ສປປ ລາວ ຕັ້ງເປົ້າໝາຍການຜະລິດງົວມາດຕະຖານ ໃຫ້ໄດ້ 50.000 ໂຕຕໍ່ປີ ໃນປີທີ 3
ທ່ານ ນາງ ວິໄລພອນ ວໍລະພິມ ຫົວໜ້າກົມລ້ຽງສັດ ແລະ ການປະມົງ ກະຊວງກະສິກຳ ແລະ ປ່າໄມ້ ລາຍງານໃນດອງປະຊຸມ
ກອງປະຊຸມເຜີຍແຜ່ ແລະ ຜັນຂະຫຍາຍໂຄງການຜະລິດງົວ ເພື່ອການສົ່ງອອກໃນທົ່ວປະເທດ ຜ່ານລະບົບທາງໄກ ວັນທີ 15 ຕຸລາ 2021 ນີ້ໃຫ້ຮູ້ວ່າ:
ໂຄງການຜະລິດງົວເພື່ອການຄ້າ ໄດ້ກໍານົດເອົາ 18 ແຂວງໃນທົ່ວປະເທດ, ເຊິ່ງໄລຍະການຈັດຕັ້ງປະຕິບັດໂຄງການ 8 ປີ (2021-2028) ແລະຕ້ອງ ການດ້ານການລົງທຶນທັງໝົດ 1.765 ຕື້ກີບ, ໃນນີ້ເປັນທຶນຄົງທີ່ 90,1 ຕື້ກີບ ແລະ ທຶນງົວໜູນວຽນ 1.674,9 ຕື້ກີບ. ໂຄງການດັ່ງກ່າວ, ມີຈຸດປະສົງເພື່ອປະກອບສ່ວນສ້າງລາຍຮັບໃຫ້ປະເທດຊາດ ໂດຍສະ ເພາະແມ່ນຜະລິດງົວເພື່ອສົ່ງອອກໄປ ສປ ຈີນ. ສຳລັບການຄາດໝາຍຂອງການຜະລິດງົວມາດຕະຖານ ໃຫ້ໄດ້ 50.000 ໂຕຕໍ່ປີ ໃນປີທີ 3.
ສ່ວນວຽກງານຈຸດສຸມ ພວກເຮົາໄດ້ສ້າງຟາມພໍ່-ແມ່ພັນງົວ ເພື່ອຜະລິດລູກ, ລ້ຽງງົວຢ່ານົມ ແລະ ທອມງົວ, ໂດຍມີເປົ້າໝາຍໃຫ້ໄດ້ 100 ຝາມ ທີ່ມີຂະໜາດ 500 ໂຕ/ຮອບ ຂຶ້ນໄປ ແລະ ຄາດວ່າ ສປປ ລາວ ຈະມີງົວຊີ້ນ 50.000 ໂຕ/ປີ ຄິດເປັນມູນຄ່າ 251 ຕື້ກີບ/ປີ.
ຂໍ້ມູນ-ພາບ: ກະຊວງກະສິກຳ ແລະ ປ່າໄມ້
