈິງ, ເປັນທາງການ ໃຫ້ແກ່ສັງຄົມ ຢ່າງວ່ອງໄວ, ທັນການ, ຕີຖອຍຂໍ້ມູນທີ່ບິດເບືອນ, ສ້າງສະຖານະການ ເຮັດໃຫ້ສັງຄົມເກີດຄວາມສັບສົນ, ລະແວງສົງໃສ ແລະ ຂາດຄວາມເຊື່ອໝັ້ນ ຕໍ່ການບໍລິຫານຄຸ້ມຄອງ ຂອງລັດເຮົາ.
8. ທົ່ວພັກ, ທົ່ວລັດ, ທົ່ວກຳລັງ ປະກອບອາວຸດ ແລະ ພົນລະເມືອງລາວ ທຸກຄົນ ມີໜ້າທີ່, ມີຄວາມຮັບຜິດຊອບ ແລະ ເປັນເຈົ້າການ ເຂົ້າຮ່ວມຂະບວນການ ສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂ ພະຍາດ ໂຄວິດ-19; ປະກອບ ສ່ວນດ້ານສະຕິປັນຍາ, ເຫື່ອ ແຮງ, ກຳລັງຊັບ, ວັດຖຸສິ່ງຂອງ ແລະ ສິ່ງອຳນວຍຄວາມສະດວກຕ່າງໆໃຫ້ແກ່ຮັບມື ແລະ ແກ້ໄຂ ການລະບາດ ຂອງພະຍາດ ໂຄວິດ-19 ໄດ້ຮັບຜົນເລັດ ແລະ ຜ່ານພົ້ນມະຫັນຕະໄພຮ້າຍດັ່ງກ່າວ.