ອັງກິດກຽມຮັບຮອງການໃຊ້ວັກຊີນ Sinovac, Sinopharm ແລະ Covaxin ຫລັງຜ່ານການອະນຸມັດຂອງ WHO
ວັນທີ 9 ພະຈິກ 2021, ທາງການອັງກິດກຽມຮັບຮອງການໃຊ້ວັກຊີນສັນຊາດຈີນຊະນິດເຊື້ອຕາຍຄື Sinovac ແລະ Sinopharm ລວມທັງວັນຊີນສັນຊາດອິນເດຍຄື Covaxin ຫລັງວັກຊີນທັງ 3 ຊະນິດນີ້ຜ່ານການອະນຸມັດຈາກອົງການອະນາໄມໂລກ (WHO) ໃຫ້ສາມາດນຳໃຊ້ໄດ້ເປັນກໍລະນີສຸກເສີນ ເພື່ອຕອບຮັບກະແສການເດີນທາງຂອງນັກທ່ອງທ່ຽວຕ່າງປະເທດທີ່ມີທ່າອ່ຽງຈະເດີນທາງເຂົ້າປະເທດຫລາຍຂຶ້ນ.
ຜ່ານມາ ອັງກິດໃຊ້ວັກຊີນ AstraZeneca, Pfizer-BioNTech ແລະ Moderna ເປັນວັກຊີນຫລັກໃນການຮັບມືການແຜ່ລະບາດຂອງພະຍາດໂຄວິດ. ການຮັບຮອງວັກຊີນອີກ 3 ຊະນິດນີ້ ຈະເປີດໂອກາດໃຫ້ນັກທ່ອງທ່ຽວຕ່າງປະເທດທີ່ສັກວັກຊີນເຫລົ່ານີ້ຄົບໂດສແລ້ວເຊັ່ນ: ສະຫະລັດອາຣັບເອມິເຣດ, ມາເລເຊຍ, ອິນເດຍ ມີທ່າອ່ຽງຈະສາມາດເດີນທາງເຂົ້າອັງກິດໄດ້ຫລາຍຂຶ້ນ ໂດຍຈະມີຜົນນັບແຕ່ວັນທີ 22 ພະຈິກນີ້.
ນອກຈາກນີ້, ທາງການອັງກິດຍັງເປີດເຜີຍອີກວ່າ: ກົດຂໍ້ບັງຄັບທີ່ໃຊ້ກັບເດັກຈະບໍ່ຂຶ້ນຢູ່ກັບຖິ່ນທີ່ຢູ່ອາໄສອີກຕໍ່ໄປ ກົດເກັນທີ່ຈະໃຊ້ກັບເດັກທີ່ອາໄສຢູ່ໃນອັງກິດ ຫລື ປະເທດທີ່ມີຫລັກຖານການສັກວັກຊີນທີ່ໄດ້ຮັບການອະນຸມັດຈະມີຜົນບັງຄັບໃຊ້ກັບເດັກທຸກຄົນ ໂດຍເດັກທີ່ມີອາຍຸແຕ່ 17 ປີລົງມາ ບໍ່ຈຳເປັນຕ້ອງກັກຕົວເມື່ອເດີນທາງເຂົ້າອັງກິດ ເຊິ່ງເດັກທີ່ມີອາຍຸແຕ່ 4 ປີລົງມາ ບໍ່ຈຳເປັນຕ້ອງກວດຫາການຕິດເຊື້ອໃດໆ. ຂະນະທີ່ເດັກອາຍຸ 5-17 ປີ ບໍ່ຈຳເປັນຕ້ອງກວດຫາເຊື້ອກ່ອນເດີນທາງເຂົ້າອັງກິດ, ແຕ່ຕ້ອງກວດຫາເຊື້ອ 1 ຄັ້ງ ໃນວັນທີ 2 ໂດຍນັບວັນທີ່ເດີນທາງເຖິງເປັນວັນທີ 0.
ຂະນະທີ່ເດັກທີ່ອາໄສຢູ່ໃນປະເທດອື່ນໆ (ບໍ່ໄດ້ຢູ່ໃນອັງກິດ ຫລື ປະເທດທີ່ມີຫລັກຖານການສັກວັກຊີນທີ່ໄດ້ຮັບການອະນຸມັດ) ຖ້າອາຍຸແຕ່ 11 ປີຂຶ້ນໄປ ຈຳເປັນຕ້ອງກວດຫາການຕິດເຊື້ອກ່ອນເດີນທາງເຂົ້າອັງກິດ, ກວດຫາເຊື້ອ 2 ຄັ້ງ ໃນວັນທີ 2 ແລະ ວັນທີ 8 ໂດຍນັບວັນທີີ່ເດີນທາງເຖິງເປັນວັນທີ 0 ເຊິ່ງຍັງຕ້ອງກັກຕົວ 10 ວັນ.
ອ້າງອີງ:
- https://www.reuters.com/world/uk/uk-add-chinas-sinovac-indias-covaxin-approved-vaccine-list-2021-11-08/
- https://www.channelnewsasia.com/asia/uk-add-chinas-sinovac-indias-covaxin-approved-vaccine-list-2299501
- https://coronavirus.data.gov.uk/details/cases
- https://www.gov.uk/guidance/travel-to-england-from-another-country-during-coronavirus-covid-19
