ລັກເຫລັກໂຄງການເສັ້ນທາງລົດໄຟ ຖືກຕິດຕາມຈັບດຳເນີນຄະດີ

ອີງຕາມປ້ອງກັນຄວາມສະຫງົບນະຄອນຫລວງວຽງຈັນ ລາຍງານວ່າ: ວັນທີ 7 ມັງກອນ ຜ່ານມາ, ເຈົ້າໜ້າທີ່ໜ່ວຍງານຕໍາຫລວດທາງລົດໄຟ ປກສ ເມືອງໄຊເສດຖາ ໄດ້ເຂົ້າຈັບຕົວ ທ້າວ ທອງ ອາຍຸ 33 ປີ ກຳມະກອນ ພັກເຊົາຢູ່ແຄັມກໍ່ສ້າງ ບ້ານນາຄວາຍໃຕ້ ເມືອງໄຊເສດຖາ ນະຄອນຫຼວງວຽງຈັນ ໄປດຳເນີນຄະດີ ລັກຊັບພົນລະເມືອງ (ລັກເຫລັກທາງລົດໄຟ).

ເຈົ້າໜ້າທີ່ ປກສ ເມືອງໄຊເສດຖາ ໃຫ້ຮູ້ວ່າ: ພາຍຫລັງໄດ້ຮັບລາຍງານວ່າ ມີຄົນລັກເຫລັກທາງລົດໄຟ ແລ້ວເອົາໄປຊຸກເຊື່ອງໄວ້ ຢູ່ປ່າແຄມທາງ ເຂດບ້ານນາຄວາຍໃຕ້, ຜ່ານການລົງກວດກາ ກໍສືບຮູ້ຜູ້ກໍ່ເຫດລັກລັກໃນຄັ້ງ ຊື່ ທ້າວ ທອງ ອາຍຸ 33 ປີ ກຳມະກອນ ພັກເຊົາຢູ່ແຄັມກໍ່ສ້າງ ບ້ານນາຄວາຍໃຕ້ ຈຶ່ງໄດ້ຈັບຕົວ,ພ້ອມທັງ ເກັບກູຂອງກາງເຫຼັກຕະຂໍ ຈຳນວນ 80 ເສັ້ນ ແລະ ເຫລັກຄໍ້າ 4 ທ້ອນ.
ຜ່ານການສອບສວນເບື້ງຕົ້ນ ຜູ້ກ່ຽວຮັບສາລະ ພາບວ່າ: ວັນທີ 6 ມັງກອນ 2022, ໄດ້ໄປລັກເອົາເຫຼັກເຮັດທາງລົດໄຟ. ຫລັງຈາກນັ້ນ, ໄດ້ຂັບຂີ່ລົດ ຈັກໄປທາງບ້ານຊຽງດາ ເພື່ອຈະນໍາເອົາເຫລັກ ຈໍານວນດັ່ງກ່າວໄປຂາຍ ແຕ່ພົບເຫັນ ປກສ ບ້ານຊຽງດາ ເລາະກວດກາລາດຕະເວນ ຈຶ່ງເອົາເຫຼັກໄປຊຸກເຊື່ອງໄວ້ແຄມປ່າ ແຕ່ມີຄົນມາພົບເຫັນເຫລັກ,ແລ້ວຖືກຕິດຕາມຈັບ ມາດຳເນີນຄະດີ.