ເຈົ້າໜ້າທີ່ລົງແກ້ໄຂສະຖານບັນເທີງອ໋ອສກາ ທີ່ມົ້ວສຸມດື່ມສິ່ງມຶນເມົາ ແລະ ສິ່ງເສບຕິດ ລະເມີດຄຳສັ່ງ ແລະ ແຈ້ງການຂອງຄະນະສະເພາະກິດ

ອີງຕາມ ປກສ ນວ ລາຍງານວ່າ: ໃນເວລາ 1:00 ໂມງ ຂອງວັນທີ 10 ພະຈິກ 2021 ເຈົ້າໜ້າທີ່ກອງພັນປ້ອງກັນເຄື່ອນທີ່ໄວ ກອງບັນຊາການ ປກສ ນະຄອນຫລວງວຽຈັນ ໄດ້ຮັບລາຍງານຈາກພົນລະເມືອງວ່າ: ຮ້ານບັນເທີງອ໋ອສກາ ຕັ້ງຢູ່ບ້ານໂພນຕ້ອງສະຫວາດ ເມືອງຈັນທະບູລີ ນະຄອນຫລວງວຽງຈັນ ເປີດບໍລິການໃຫ້ລູກຄ້າເຂົ້າມາໃຊ້ບໍລິການ ກິນດື່ມມ່ວນຊື່ນໂດຍຂັດກັບມາດຕະການຂອງຄະນະສະເພາະກິດວາງອອກ.

ພັຕ ໂດນ ວົງໄກສອນ ຮອງຫົວໜ້າສຳນັກກອງພັນປ້ອງກັນເຄື່ອນທີ່ ໃຫ້ຮູ້ວ່າ: ຜ່ານການລົງກວດກາຮ້ານບັນເທີງອ໋ອສກາ ພົບເຫັນຜູ້ລະເມີດຄໍາສັ່ງ ແລະ ແຈ້ງການ ເຂົ້າໃຊ້ບໍລິການ, ມົ້ວສຸມກິນດື່ມສິ່ງມືນເມົາຫລາຍຊະນິດ ຈຳນວນ 46 ຄົນ ຍິງ 21 ຄົນ; ໃນນີ້ ສັນຊາດຈີນ 24 ຄົນ ຍິງ 3 ຄົນ ຜ່ານການກວດກາໃນຮ້ານບັນເທີງ ພົບເຫັນສິ່ງທີ່ຜິດກົດໝາຍຫລາຍລາຍການເຊັ່ນ: ຜົງເສບຕິດສີຂາວ 2 ຜົງ, ພົບເຫັນເງິນ 25,700 ໂດລາ ຊຸກເຊື່ອງໄວຢູ່ຫ້ອງ, ບັ້ງອົກຊີແຊນ 7 ບັ້ງ, ປຸມເປົ້າໃຊ້ສຳລັບບັນຈຸອົກຊີໄວ້ສູບດົມ 97 ໜ່ວຍ ແລະ ເຄື່ອງຂອງອີກຈຳນວນໜື່ງ.

ຕໍ່ກັບບັນຫາດັ່ງກ່າວ ແລະ ເຈົ້າຂອງຮ້ານ ເຈົ້າໜ້າທີ່ກຳລັງສອບສວນເປີດກວ້າງເກັບກຳເອົາຂໍ້ມູນຫລັກຖານ, ສ່ວນຜູ້ມາໃຊ້ບໍລິການຈຳນວນ 46 ຄົນ, ຍິງ 21 ຄົນ ພາຍຫລັງເອົາຂໍ້ມູນເບື້ອງຕົ້ນສຳເລັດ ຈະໄດ້ນຳໄປກັກກັນ ເພື່ອກວດຫາເຊື້ອພະຍາດໂຄວິດ-19 ແລ້ວຈຶ່ງຈະນໍາຕົວມາດໍາເນີນຄະດີຕາມກົດໝາຍ.