ຜະນຶກກຳລັງມະຫາສາມັກຄີຕ້ານໂຄວິດ-19

ຜະນຶກກຳລັງມະຫາສາມັກຄີຕ້ານໂຄວິດ-19 - FB IMG 1619687778246 - ຜະນຶກກຳລັງມະຫາສາມັກຄີຕ້ານໂຄວິດ-19
ຜະນຶກກຳລັງມະຫາສາມັກຄີຕ້ານໂຄວິດ-19 - AGL banner - ຜະນຶກກຳລັງມະຫາສາມັກຄີຕ້ານໂຄວິດ-19

ໂດຍ:ທິດກໍ່າ

    ມາຮອດປັດຈຸບັນນີ້, ສະພາບການບ້ານເມືອງເຮົາພວມປະສົບບັນຫາການແຜ່ລະບາດພະຍາດໂຄວິດ-19 ຢ່າງກວ້າງຂວາງ ແລະ ໜັກໜ່ວງ. ເພາະສະນັ້ນ ຍິ່ງກວ່າເວລາໃດໝົດທີ່ພວກເຮົາຄົນລາວໃນທົ່ວປະເທດຕ້ອງໄດ້ສາມັກຄີກັນເຂົ້າເປັນກຳລັງອັນມະຫາສານເພື່ອຕອບຕ້ານ, ຕອບໂຕ້, ຄວບຄຸມ ແລະ ແກ້ໄຂບັນຫາການແຜ່ລະບາດພະຍາດນີ້ໃຫ້ຫລຸດໜ້ອຍຖອຍລົງ ແລະ ກ້າວໄປເຖິງບ່ອນເຮັດໃຫ້ພະຍາດໂຄວິດ-19 ມະຫັບມະຫາຍໄປຈາກປະເທດລາວຢ່າງສິ້ນເຊີງ.

      ພວກເຮົາຕ້ອງຍອມຮັບວ່າ, ການແຜ່ລະບາດພະຍາດໂຄວິດ-19 ຢູ່ປະເທດຂອງພວກເຮົາໃນຄັ້ງນີ້ຖືເປັນຄັ້ງປະຫວັດສາດທີ່ບໍ່ທັນເຄີຍມີມາຂອງຊາດລາວ, ຄົນລາວພວກເຮົາ. ອັນສາເຫດກໍຍ້ອນວ່າມັນເກີດມາຈາກຫລາຍປັດໄຈ, ແຕ່ອັນທີ່ແນ່ແທ້ມັນກໍເນື່ອງມາຈາກຄວາມປະໝາດເລີ້ນເລີເຜີຕົວ ຫລືວ່າ ຄວາມບໍ່ມີສະຕິຂອງບຸກຄົນ ແລະ ກຸ່ມຄົນຈຳນວນໜ້ອຍໜຶ່ງທີ່ເຫັນແຕ່ຜົນປະໂຫຍດສ່ວນຕົວ, ເຫັນກົງຈັກເປັນດອກບົວ, ເຫັນຕີນງົວເປັນຕີນຄວາຍ ທີ່ແອບແຝງໄປດ້ວຍຄວາມໂກດ, ຄວາມໂລບ, ຄວາມຫລົງ ແລະ ຄວາມຕັນຫາຕາມືດນຳເອົາໂຣກຫ່າກ້ອມເຂົ້າມາແຜ່ຂະຫຍາຍໃນປະເທດເຮົາເປັນວົງກວ້າງໃນທົ່ວປະເທດ. ມາຮອດປັດຈຸບັນ ຈຳນວນຜູ້ຕິດເຊື້ອໄດ້ປາກົດຕົວ ແລະ ເພີ່ມຂຶ້ນໃນແຕ່ລະແຂວງໃນທົ່ວປະເທດດືບຂຶ້ນມາເປັນຫລັກ 500 ກວ່າຄົນແລ້ວ.

     ແຕ່ແນວໃດກໍຕາມ, ສິ່ງທີ່ເກີດຂຶ້ນນັ້ນ ມັນກໍເກີດຂຶ້ນແລ້ວ ພວກເຮົາບໍ່ສາມາດເຮັດທຸກສິ່ງທຸກຢ່າງໃຫ້ມັນຫວນກັບມາມີຄວາມສະຫງົບປົກກະຕິໃນມື້ໜຶ່ງຍາມດຽວໄດ້ ມັນກໍຕ້ອງໄດ້ອາໄສການເວລາ, ຊິດ່າຊິປ້ອຍສາບແຊ່ງກັນໄປເທົ່າໃດກໍຍິ່ງມີຄວາມກົດດັນ ແລະ ແຕກແຍກຄວາມສາມັກຄີກັນໄປຫລາຍເທົ່ານັ້ນ. ທ່ານນາຍົກລັດຖະມົນຕີ ພັນຄຳ ວິພາວັນ ຍັງໄດ້ແນະນຳຕັກເຕືອນວ່າ: ເຈົ້າດ່າຂ້ອຍ ຂ້ອຍດ່າເຈົ້ານັ້ນມັນບໍ່ດີ, ເວລານີ້ເຮົາຕ້ອງສາມັກຄີກັນ, ຕ້ອງພ້ອມກັນປະຕິບັດມາດຕະການທີ່ດີຂອງແພດໝໍ, ຕ້ອງໃຊ້ເຫດຜົນ ບໍ່ໃຫ້ໃຊ້ອາລົມ. ຕໍ່ຜູ້ເຈັບເປັນກໍຢ່າຫລິ້ນໂຊຊຽວມີເດຍຫລາຍ ໃຫ້ພະຍາຍາມພັກຜ່ອນປິ່ນປົວຕົນເອງໃຫ້ຫາຍດີ… ນີ້ຄືຄຳແນະນຳຕັກເຕືອນຂອງຜູ້ນຳທີ່ສະແດງຄວາມເປັນຫ່ວງເປັນໄຍຕໍ່ຜູ້ເຈັບເປັນ ແລະ ເປັນຫ່ວງນຳສະພາບການເມືອງທີ່ພວມຖືກວິກິດຈາກໂຄວິດ-19 ມາອາລະວາດທຳລາຍໃນສະພາບປັດຈຸບັນ.

ຜະນຶກກຳລັງມະຫາສາມັກຄີຕ້ານໂຄວິດ-19 - Wave100S AD to Website 2020 0 - ຜະນຶກກຳລັງມະຫາສາມັກຄີຕ້ານໂຄວິດ-19

     ຕໍ່ໜ້າສະພາບການອັນເປັນໜ້າສິ້ວໜ້າຂວານນີ້ ມັນກໍຍິ່ງກວ່າເວລາໃດໝົດທີ່ພວກເຮົາປວງຊົນລາວທັງຊາດຕ້ອງໄດ້ຮ່ວມມືກັນຜະນຶກກຳລັງສັງລວມເພື່ອຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ໝົດໄປຈາກສັງຄົມລາວ. ສິ່ງທີ່ພວກເຮົາຄວນສາມັກຄີ ແລະ ສາມາດຊ່ວຍພັກຊ່ວຍລັດ ກໍຄືຊ່ວຍພາລະກິດການປິ່ນປົວຂອງແພດໝໍໄດ້ນັ້ນ ມັນກໍມີຫລາຍປັດໄຈ ແລະ ຫລາຍວິທີການ ເປັນຕົ້ນປະຕິບັດຄຳສັ່ງເລກທີ 15/ນຍ ຂອງນາຍົກລັດຖະມົນຕີກ່ຽວກັບການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ທັງອອກແຮງອຸປະຖໍາຄໍ້າຊູວັດຖຸເງິນຄຳຕາມສັດທາ ແລະ ຄວາມສາມາດ ເພື່ອຊື້ຢຸກຢາທານັງຊ່ວຍການຈັດຕັ້ງພັກ-ລັດ ແລະ ເຈົ້າໜ້າທີ່ແພດໝໍຜູ້ທີ່ປິ່ນປົວຄົນເຈັບ. ອັນສຳຄັນທີ່ສຸດກໍຄືພາກັນຢູ່ບ້ານຢູ່ເຮືອນເພື່ອຈຳກັດບໍລິເວນການແຜ່ເຊື້ອ, ຖ້າບຸກຄົນໃດຫາກຮູ້ສຶກວ່າຕົນມີອາການສົງໄສ ຫລື ມີສ່ວນໄປກ່ຽວຂ້ອງກັບກຸ່ມສ່ຽງແລ້ວ ຄວນໄປລາຍງານຕົວດ່ວນນຳແພດໝໍ. ນອກຈາກນັ້ນ ກໍຍິ່ງລະມັດລະວັງໃນການໄປມາ, ກິນຢູ່ຊຸມແຊວທີ່ຝືນກັບເຈົ້າໜ້າທີ່ເພິ່ນຫ້າມ. ໃນກໍລະນີອັນຈຳເປັນເວລາອອກຈາກບ້ານຈາກເຮືອນໄປກໍຕ້ອງໃສ່ຜ້າອັດປາກ-ອັດດັງ, ໝັ່ນລ້າງມືດ້ວຍນໍ້າຢາຂ້າເຊື້ອ, ອະນາໄມລ້າງຕົນໂຕເລື້ອຍໆ ເຮັດໄດ້ສໍ່ານີ້ກໍຖືວ່າເຮົາສາມັກຄີກັນເປັນປຶກແຜ່ນໃນການຕ້ານການແຜ່ລະບາດຂອງພະຍາດໂຄວິດ-19 ໄດ້ເປັນຢ່າງດີ.

ຜະນຶກກຳລັງມະຫາສາມັກຄີຕ້ານໂຄວິດ-19 - WhatsApp Image 2020 05 27 at 5 - ຜະນຶກກຳລັງມະຫາສາມັກຄີຕ້ານໂຄວິດ-19
ຜະນຶກກຳລັງມະຫາສາມັກຄີຕ້ານໂຄວິດ-19 - WhatsApp Image 2020 05 27 at 5 - ຜະນຶກກຳລັງມະຫາສາມັກຄີຕ້ານໂຄວິດ-19
error: Alert: ເນື້ອຫາຂ່າວມີລິຂະສິດ !!