ທະນາຄານໂລກຕັດເງິນຊ່ວຍເຫລືອຊູດານ ກຳມະກອນນ້ຳມັນ-ແພດຮ່ວມຕ້ານລັດຖະປະຫານ

ທະນາຄານໂລກປິດທາງຊ່ວຍເຫລືອທາງການເງິນຊູດານ ຫລັງກອງທັບກໍ່ລັດຖະປະຫານ ແລະ ອອກມາສັງຫານຜູ້ບໍ່ເຫັນພ້ອມ, ສ່ວນປະຊາຊົນນັດປະທ້ວງຕ້ານລັດຖະປະຫານ.

ວັນທີ 28 ຕຸລາ 2021, ສຳນັກຂ່າວຣອຍເຕີລາຍງານວ່າ: ທະນາຄານໂລກຢຸດການສົ່ງເງິນຊ່ວຍເຫລືອປະຕິບັດການທາງເສດຖະກິດໃຫ້ຊູດານນັບແຕ່ວັນທີ 27 ຕຸລາເປັນຕົ້ນມາ ເພື່ອເປັນການຕອບໂຕ້ການຢຶດອຳນາດຂອງກອງທັບທີ່ລົ້ມລ້າງລັດຖະບານປ່ຽນຜ່ານສູ່ປະຊາທິປະໄຕ. ຂະນະທີ່ແຮງງານລັດວິສາຫະກິດຜະລິດນ້ຳມັນຂອງລັດ, ແພດ ແລະ ນັກບິນ ພາກັນລວມກຸ່ມຢຸດວຽກເພື່ອປະທ້ວງ.

ພາບຫລ້າສຸດໃນພື້ນທີ່ມີຄົນຮ່ວມອອກມາປະທ້ວງຕໍ່ຕ້ານການລັດຖະປະຫານຫລາຍພັນຄົນ ນັບແຕ່ການລັດຖະປະຫານເກີດຂຶ້ນໃນວັນທີ 25 ຕຸລາຜ່ານມາ ໂດຍມີນາຍພົນອັບເດລ ຟາຕາ ອັລເບີຮາມ ເປັນຜູ້ນຳ ແລະ ມີຜູ້ຖືກສັງຫານຢ່າງໜ້ອຍ 7 ຄົນແລ້ວໃນເຫດປະທະລະຫວ່າງປະຊາຊົນ ແລະ ກອງທັບທີ່ເກີດຂຶ້ນຈາກການຊຸມນຸມປະທ້ວງ. ຜູ້ນຳລະບຸວ່າ: ຈຳເປັນຕ້ອງປາບປາມເພື່ອປ້ອງກັນບໍ່ໃຫ້ເກີດສົງຄາມກາງເມືອງ.

ເຫດດັ່ງກ່າວເຮັດໃຫ້ທະນາຄານໂລກຕັດສິນໃຈຢຸດສົ່ງເງິນສະໜັບສະໜູນ ແລະ ດຳເນີນການປະຕິບັດການໃນຊູດານຕໍ່ ໂດຍກ່ອນໜ້ານີ້ມີແຜນໃນການເຂົ້າໄປພັດທະນາສາທາລະນູປະໂພກຕ່າງໆຂອງຊູດານ ເຊິ່ງເປັນໜຶ່ງໃນປະເທດທຸກຍາກທີ່ສຸດໃນອາຟຣິກາ.

ທັງນີ້, ຊູດານຊິນເຄີຍກັບການຕັດຂາດທາງການເງິນຂອງໜ່ວຍງານຂ້າມຊາດມາຢ່າງຕໍ່ເນື່ອງ ເນື່ອງຈາກລະຫວ່າງທີ່ຢູ່ໃຕ້ອຳນາດຂອງລັດຖະບານຜະເດັດການ ໂອມາ ອັລ ບາຊີ ກໍຖືກຕັດເງິນຊ່ວຍເຫລືອຕ່າງໆມາກວ່າ 30 ປີ ຈົນມີການລຸກຮືຂອງປະຊາຊົນໂຄ່ນລົ້ມລະບອບໄດ້ສຳເລັດໃນປີ 2019 ຈຶ່ງມີການເຂົ້າມາຊ່ວຍເຫລືອທາງການເງິນຈາກທະນາຄານໂລກ ໂດຍໄດ້ວົງເງິນ 2 ພັນລ້ານໂດລາ.

ຈົນວັນທີ 25 ຕຸລາຜ່ານມາ ເກີດການລັດຖະປະຫານຂຶ້ນ ແລະ ຫລັງການລັດຖະປະຫານ ນາຍພົນເບີຮາມ ໄດ້ຍຸບສະພາທີ່ເປັນການຕົກລົງຮ່ວມລະຫວ່າງພົນລະເມືອງ ແລະ ທະຫານ ເພື່ອປ່ຽນຜ່ານສູ່ການເລືອກຕັ້ງແບບປະຊາທິປະໄຕ ເຊິ່ງເກີດຂຶ້ນຫລັງປະຊາຊົນຊູດານລຸກຮືຂັບໄລ່ທ່ານ ໂອມາ ອັລ ບາຊີ ຜະເດັດການ ເຊິ່ງຄອງອຳນາດມາຢ່າງຍາວນານໄດ້ສຳເລັດເມື່ອປີ 2019 ປິດສາກຄວາມຫວັງເຂົ້າສູ່ປະຊາທິປະໄຕຂອງຊູດານທີ່ມີລົມຫາຍໃຈສັ້ນພຽງປີກວ່າ.

ອ້າງອີງ:

https://www.reuters.com/…/sudan-state-oil-workers-join…/