ເຈົ້າໜ້າທີ່ຈັບຕົວຜູ້ຫລອກລວງໂດຍການແລກປ່ຽນເງິນຜ່ານສື່ສັງຄົມອອນລາຍ

ພັທ ບຸນແລວ ແກ້ວວັນນາ ຫົວໜ້າ ປກສ ກຸ່ມຫ້ວຍຈຽມ ໃຫ້ຮູ້ວ່າ: ວັນທີ 6 ກໍລະກົດ 2022 ຜ່ານມານີ້ເຈົ້າໜ້າທີ່ ປກສ ຫ້ວຍຈຽມ ຈັບຕົວ, ນາງ ກ່າເຊຍເຮີ ອາຍຸ 18 ປີ ກໍາມະກອນ ຢູ່ບ້ານວັງຊາຍ ເມືອງໄຊເສດຖາ ນວ ຖືກຈັບໃນຂໍ້ຫາສໍ້ໂກ້ງຊັບພົນລະເມືອງ ຜູ້ກ່ຽວໃຊ້ເລ້ຫຼ່ລ່ຽມດ້ວຍການນຳໃຊ້ເຟສບຸກທີ່ມີຊື່ວ່າ Sannaphakham ໂຄສະນາຊວນເຊື່ອ ອວດອ້າງວ່າເປັນເຟສບໍລິການຮັບແລກປ່ຽນເງິນຕາ ຜ່ານທາງສື່ສັງຄົມອອນລາຍ ທີ່ມີຄວາມສະດວກສະບາຍ ແລະ ໄດ້ຮັບຄ່າອັດຕາແລກປ່ຽນສູງ.

ພາຍຫຼັງນຳໃຊ້ເຟດດັ່ງກ່າວມາໄດ້ໄລຍະໜຶ່ງມີຄົນຫຼົງເຊື່ອ ແລ້ວໂອນເງິນເຂົ້າບັນຊີໃຫ້ 3.000.000 ກີບ, 100.000 ບາດ ແລະ 300 ໂດລາ ເຂົ້າບັນຊີຂອງນາງ ກ່າເຊຍເຮີ ຫຼັງຈາກເງິນຖືກໂອນເຂົ້າບັນຊີ ກໍໄດ້ປິດການນຳໃຊ້ເຟສທຸກຊ່ອງ ແລະ ເອົາຕົວຫຼົບໜີ.

ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍ ກໍໄດ້ເກັບກຳຂໍ້ມູນຫຼັກຖານສືບຄົ້ນຫາ ຈິ່ງໄດ້ຈັບ ນາງ ກ່າເຊຍເຮີ ໄດ້ຢູ່ເຮືອນຍາດພີ່ນ້ອງ ບ້ານສົມສະໄໝ ເມືອງໄຊທານີ.
ປັດຈຸບັນ ປກສ ກຸ່ມຫ້ວຍຈຽມ ໄດ້ສົ່ງຕົວ ໃຫ້ກອງບັນຊາການ ປກສ ເມືອງໄຊທານີ ສືບຕໍ່ດໍາເນີນຄະດີຕາມຂັ້ນຕອນຂອງກົດໝາຍ.