ອາຊຽນ ອໍານວຍຄວາມສະດວກໃນການເດີນທາງເຂົ້າ-ອອກ ພາຍໃນປະເທດສະມາຊິກອາຊຽນ ຟື້ນຟູຜົນກະທົບຈາກໂຄວິດ-19

ວັນທີ 20 ເມສາ 2022 ຢູ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ ຮອງລັດຖະມົນ ຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມໜ່ວຍງານຂອງສະພາປະສານງານອາຊຽນ ວ່າດ້ວຍການຊ່ວຍເຫລືອສຸກເສີນດ້ານສາທາລະນະສຸກຄັ້ງທີ 8 ແບບທາງໄກ ພາຍໃຕ້ການເປັນປະທານຂອງປະເທດກໍາປູເຈຍ ໂດຍມີບັນດາເຈົ້າໜ້າທີ່ອາວຸໂສອາຊຽນ ຈາກເສົາຄໍ້າວັດທະນະທໍາ-ສັງຄົມ, ເສດຖະກິດ ແລະ ສາທາລະນະສຸກ, ຄະນະກໍາມະການຜູ້ຕາງໜ້າຖາວອນປະຈໍາອາຊຽນ ແລະ ກອງເລຂາອາຊຽນ ເຂົ້າຮ່ວມ.

ກອງປະຊຸມໄດ້ຕີລາຄາສູງຜົນການຈັດຕັ້ງປະຕິບັດບັນດາໜ້າວຽກແກ້ໄຂ ແລະ ຮັບມືກັບການແພ່ລະບາດ ພະຍາດໂຄວິດ-19 ກໍຄືການຟື້ນຟູຈາກຜົນກະທົບການລະບາດພະຍາດໂຄວິດ-19 ຂອງອາຊຽນ. ຂະນະດຽວກັນກໍໄດ້ຮັບຊາບຄວາມຄືບໜ້າການຈັດຕັ້ງປະຕິບັດແຜນຟື້ນຟູຮອບດ້ານຂອງອາຊຽນໂດຍຊຸກຍູ້ໃຫ້ບັນ ດາຂະແໜງການກ່ຽວຂ້ອງເພີ່ມທະວີການຈັດຕັ້ງປະຕິບັດແຜນຟື້ນຟູ ແລະ ຮັບຊາບຄວາມຄືບໜ້າການຈັດ ຕັ້ງປະຕິບັດແຜນຂອບວຽກແລວການເດີນທາງອາຊຽນແນໃສ່ອໍານວຍຄວາມສະດວກໃນການເດີນທາງເຂົ້າ-ອອກ ພາຍໃນປະເທດສະມາຊິກອາຊຽນ.

ກອງປະຊຸມ ໄດ້ຊຸກຍູ້ໃຫ້ອົງການ ອຸຍນີເຊັບ(UNICEF) ສົມທົບກັບເຈົ້າໜ້າທີ່ອາວຸໂສສາທາລະນະສຸກອາຊຽນ ເລັ່ງນໍາໃຊ້ງົບປະມານຈາກກອງທຶນອາຊຽນເພື່ອຮັບມືກັບພະຍາດໂຄວິດ-19 ຈັດຊື້ ແລະ ນໍາສົ່ງວັກຊິນຕ້ານພະຍາດໂຄວິດ-19 ໃຫ້ບັນດາປະເທດໃນອາຊຽນໃຫ້ສໍາເລັດໃນໄຕມາດທີ 1 ແລະ 2 ຂອງປີນີ້. ນອກນີ້, ກອງປະຊຸມ ໄດ້ຮຽກຮ້ອງໃຫ້ປະເທດສະມາຊິກສືບຕໍ່ປະກອບສ່ວນເຂົ້າໃນຄັງແຮອຸປະກອນການແພດພາກພື້ນອາຊຽນເພື່ອຮັບມືກັບພາວະສຸກເສີນດ້ານສາທາລະນະສຸກ ເຊິ່ງຄັງແຮດັ່ງກ່າວ ມີຄວາມສໍາຄັນໃນການຊ່ວຍເຫລືອດ້ານຢາປົວພະຍາດ ແລະ ອຸປະກອນການແພດໃຫ້ບັນດາປະເທດສະມາຊິກອາ ຊຽນ ທີ່ໄດ້ຮັບຜົນກະທົບຈາກພາວະສຸກເສີນດ້ານສາທາລະນະສຸກໃນອະນາຄົດ. ຜົນຂອງການປຶກສາຫາລືຄັ້ງນີ້ ຈະລາຍງານຕໍ່ກອງປະຊຸມສະພາປະສານງານອາຊຽນຄັ້ງທີ 31 ທີ່ຈະຈັດຂຶ້ນໃນຕົ້ນເດືອນສິງຫານີ້.