ຂາຍແລ້ວ “Big John” ໄດໂນເສົາໄທຣເຊີຣາທອບ ອາຍຸ 66 ລ້ານປີ ມູນຄ່າ 6,65 ລ້ານເອີໂຣ
ນັກສະສົມຊາວອາເມລິກາ ຊະນະປະມູນຊື້ຊາກຟອສຊິລຂອງບິກ ຈອນ (Big John) ໄດໂນເສົາໄທຣເຊີຣາທອບທີ່ໃຫຍ່ ແລະ ສົມບູນທີ່ສຸດອາຍຸ 66 ລ້ານປີ ດ້ວຍເງິນ 6,65 ລ້ານເອີໂຣ.
ວັນທີ 21 ຕຸລາ 2021, ສຳນັກຂ່າວ BBC ລາຍງານວ່າ: ສະຖາບັນປະມູນດຣູໂອ ໃນນະຄອນຫລວງປາຣີສ ຂອງປະເທດຝຣັ່ງ ເປີດເຜີຍວ່າ: ຊາກຟອສຊິລຂອງບິກ ຈອນ (Big John) ໄດໂນເສົາໄທຣເຊີຣາທອບທີ່ໃຫຍ່ທີ່ສຸດໃນໂລກ ຖືກຂາຍເຂົ້າຕະຫລາດໃນເມືອງຫລວງຂອງຝຣັ່ງ ແລະ ມີການປະມູນຈາກນັກສະສົມຊາວອາເມລິກາໃນລາຄາສູງທີ່ສຸດເປັນປະຫວັດສາດເຖິງ 6,65 ລ້ານເອີໂຣ ຫລັງຈາກທາງສະຖາບັນປະມູນ ໄດ້ນຳເອົາໂຄງກະດູກຊຸດນີ້ອອກສະແດງ ແລະ ເປີດປະມູນຂາຍເມື່ອອາທິດຜ່ານມາ.
ສຳລັບຟອສຊິລ Big John ເປັນໂຄງກະດູກໄດໂນເສົາກິນພືດ 3 ເຂົາໄທຣເຊີຣາທອບ ຂະໜາດໃຫຍ່ທີ່ສຸດເທົ່າທີ່ມີການຂຸດພົບມາ ໂດຍມີຄົນຂຸດພົບໃນລັດເຊົາດາໂກຕາ ຂອງອາເມລິກາ ເມື່ອປີ 2014 ຄາດວ່າມັນເຄີຍມີຊີວິດຢູ່ໃນຍຸກຄຣີເທເຊຍ ເມື່ອປະມານ 66 ລ້ານປີກ່ອນ ແລະ ຖືກຝັງຢູ່ໃນຂີ້ຕົມ ເຊິ່ງເກັບຮັກສາກະດູກໄດໂນເສົາໄວ້ເປັນເວລາຫລາຍລ້ານປີ.
ໂດຍຊິ້ນສ່ວນ 200 ຊິ້ນ ລວມທັງກະໂຫລກຫົວຟອລຊິລ Big John ມີຄວາມຍາວເຖິງ 2,62 ແມັດ ແລະ ກວ້າງ 2 ແມັດ ແລະ ຂະໜາດເຂົາທີ່ຍາວ 1,1 ແມັດ ແລະ ຄວາມໜາກວ່າ 30 ຊັງຕີແມັດ ຖືກປະກອບຢ່າງພິຖີພິຖັນໂດຍຜູ້ຊ່ຽວຊານໃນເມືອງຕຣີເອສເຕ ປະເທດອິຕາລີ ປະກອບເປັນໂຄງກະດູກຍາວ 8 ແມັດ, ສູງ 3 ແມັດ ຄວາມສົມບູນໂດຍລວມຢູ່ທີ່ 60% ຄວາມສົມບູນຂອງກະໂຫລກຢູ່ທີ່ 75%.
