ດ່ວນ! ຄະນະສະເພາະກິດເມືອງຈັນທະບູລີແຈ້ງໃຫ້ປິດຕະຫລາດທົ່ງຂັນຄຳພາກເຊົ້າ ເນື່ອງຈາກວ່າມີຊາວຄ້າຂາຍຕິດເຊື້ອພະຍາດໂຄວິດ-19

ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂ ການ ລະບາດ ພະຍາດໂຄວິດ-19 ເມືອງຈັນທະບູລີ ນະຄອນຫລວງວຽງຈັນ ໄດ້ອອກແຈ້ງການເລກທີ 914 ລົງໃນວັນທີ 27 ກັນຍາ 2021, ເລື່ອງຂໍຄວາມຮ່ວມມືໃຫ້ໂຈະການເປີດຕະຫລາດທົ່ງຂັນຄຳ ພາກເຊົ້າ 1 ແລະ ພາກເຊົ້າ 2, ເພື່ອເປັນການປະຕິບັດຄໍາສັ່ງຂອງທ່ານເຈົ້າຄອງນະຄອນຫລວງວຽງຈັນ ສະບັບເລກທີ 016/ຈນວ, ລົງວັນທີ 19 ກັນຍາ 2011 ໃຫ້ມີຄວາມເຂັ້ມງວດ ແລະ ໜັກແໜ້ນຕໍ່ມາດຕະການປ້ອງກັນ, ຄວບຄຸມ ແລະ ແກ້ໄຂ ການ ລະບາດຂອງພະຍາດໂຄວິດ-19 ເຊິ່ງປະຈຸບັນໄດ້ມີການແພ່ລະບາດເຂົ້າຫາຊຸມຊົນເປັນຈໍານວນຫລວງຫລາຍ, ສໍາລັບ ຕະຫລາດພາກເຊົ້າ 1, ບ້ານ ທົ່ງຂັນຄໍາ, ເມືອງຈັນທະບູລີ ເຊິ່ງມີຊາວຄ້າຂາຍມີຜູ້ຕິດເຊື້ອພະຍາດໂຄວິດ-19 ຕາມຜົນ ກວດອອກມາ ຄັ້ງວັນທີ 26 ກັນຍາ 2001 (ຜົນອອກມາເປັນບວກ), ຄະນະສະເພາະກິດເມືອຈັນທະບູລີ ຈຶ່ງຂໍຄວາມຮ່ວມມື ແລະ ຂໍຖືເປັນກຽດແຈ້ງມາຍັງທ່ານດັ່ງນີ້:

1. ໃຫ້ໂຈະຊົ່ວຄາວການເປີດບໍລິການຕະຫລາດພາກເຊົ້າ 1, ຕະຫລາດພາກເຊົ້າ 2 ຕັ້ງຢູ່ບ້ານ ທົ່ງຂັນຄໍາ, ເມືອງ ຈັນທະບູລີ ນັບແຕ່ວັນທີ 27–30 ກັນຍາ 2021 ເປັນຕົ້ນໄປ ເພື່ອໃຫ້ດໍາເນີນການສີດຢາຂ້າເຊື້ອ ແລະ ເຮັດອານາໄມຄວາມສະອາດໃນທົ່ວບໍລິເວນຕະຫລາດ ແລະ ຈຸດຂາຍສິນຄ້າຕາມມາດຕະການທີ່ຄະນະສະເພາະກິດວາງອອກ, ໃຫ້ຊາວຄ້າຂາຍທັງໝົດຢູ່ໃນ ຕະຫລາດ ແລະ ຂອບເຂດດ້ານນອກຕະຫລາດໃນວົງລັດສະໝີທີ່ຂະແໜງສາທາລະນະສຸກກໍານົດໃຫ້ໄປກວດຫາເຊື້ອພະຍາດໂຄວິດ-19 ແລະ ແຈ້ງເຈົ້າຂອງຕະຫລາດ, ຈັດສັນຕະຫລາດ, ໂຄສະນາເຜີຍແຜ່ ແລະ ແຈ້ງໃຫ້ຊາວຄ້າຂາຍ, ພະນັກງານຂອງຕົນບໍ່ໃຫ້ແຕກຕື່ນ ແລະ ຕິດຕາມອາການຂອງຕົນເອງຢູ່ບ້ານ (ໃນໄລຍະນີ້ບໍ່ໃຫ້ຊາວຄ້າຂາຍດັ່ງກ່າວໄປຂາຍຢູ່ຈຸດອື່ນໆ ເນື່ອງຈາກຈະເປັນການແຜ່ເຊື້ອ).
2. ໃຫ້ສືບຕໍ່ຕິດຕາມທິດຊີ້ນໍາຂອງຄະນະສະເພາະກິດ ເພື່ອປ້ອງກັນ, ຕ້ານ ແລະ ສະກັດກັ້ນການແຜ່ລະບາດພະຍາດໂຄວິດ – 19 ຕື່ມເພື່ອເປັນບ່ອນອີງໃນການພິຈາລະນາອານຸຍາດໃຫ້ສືບຕໍ່ເປີດ ຫລື ປິດການບໍລິການຄ້າຂາຍ ຢູ່ ໃນສະຖານທີ່ດັ່ງກ່າວ.

ດັ່ງນັ້ນ ຈຶ່ງໄດ້ແຈ້ງມາຍັງເຈົ້າຂອງທຸລະກິດດັ່ງກ່າວເພື່ອຊາບ ແລະ ຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ.