ຣາຟ ຣັງນິກ ຮັບຕຳແຫນ່ງຜູ້ຈັດການທີມຊາດ ອອສເຕຣຍ ຄົນໃຫມ່-ຄວບທີ່ປຶກສາ ແມນຢູ

ຣາຟ ຣັງນິກ ຜູ້ຈັດການທີມຊົ່ວຄາວ ແມນເຊສເຕີ ຢູໄນເຕັດ ຈະໂຍກໄປເຮັດຫນ້າທີ່ເປັນຜູ້ຈັດການທີມຄົນໃຫມ່ຂອງທີມຊາດອອສເຕຣຍ ຫລັງຈົບລະດູການນີ້ ພ້ອມຄວບຕຳແຫນ່ງທີ່ປຶກສາສະໂມສອນ ແມນເຊສເຕີ ຢູໄນເຕັດ ນຳອີກ.

ສຳລັບ ຣັງນິກ ທີ່ເຂົ້າມາຄຸມທີມ ແມນເຊສເຕີ ຢູໄນເຕັດ ໃນຖານະຜູ້ຈັດການທີມຊົ່ວຄາວເມື່ອເດືອນພະຈິກຜ່ານມາ ຈະຜັນຕົວໄປເປັນທີ່ປຶກສາສະໂມສອນຫລັງຈົບລະດູການນີ້ ຫລັງ ແມນເຊສເຕີ ຢູໄນເຕັດ ໄດ້ ເອຣິກ ເທນ ຮາກ ເຂົ້າມາເປັນຜູ້ຈັດການທີມຄົນໃຫມ່.

ແນວໃດກໍຕາມ ກ່ອນຫນ້ານີ້ມີລາຍງານວ່າ ທີມຊາດອອສເຕຣຍ ໄດ້ສະເຫນີວຽກໃຫ້ ຣັງນິກ ຈົນຫລ້າສຸດ ຣັງນິກ ໄດ້ຖະແຫລງການວ່າ ຕົນເອງຈະນັ່ງຜູ້ຈັດການທີມຊາດອອສເຕຣ ຄົນໃຫມ່ດ້ວຍສັນຍາ 2 ປີ ຫລື ເຖິງປີ 2024 ພ້ອມຮັບງານເປັນທີ່ປຶກສາຂອງ ແມນເຊສເຕີ ຢູໄນເຕັດ ຄວບຄູ່ໄປນຳ.

‘‘ ຂ້ອຍຈະຮັບງານຕໍ່ໃນຖາະນະຜູ້ຈັດການທີມຊາດອອສເຕຣຍເມື່ອສິ້ນສຸດລະດູການ ແຕ່ຈະຍັງຄົງໃຫ້ຄຳປຶກສາກັບ ແມນເຊສເຕີ ຢູໄນເຕັດ ຕໍ່ໄປ ຂ້ອຍຄອຍຖ້າທີ່ໄດ້ເປັນສ່ວນຫນຶ່ງໃນການຊ່ວຍໃຫ້ ແມນຢູ ກັບມາແຂງແກ່ນຢ່າງແທ້ຈິງອີກ ’’ ຣິງນິກ ກ່າວ.