ອາເຊນອລ ເອົາແທ້, ກຽມຍື່ນ 45 ລ້ານປອນຂໍຊື້ ແຣສຟອດ ເສີມທີມ

ສື່ຊື່ດັງໃນອັງກິດ ພາກັນລາຍງານຂ່າວວ່າ ອາເຊນອລ ກຽມຍື່ນຂໍ້ສະເຫນີຈຳນວນ 45 ລ້ານປອນ ໃຫ້ ແມນເຊສເຕີ ຢູໄນເຕັດ ພິຈາລະນາປ່ອຍ ມາຄັສ ແຣສຟອດ ມາຮ່ວມທີມ ໂດຍມີຄວາມເປັນໄປໄດ້ທີ່ແມນຢູ ສົນໃຈ ເນື່ອງຈາກນັກເຕະຈະຫມົດສັນຍາລະດູການຫນ້າແລ້ວ.

ອາເຊນອລ ສະໂມສອນດັງແຫ່ງພຣີເມຍລີກ ອັງກິດ ກຽມຍື່ນຂໍ້ສະເຫນີຈຳນວນ 45 ລ້ານປອນ ເພື່ອຂໍຊື້ ມາຄັສ ແຣສຟອດ ດາວຍິງຄວາມໄວສູງຈາກ ແມນເຊສເຕີ ຢູໄນເຕັດ ໃນໄລຍະຕະຫລາດນັກເຕະລະດູການນີ້.

ແຣສຟອດ ຜົນງານຝືດຢ່າງຫນັກໃນລະດູການນີ້ໂດຍຍິງໄປພຽງ 5 ປະຕູເທົ່ານັ້ນ ໃນທຸກລາຍການ ທີ່ສຳຄັນນັກເຕະຍັງຖືກ ຣາຟ ຣັງນິກ ຜູ້ຈັດການທີມຊົ່ວຄາວຈັດໃຫ້ເປັນຕົວສຳຮອງຢູ່ເລື້ອຍໆ ເຊິ່ງລາວໄດ້ລົງຫລິ້ນເຕັມເວລາ 90 ນາທີພຽງເກມດຽວໃນປີນີ້.

ຈາກສະຖານະການໃນເວລານີ້ ເຮັດໃຫ້ມີຄວາມເປັນໄປໄດ້ ກອງຫນ້າທີມຊາດອັງກິດອາຍຸ 24 ປີ ອາດຈະເລືອກຍ້າຍອອກຈາກຖິ່ນໂອນ ແທຣ໊ຟຟອດ ໂດຍສະເພາະຫາກ ແມນຢູ ພາດຕິດ 1 ໃນ 4 ບໍ່ໄດ້ໂຄຕາໄປລຸຍການແຂ່ງຂັນຢູຟາ ແຊ໊ມປຽນລີກ.

ຫລ້າສຸດ ‘‘ Football insider’’ ສື່ຊື່ດັງໃນແວດວົງບານເຕະ ລາຍງານວ່າ ມິເກລ ອາເຕຕ້າ ຜູ້ຈັດການທີມຄົນຫນຸ່ມໄຟແຮງ ມີຄວາມຕ້ອງການຢ່າງແຮງກ້າທີ່ຈະຫາກອງຫນ້າມາເສີມທີມ ໂດຍ ແຣສຟອດ ເປັນເປົ້າຫມາຍຫລັກທີ່ພວກເຂົາຢາກໄດ້ຕົວມາຮ່ວມທີມລະດູການນີ້.

ຈາກການລາຍງານລະບຸເພີ່ມຕື່ມວ່າ ອາເຊນອລ ພ້ອມທີ່ຈະຍື່ນຂໍ້ສະເຫນີຈຳນວນ 45 ລ້ານປອນ ໃຫ້ກັບ ແມນເຊສເຕີ ຢູໄນເຕັດ ໃນການປ່ອຍ ແຣສຟອດ ມາຫລິ້ນທີ່ຖິ່ນເອມີເຣສ ສະເຕດຽມ ໂດຍນັກເຕະອາດສົນໃຈເນື່ອງຈາກມີເພື່ອນຮ່ວມຊາດອັງກິດຢ່າງ ບູກາໂຢ ຊາກ້າ ອາຍຸ 20 ປີ ແລະ ເອມິລ ສະມິດ-ໂຣ ອາຍຸ 21 ປີ ຢູ່ກັບ ອາເຊນອລ ເຊັ່ນດຽວກັນ.

ທັງນີ້ ແມນເຊສເຕີ ຢູໄນເຕັດ ຄາດຫວັງຢາກໄດ້ຄ່າຕົວທີ່ເຫມາະສົມໃນການຊື້ ແຣສຟອດ ເນື່ອງຈາກພວກເຂົາຕ້ອງການເງິນຈຳນວນຫລາຍເພື່ອໃຊ້ໃນການເສີມກອງຫນ້າຄົນໃຫມ່ສຳລັບແກ້ບັນຫາເລື່ອງການຍິງປະຕູຂະນະທີ່ນັກເຕະຈະຫມົດສັນຍາໃນລະດູການຫນ້າ ສະນັ້ນມີຄວາມເປັນໄປໄດ້ທີ່ ແມນຢູ ຈະພິຈາລະນາຂໍ້ສະເຫນີຂອງ ອາເຊນອລ.