ບົດຄວາມເຕືອນສະຕິຄົນເປັນໜີ້ ເຮົາພຽງແຕ່ເປັນໜີ້ ຢ່າຟ້າວທໍ້.

ທ່ານພຽງແຕ່ເປັນໜີ້ ໃຫ້ເລີ່ມແກ້ໄຂຈາກຄວາມຄິດກ່ອນ ເພາະທຸກຄົນລ້ວນມີພາລະ ແລະ ໜ້າທີ່ທີ່ແຕກຕ່າງກັນໄປ ລວມເຖິງພາລະເລື່ອງເງິນຄຳ ຫລາຍຄົນອາດຈຳເປັນຕ້ອງກູ້ໜີ້ຢືມສິນມາເພື່ອໃຊ້ຈ່າຍ ເຊິ່ງກໍບໍ່ແມ່ນເລື່ອງເສຍຫາຍຫຍັງ, ແຕ່ເມື່ອເຖິງເວລາຕ້ອງໃຊ້ຄືນ ຊຳ້ພັດມີເງິນບໍ່ພໍ ຫລື ຍັງບໍ່ພ້ອມດ້ວຍເຫດຜົນໃດໆກໍຕາມ ຍ່ອມເຮັດໃຫ້ເກີດຄວາມເຄັ່ງຄຽດ, ທໍ້ໃຈ, ມືດ 8 ດ້ານຂຶ້ນມາໄດ້. ມາເບິ່ງກັນວ່າມີວິທີໃດແດ່ທີ່ຈະກຽມໃຈເຮົາໃຫ້ພ້ອມຮັບມືກັບບັນຫາໜີ້ສິນໄດ້ໂດຍບໍ່ເຄັ່ງຄຽດ.

1. ຍອມຮັບຄວາມຈິງ : ທຸກບັນຫາຈະແກ້ໄຂໄດ້ ຕ້ອງເລີ່ມຕົ້ນຈາກການຍອມຮັບໃຫ້ໄດ້ກ່ອນວ່າບັນຫານັ້ນເກີດຂຶ້ນແລ້ວ ໜີ້ສິນກໍຄືກັນ ເມື່ອມີພາລະໜີ້ສິນຜູກມັດແລ້ວ ການເຮັດທຳທ່າລືມໆໄປ ບໍ່ແມ່ນທາງອອກທີ່ດີເລີຍ ເພາະເຖິງວ່າຈະເຮັດໃຫ້ສະບາຍໃຈໄດ້ໃນມື້ນີ້ ແຕ່ມື້ອື່ນ ຫລື ມື້ໜ້າກໍຍັງມີຢູ່ ຖ້າຍັງບໍ່ຮູ້ຈັກແກ້ໄຂໃຫ້ຖືກຕ້ອງ ຫັນມາພະເຊີນໜ້າກັບຄວາມຈິງຕັ້ງແຕ່ມື້ນີ້ຈະດີກ່ວາ ຢ່າປ່ອຍໄວ້ຈົນສວາຍເກີນແກ້.
2. ຄົນມີໜີ້ບໍ່ໄດ້ແປວ່າ ເປັນຄົນລົ້ມເຫລວ : ຫລາຍຄົນຮູ້ສຶກທໍ້ຖອຍທີ່ຈະຮັບມືກັບໜີ້ສິນ ຍ້ອນເບິ່ງວ່າໜີ້ເກີດຈາກຄວາມບໍ່ໄດ້ເລື່ອງຂອງຕົນເອງ ເຊິ່ງບໍ່ແມ່ນຄວາມຈິງສະເໝີໄປ ທຸກຄົນລ້ວນແຕ່ມີຄວາມຈຳເປັນຂອງຕົນເອງ ໃນໂລກນີ້ມີຄົນຫລວງຫລາຍທີ່ຕ້ອງພົບກັບບັນຫາແບບນີ້ຄືກັນກັບທ່ານ ແລະ ຫລາຍຄົນກໍສາມາດຜ່ານພົ້ນມາໄດ້ສຳເລັດ ຢ່າເມົາໂທດໂຕເອງຢູ່ເລີຍ ຮີບລຸກຂຶ້ນສູ້ໄປນຳກັນດີກ່ວາ.
3. ເຮັດຄວາມເຂົ້າໃຈເຫດຜົນທີ່ແທ້ຈິງ : ລອງຕອບຕົນເອງໃຫ້ໄດ້ວ່າ ໜີ້ທີ່ມີນັ້ນເກີດຈາກຫຍັງກັນແທ້ ? ເປັນຍ້ອນຄວາມຈຳເປັນແທ້ໆ ຫລື ຍ້ອນຄວາມຟຸມເຟືອຍ ? ຖ້າມາຈາກຄວາມຈຳເປັນ ກໍຢ່າເສຍໃຈ ຈື່ໄວ້ວ່າທ່ານໄດ້ເຮັດດີທີ່ສຸດແລ້ວ ແລະ ພ້ອມຈະຮັບຜິດຊອບຜົນຂອງມັນຢ່າງກ້າຫານ, ແຕ່ຖ້າມາຈາກຄວາມຟຸມເຟືອຍ, ຮູດບັດເຄຣດິດເພີນເກີນໂຕ ກໍຮີບດັດນິໄສຕົນເອງໂດຍໄວ ກ່ອນຈະເກີດໜີ້ກ້ອນໃໝ່ຕາມມາຕິດໆອີກ.
4. ຈື່ໄວ້ວ່າ ທ່ານບໍ່ໄດ້ຢູ່ໂຕຄົນດຽວ : ບໍ່ວ່າບັນຫາຈະຍິ່ງໃຫຍ່ປານໃດ ມັນກໍຈະເບົາລົງໄດ້ ຖ້າມີຄົນຊ່ວຍແບ່ງເບົາ ຢ່າເມົາແຕ່ແບກຮັບຄວາມອຸກໃຈໄວ້ພຽງຄົນດຽວ ລອງຫັນໄປປຶກສາຄົນໃນຄອບຄົວ ຫລື ໝູ່ທີ່ໄວ້ໃຈໄດ້ ພວກເຂົາຕ້ອງພ້ອມເປັນກຳລັງໃຈໃຫ້ທ່ານແນ່ນອນ ຫລື ທ່ານອາດຈະລອງເຂົ້າກຸ່ມສັງຄົມອອນລາຍ ກັບຄົນທີ່ປະສົບບັນຫາໜີ້ສິນຄືກັນກັບທ່ານ ອາດໄດ້ຄຳແນະນຳດີໆກໍໄດ້ ເຫັນຫລືບໍ່ວ່າທ່ານບໍ່ໄດ້ໂດດດ່ຽວເລີຍ.
5. ໜີ້ເປັນພຽງແຕ່ອຸປະສັກນ້ອຍໆໃນຊີວິດເທົ່ານັ້ນ : ຄົນເຮົາເກີດມາກ່ວາຈະຕາຍຕ້ອງພົບອຸປະສັກຫລວງຫລາຍເປັນທຳມະດາ ເຊິ່ງຖ້າພິຈາລະນາໃຫ້ດີ ຈະເຫັນວ່າໜີ້ສິນທີ່ມີຕອນນີ້ກໍເປັນພຽງແຕ່ບັນຫາຈຸດນ້ອຍໆຈຸດໜຶ່ງໃນຊີວິດທ່ານເທົ່ານັ້ນ ທ່ານຍັງໂຊກດີກ່ວາອີກຫລາຍຄົນໃນໂລກນີ້ຫລາຍ ສະນັ້ນ ຈະຍອມແພ້ງ່າຍໆບໍ່ໄດ້ເດັດຂາດ.
6. ລົງມືແກ້ບັນຫາຢ່າງເປັນຮູບປະທຳ : ເບິ່ງໂລກໃນແງ່ດີ ແລ້ວຢ່າລືມວາງແຜນການເງິນຢ່າງຊານສະຫລາດ ແລະ ລົງມືຈັດການກັບໜີ້ສິນຢ່າງຈິງຈັງ ເຊັ່ນ : ຫລຸດຄ່າໃຊ້ຈ່າຍທີ່ບໍ່ຈຳເປັນ, ຫາລາຍໄດ້ເສີມ ແລະ ເຈລະຈາກັບເຈົ້າໜີ້ ເພື່ອຫາຂໍ້ຕົກລົງທີ່ສອດຄ່ອງກັນທັງສອງຝ່າຍ ພຽງເທົ່ານີ້ຄຳວ່າ ປາສະຈາກໜີ້ ກໍຢູ່ບໍ່ໄກເກີນເອື້ອມ.