ຈີນ ຫ້າມກໍ່ສ້າງຕຶກສູງສຽດຟ້າ

ອີງຕາມການລາຍງານຈາກສຳນັກຂ່າວ Bloomberg ເມື່ອວັນທີ 7 ກໍລະກົດນີ້ ໃຫ້ຮູ້ວ່າ: ຈີນໄດ້ອອກຄຳປະກາດຫ້າມການກໍ່ສ້າງຕຶກສູງສຽດຟ້າທີ່ມີຄວາມສູງ 500 ແມັດ ຂຶ້ນເມື່ອ ເພື່ອຮັບປະກັນຄວາມປອດໄພ, ພາຍຫຼັງເກີດເຫດການ ຫໍຄອຍ 72 ຊັ້ນຢູ່ທີ່ເມືອງ ເສິນເຈິນ ແກວ່ງໄກວຜິດປົກະຕິ. ຄຳສັ່ງດັ່ງກ່າວຖືກປະກາດ ໂດຍຄະນະກຳມະການປັບປຸງ ແລະ ພັດທະນາແຫ່ງຊາດຈີນ ເມື່ອວັນທີ 6 ກໍລະກົດ. ອົງການດັ່ງກ່າວຍັງຮຽກຮ້ອງໃຫ້ອຳນາດການປົກຄອງທ້ອງຖິ່ນຈຳກັດສຸດຂີດຕໍ່ກັບການກໍ່ສ້າງຕຶກສູງກວ່າ 250 ແມັດ ຂຶ້ນເມື່ອ.

ການກໍ່ສ້າງຕຶກສູງກວ່າ 100 ແມັດ ຂຶ້ນເມື່ອ ຕ້ອງໃຫ້ສອດຄ່ອງ, ກົມກືນກັບລະດັບຂອງຕົວເມືອງ ເພື່ອໃຫ້ມີຄວາມສະດວກໃນເວລາກູ້ໄພ ມອດໄຟໄດ້ງ່າຍ. ຄະນະກຳມະການດັ່ງກ່າວໃຫ້ຮູ້ວ່າ ອັນເນື່ອງມາຈາກການຄຸ້ມຄອງທີ່ອ່ອນແອ ຂາດຄວາມຮັບຜິດຊອບຂອງອຳນາດການປົກຄອງທ້ອງຖິ່ນ ຈຶ່ງເຮັດໃຫ້ຄຸນນະພາບການກໍ່ສ້າງບໍ່ມີຄວາມຮັບປະກັນ.

ຂະນະນີ້ທົ່ວໂລກມີຫໍຄອຍສູງສຽດຟ້າ 10 ແຫ່ງທີ່ສູງໃນລະດັບ 500 ແມັດ ຂຶ້ນເມື່ອ, ໃນນັ້ນ 5 ແຫ່ງເປັນຂອງຈີນ ຊຶ່ງລວມມີ: ຫໍຄອຍຢູ່ທີ່ ຊຽງໄຮ້ ສູງ 632 ແມັດ, ສູນກາງການເງິນຢູ່ທີ່ ບິ່ງອານ ເສິນເຈີນ 599 ແມັດ, ສູນກາງການເງິນ CTF ຢູ່ທີ່ ກວາງໂຈ 530 ແມັດ, ສູນກາງການເງິນ CTF ຢູ່ທີ່ ທຽນຈີນ 530 ແມັດ ແລະ ຫໍຄອຍ CITIC ຢູ່ໃນນະຄອນຫຼວງປັກກິ່ງ ສູງ 528 ແມັດ.