ຮົງກົງພົບຜູ້ຕິດເຊື້ອສູງເຖິງ 2.000 ສູງທີ່ສຸດນັບແຕ່ໂຄວິດລະບາດ ເຜີຍລະບົບສາທາລະນະສຸກເລີ່ມຮັບບໍ່ໄຫວ
ນະໂຍບາຍກົດໂຄວິດເປັນສູນໃນຮົງກົງພັງ ຈຳນວນຜູ້ຕິດເຊື້ອເພີ່ມກວ່າ 20 ເທົ່າໃນ 2 ອາທິດ ກຽມສ້າງໂຮງໝໍສະໜາມຮັບມື.
ວັນທີ 14 ກຸມພາ 2022, ສຳນັກຂ່າວບລູມເບິກ (Bloomberg) ລາຍງານວ່າ: ພົບຈຳນວນຜູ້ຕິດເຊື້ອໂຄວິດ-19 ປະຈຳວັນຂອງຮົງກົງເກີນ 2.000 ຄົນເປັນຄັ້ງທຳອິດ, ຂະນະທີ່ນະໂຍບາຍກົດໂຄວິດເປັນສູນທີ່ພະຍາຍາມເຮັດຕາມຈີນ ກຳລັງສ້າງພາລະໃຫ້ລະບົບສາທາລະນະສຸກຢ່າງໜັກ.
ໜ່ວຍງານສາທາລະນະສຸກຮົງກົງເປີດເຜີຍຕົວເລກຜູ້ຕິດເຊື້ອຢ່າງເປັນທາງການປະຈຳວັນທີ 14 ກຸມພາ 2022 ມີ 2.071 ຄົນ ແລະ ຍັງມີອີກ 4.500 ຄົນທີ່ມີຜົນກວດເບື້ອງຕົ້ນເປັນບວກແຍກອອກມາຕ່າງຫາກ.
ໂດຍຈຳນວນຜູ້ຕິດເຊື້ອໃນປັດຈຸບັນນັ້ນສູງເກີນກວ່າທີ່ໂຮງໝໍລັດຈະຮັບໄຫວແລ້ວ ເຮັດໃຫ້ຕ້ອງມີການປ່ຽນແປງນະໂຍບາຍ ໂດຍເນັ້ນໃສ່ການປິ່ນປົວຜູ້ສູງອາຍຸ ແລະ ເດັກທີ່ຕິດໂຄວິດກ່ອນ.
ທາງການຮົງກົງແຈ້ງວ່າ: ມີຜູ້ຕິດເຊື້ອອີກຫລາຍພັນທີ່ລໍຖ້າເຂົ້າຮັບການປິ່ນປົວໃນໂຮງໝໍ ແລະ ຍັງມີຈຳນວນຕົວຢ່າງອີກຈຳນວນຫລາຍໃນສູນກວດໂຄວິດທີ່ລໍຖ້າການກວດຢູ່ ເຮັດໃຫ້ເກີດຄວາມຊັກຊ້າໃນການຢືນຢັນຜົນ.
ເຖິງວ່າການລະບາດໃນຮົງກົງຈະເປັນຕົວເລກທີ່ບໍ່ສູງເມື່ອທຽບໃສ່ຫລາຍໆແຫ່ງໃນໂລກ, ແຕ່ຈາກລະບົບການຕິດຕາມ ແລະ ການກັກຕົວຂອງຮົງກົງ ເຮັດໃຫ້ລະບົບສາທາລະນະສຸກເກີດພາລະໜັກຈົນເຂົ້າຂັ້ນວິກິດ.
ໂດຍປົກກະຕິແລ້ວ ການລະບາດໃນລະດັບຫລາຍພັນຄົນນີ້ ບໍ່ສາມາດກົດໃຫ້ເປັນສູນໄດ້ ເວັ້ນແຕ່ຈະໃຊ້ວິກິດການລັອກດາວເຂັ້ມງວດແບບຈີນ ເຊິ່ງທາງຮົງກົງພະຍາມຍາມຫລີກລ່ຽງການລັອກດາວໃນລັກສະນະດັ່ງກ່າວ.
ມີລາຍງານວ່າຮົງກົງກຳລັງຊອກຫາສະຖານທີ່ໃນການສ້າງໂຮງໝໍສະໜາມ ໂດຍໃຊ້ວິທີການຮັບມືໃນລັກສະນະດຽວກັບເມືອງອູ່ຮັ່ນເມື່ອຕົ້ນປີ 2020.
ຂະນະທີ່ຫລາຍປະເທດທົ່ວໂລກກຳລັງເລີ່ມຫລຸດຜ່ອນມາດຕະການຄຸມໂຄວິດ, ຮົງກົງພັດຕ້ອງໃຊ້ມາດຕະການທີ່ເຂັ້ມງວດທີ່ສຸດເທົ່າທີ່ເຄີຍບັງຄັບໃຊ້ມາ ເພາະຕ້ອງເຮັດຕາມຄຳສັ່ງຂອງຈີນ ເຊິ່ງເປັນປະເທດດຽວທີ່ຍັງໃຊ້ວິທີກົດໂຄວິດເປັນສູນຢູ່.
ປັດຈຸບັນ ຮົງກົງສັ່ງຫ້າມບໍ່ໃຫ້ລວມຕົວກັນເກີນກວ່າ 2 ຄົນໃນບ່ອນສາທາລະນະ ແລະ ຍັງຫ້າມບໍ່ໃຫ້ລວມຕົວກັນເກີນກວ່າ 1 ຄອບຄົວພາຍໃນເຮືອນ ລວມທັງມີການຂະຫຍາຍໄລຍະເວລາຫ້າມຖ້ຽວບິນຂາເຂົ້າຈາກ 9 ປະເທດ ໄດ້ແກ່ ອົດສະຕຣາລີ, ການາດາ, ຝຣັ່ງ, ອິນເດຍ, ເນປານ, ປາກິດສະຖານ, ຟີລິບປິນ, ອັງກິດ ແລະ ອາເມລິກາ ໄປຈົນເຖິງວັນທີ 4 ມີນາ.
ອ້າງອີງ:
https://www.bloomberg.com/…/hong-kong-in-crisis-leans…
