ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ 

ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ  - kitchen vibe - ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ 
ໃນວັນທີ 8 ພະຈິກ 2021 ນີ້, ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ (ອອປສ) ໄດ້ຊີ້ແຈງຕໍ່ຄວາມຄິດເຫັນຂອງບັນດາສະມາຊິກສະພາແຫ່ງຊາດ ຕໍ່ບົດລາຍງານການປະຕິບັດສິດ, ໜ້າທີ່ຂອງ ອອປສ ໃນ 9 ເດືອນຜ່ານມາ ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX , ໃນຮູບແບບທາງໄກ ພາຍໃຕ້ການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ.
ທ່ານ ໄຊຊະນະ ໂຄດພູທອນ ກ່າວວ່າ: ຜ່່ານການຕິດຕາມຄວາມເຫັນຂອງ ສສຊ ມີ 19 ຄຳຖາມສັງລວມອອກເປັນ 4 ກຸມໃຫຍ່ ຊຶ່ງຕິດພັນໂດຍກົງກັບການປະຕິບັດພາລະບົດບາດຂອງ ອອປສ ຊຶ່ງຂ້າພະເຈົ້າຂໍຊີ້ແຈງຕໍ່ຄຳຊັກຖາມຈຳນວນໜຶ່ງ, ອອປສ ມີພາລະບົດບາດໃນການຕິດຕາມກວດກາການປະຕິບັດກົດໝາຍໃນທົ່ວສັງຄົມ ເປັນພາລະບົດບາດທີ່ກວ້າງຂວາງພົວພັນກັບຫຼາຍຂົງເຂດວຽກງານ, ຜ່ານການຈັດຕັ້ງປະຕິບັດໃນ 9 ເດືອນຜ່ານມາ ອອປສ ແລະ ອົງການໄອຍະການປະຊາຊົນທ້ອງຖິ່ນໄດ້ຈັດຕັ້ງປະຕິບັດວຽກງານດັ່ງກ່າວດ້ວຍຄວາມຮັບຜິດຊອບ​ສູງເຊັ່ນ: ໄດ້ຕິດຕາມຊຸກຍູ້ບັນດາອົງການຈັດຕັ້ງຂອງລັດ ແລະ ອົງການຈັດຕັ້ງມະຫາຊົນ, ອົງການປົກຄອງທ້ອງຖິ່ນ ວິສາຫະກິດ ພົນລະເມືອງໃນການຈັດຕັ້ງປະຕິບັດກົດໝາຍ ແລະ ນິຕິກຳໃຕ້ກົດໝາຍຢູ່ໃນຂົງເຂດຂອງເຂົາເຈົ້າຢ່າງເຂັ້ມງວດ ດ້ວຍການໂຄສະນາເຜີຍແຜ່ກົດໝາຍໃຫ້ສັງຄົມຮັບຮູ້, ເຂົ້າໃຈດ້ວຍຮູບການຕ່າງໆ ຜ່ານການຈັດຕັ້ງປະຕິບັດດັ່ງກ່າວເຫັນໄດ້ວ່າສະຕິໃນການຈັດຕັ້ງປະຕິບັດກົດໝາຍຢູ່ອົງການຈັດຕັ້ງຂອງລັດ-ສັງຄົມ ແລະ ອົງ​ການປົກຄອງທ້ອງຖິ່ນ ວິສາຫະກິດ ພົນລະເມືອງ ແມ່ນນັບມື້ນັບດີຂຶ້ນເທື່ອລະກ້າວ ສະແດງອອກພົນລະເມືອງຮູ້ນໍາໃຊ້ສິດຂອງຕົນຕາມທີ່ລັດຖະທຳມະນູນ ແລະ ກົດໝາຍກຳນົດໄວ້, ຜ່ານມາອົງການໄອຍະການປະຊາຊົນຂັ້ນຕ່າງໆ ໄດ້ປະກອບພະນັກງານສອບສວນໃນຄະນະສະເພາະກິດຂັ້ນສູນກາງ ແລະ ທ້ອງຖິ່ນ ເພື່ອຕິດຕາມກວດກາຂະແໜງການຕ່າງໆ, ຜ່ານການເຂົ້າຮ່ວມ ສາມາດເກັບໂຮມໄດ້ຊັບສິນຈຳນວນໜຶ່ງ, ຈຳນວນໜຶ່ງພວມກຳລັງດຳເນີນການກວດສອບຢ່າງເຄັ່ງຮ້ອນ.
ສຳລັບວຽກທີ່ພວກເຮົາປະຕິບັດໄດ້ຍາກ ແມ່ນການກວດກາການອອກນິຕິກຳຂອງບັນດາກະຊວງຂອງລັດ ຂອງອົງການຈັດຕັ້ງສັງຄົມ ແລະ ຂອງອົງການປົກຄອງທ້ອງຖິ່ນອື່ນໆ ແລະ ບັນຫາທີ່ພວມປະເຊີນໃນປັດຈຸບັນນີ້ອັນໜຶ່ງແມ່ນຂີດຄວາມສາມາດຂອງພະນັກງານຍັງຈຳກັດ ແລະ ບໍ່ທັນເປັນເຈົ້າການແທ້ໃນການປະຕິບັດພາລະບົດບາດດັ່ງກ່າວຢ່າງເຕັມສ່ວນ, ກົນໄກປະສານງານລະຫວ່າງພາກສ່ວນຕ່າງໆແຕ່ສູນກາງລົງຮອດທ້ອງຖິ່ນຍັງຢູ່ໃນຂອບຈຳກັດ, ຄວາມຮູ້ ຄວາມເຂົ້າໃຈຕໍ່ວຽກງານກວດກາທົ່ວໄປຂອງພາກສ່ວນຕ່າງໆຕໍ່ອົງການໄອຍະການຍັງບໍ່ທັນກວ້າງຂວາງ, ກົດໝາຍກຳນົດພາລະບົດບາດຍັງມີລັກສະນະຊໍ້າຊ້ອນ ເຮັດໃຫ້ມີຄວາມຫຍຸ້ງຍາກໃນການແກ້ໄຂ.
ສຳລັບທິດທາງໃນຕໍ່ໜ້ານີ້, ພວກເຮົາຈະສຸມໃສ່ສ້າງກົນໄກການປະສານງານກັບກະຊວງກະສິກຳ-ປ່າໄມ້ ແລະ ກະຊວງການເງິນ ປັດຈຸບັນກຳລັງດຳເນິີນການກະກຽມສ້າງນິຕິກຳ, ສ້າງກົນໄກຮ່ວມກັນ, ສຳ​ລັບວຽກງານຕິດຕາມກວດກາການປະຕິບັດຄຳຕັດສິນຂອງສານ ໄລຍະຜ່ານມາພວກເຮົາກໍໄດ້ເອົາໃຈໃສ່ໂດຍໄດ້ຕິດຕາມກວດກາ ແລະ ເກັບກຳສະຖິຕິຄຳຕັດສິນຂອງສານ, ຄະດີແພ່ງ ແລະ ຄະດີອາຍາໃນ 9 ເດືອນຜ່ານມາມີ 41.027 ເລື່ອງ. ໃນນັ້ນສາມາດປະຕິບັດໄດ້ພຽງແຕ່ 11,40% ສາເຫດໃນການປະຕິບັດບໍ່ໄດ້ສ່ວນຫລາຍແມ່ນຍ້ອນຄູ່ຄວາມບໍ່ຍອມປະຕິບັດ ມີການຂຽນຄຳຮ້ອງໄປຫລາຍບ່ອນເພື່ອແກ່ຍາວເວລາ, ປັດຈຸບັນພວກເຮົາຕິດຕາມກວດກາຄຳຮ້ອງ ແລະ ຄຳສະເໜີຂອງການຈັດຕັ້ງ ແລະ ພົນລະເມືອງກ່ຽວກັບການຕັດສິນຂອງສານເທົ່ານັ້ນ, ສຳ​ລັບການ​ຕິດ​ຕາ​ມກວດ​ກາ​ອົງ​ການ​ສືບ​ສວນ-ສອບ​ສວນ​ ໂດຍ​ສະ​ເພາະ​ແມ່ນ​ການ​ນຳ​ໃຊ້​ມາດ​ຕະ​ການ​ສະ​ກັດ​ກັ້ນ​ເຊັ່ນ: ການ​ຈັບ​ໂຕ, ປ່ອຍ​ໂຕ ແລະ ອື່ນໆ, ພວ​ກ​ເຮົາ​ໄດ້​ເພີ່ມ​ທະ​ວີ​ສ້າງ​ຄວາມ​ຮັບ​ຮູ້​ເຂົ້າ​ໃຈ​ດ້ານທິດ​ສະ​ດີ ແລະ ພຶດ​ຕິ​ກຳ​ຮ່ວມ​ກັນ ​ໂດຍ​ສະ​ເພາະ​ແມ່ນ​ກົດ​ໝາຍ​ວ່າ​ດ້ວຍ​ການ​ດຳ​ເນີນ​ຄະ​ດີ​ອາ​ຍາ, ກົດ​ ໝາຍ​ວ່າ​ດ້ວຍ​ປະ​ເມີນ​ອາ​ຍາ​ເພື່ອ​ຮັບ​ປະ​ກັນ​ເຮັດ​ໃຫ້​ຜູ້​ກະ​ທຳ​ຜິດ​ໄດ້​ຮັບ​ການ​ລົງ​ໂທດ ຊຶ່ງໃນ 9 ເດືອນ​ຜ່​ານ​ມາ​ຄະ​ດີ​ອາ​ຍາ​ທົ່ວ​ປະ​ເທດມີ 6.756 ເລື່ອງ, ມີ​ການ​ສັ່ງ​ຟ້ອງ​ສານ​ຈຳ​ນວນ 3.847 ເລື່ອງ, ສົ່ງ​ຄືນ​ໃຫ້​ເຈົ້າ​ໜ້າ​ທີ່​ດຳ​ເນີນ​ການ​ສືບ​ສວນ-ສອບ​ສວນ​ຄື​ນ 1.641 ເລື່ອງ, ພ້ອມນັ້ນໃນ 9 ເດືອນ​ ຍັງໄດ້ມີ​ການ​ປະ​ຕິ​ບັດ​ວິ​ໄນ​ພະ​ນັກ​ງານ​ທີ່​ກົດ​ໜ່ວງ​ທ່ວງ​ດຶງ ມີ​ການ​ເອົາ​ສິນ​ຈ້າງ​ລາງວັນ, ສຳ​ລັບທິດ​ທາງ​ແກ້​ໄຂ​ຕໍ່​ໜ້າ​ຈະ​ນຳ​ໃຊ້​ກົນ​ໄກ​ຮ່ວມ​ກັນ​ລະ​ຫວ່າງ​ອົງ​ການ​ໄອ​ຍະ​ການ ແລະ ກະ​ຊວງ​ປ້ອງ​ກັນ​ຄວາ​ມ​ສະ​ຫງົບ ເພື່ອປຶກ​ສາ​ຫາ​ລືແລກ​ປ່ຽນ​ຄຳ​ເຫັນ​ຮ່ວມ​ກັນ​ໂດຍ​ສະ​ເພາະ​ບັນ​ຫາ​ທີ່​ຄົງ​ຄ້າງ​ການ​ກັກ​ຂັງ​ເກີນ​ກຳ​ນົດ, ຈະ​ກວ​ດກາ​ຮ່ວມ​ກັນ ແລະ ແກ້​ໄຂ​ເປັນ​ແຕ່​ລະ​ກໍ​ລະ​ນີ​ໄປ.
ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ  - 4 - ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ 
ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ  - 3 - ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ 
ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ  - 5 - ອົງການໄອຍະການປະຊາຊົນສູງສຸດ ຊີ້ແຈງ ຕໍ່ຄຳເຈາະຈີ້ມຂອງ ສສຊ