ການນຳພັກ-ລັດ ແຫ່ງ ສປປ ລາວ ຕ້ອນຮັບຄະນະນຳຂັ້ນສູງ ກະຊວງ ປກສ ແຫ່ງ ສສ ຫວຽດນາມ
August 25, 2022 - 10:06 AM
ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະ ນະບໍລິຫານງານສູນກາງພັກປະຊາຊົນ ປະຕິວັດລາວ ປະ ທານປະເທດ ແຫ່ງ ສປປ ລາວ ແລະ ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະ ນະຜູ້ແທນຂັ້ນສູງກະຊວງປ້ອງກັນຄວາມສະຫງົບ (ປກສ) ແຫ່ງ ສສ ຫວຽດນາມ ນໍາໂດຍສະຫາຍ ພົອ ໂຕ ເລິມ ກໍາມະການກົມການເມືອງສູນກາງ ພັກກອມມູນິດຫວຽດນາມ ລັດ ຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ ໃນວັນທີ 24 ສິງຫານີ້ ເນື່ອງໃນໂອກາດທີ່ຄະນະດັ່ງກ່າວ ເດີນທາງມາເຄື່ອນໄຫວຢ້ຽມຢາມສັນຖະວະໄມຕີ ແລະ ພົບປະກັບ ກະຊວງປ້ອງກັນຄວາມສະຫງົບ ສປປ ລາວ ໃນລະຫວ່າງວັນທີ 24-27 ສິງຫາ 2022.
ພາຍຫຼັງສໍາເລັດກອງປະຊຸມພົບປະສອງຝ່າຍຂອງຄະນະຜູ້ແທນຂັ້ນສູງ ຂອງສອງກະຊວງ ປກສ ລາວ-ຫວຽດນາມ ໃນຕອນແລງວັນທີ 24 ສິງຫານີ້, ສະຫາຍ ພົອ. ໂຕ ເລິມ ກໍໄດ້ນໍາພາຄະນະນໍາຂັ້ນສູງກະຊວງ ປກສ ແຫ່ງ ສສ ຫວຽດນາມ ເຂົ້າຢ້ຽມຂໍ່ານັບ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ. ໂອກາດນີ້, ສະຫາຍ ພົອ. ໂຕ ເລິມ ໄດ້ຕາງໜ້າໃຫ້ຄະນະຜູ້ແທນ, ນໍາເອົາຄວາມຢື້ຢາມຖາມຂ່າວ, ຄວາມຮັກແພງສາມັກຄີອັນສະໜິດແໜ້ນ, ຈາກການນຳ ພັກ-ລັດ ຂອງ ສສ ຫວຽດນາມ ມາເຖິງປະທານປະເທດ ພ້ອມດ້ວຍການນຳພັກ-ລັດ ແລະ ປະຊາຊົນລາວ, ພ້ອມທັງໄດ້ລາຍງານຈຸດປະສົງ ໃນການເດີນທາງເຄື່ອນໄຫວຢ້ຽມຢາມສັນຖະວະໄມຕີ ສປປ ລາວ ຄັ້ງນີ້ ໃຫ້ປະທານປະເທດ ແຫ່ງ ສປປ ລາວ ໄດ້ຮັບຊາບ. ຈາກນັ້ນ, ສະຫາຍ ທອງລຸນ ສີສຸລິດ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະນໍາກະ ຊວງປ້ອງກັນຄວາມສະຫງົບ ສສ ຫວຽດນາມ ໃນການມາຢ້ຽມຢຽມສັນຖະວະໄມຕີ ແລະ ເຮັດວຽກຢູ່ ສປປ ລາວ, ເວົ້າສະເພາະ ກໍແມ່ນການເຮັດວຽກຮ່ວມກັບ ກະຊວງ ປກສ ແຫ່ງ ສປປ ລາວ; ພ້ອມນັ້ນ, ສະຫາຍປະທານປະເທດ ກໍໄດ້ເນັ້ນໜັກໃຫ້ສອງກຳລັງ ສືບຕໍ່ເສີມຂະຫຍາຍສາຍພົວພັນທີ່ເປັນມູນເຊື້ອສະຫງ່າງາມ ລະຫວ່າງ ລາວ-ຫວຽດນາມ ໃຫ້ໝັ້ນຄົງຂະໜົງແກ່ນ, ສືບຕໍ່ຮັດແໜ້ນສາຍພົວພັນແບບພິເສດ-ການຮ່ວມມືຮອບດ້ານ ໃຫ້ເລິກເຊິ່ງ, ກວ້າງຂວາງ, ສຸມໃສ່ພັດທະນາສອງກໍາລັງປ້ອງກັນຄວາມສະ ຫງົບ ລາວ-ຫວຽດນາມ ໃຫ້ເຕີບໃຫຍ່ເຂັ້ມແຂງ, ຮັບປະກັນໃຫ້ສອງປະເທດ ລາວ-ຫວຽດ ນາມ ມີຄວາມສະຫງົບປອດໄພ, ປະຊາຊົນສອງຊາດ ໄປ ມາຫາສູ່ກັນຢ່າງສະດວກສະ ບາຍ ສ້າງຄວາມເຂັ້ມແຂງ ໃນການປົກປັກຮັກສາ ແລະ ພັດທະນາປະເທດຊາດ ໃຫ້ຈະເລີນຮຸ່ງເຮືອງ. ນອກນີ້, ຍັງໄດ້ອວຍພອນໃຫ້ ສະຫາຍ ພົອ. ໂຕ ເລິມ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ, ປະສົບຜົນສໍາເລັດໃນໜ້າທີ່ວຽກງານ ແລະ ເດີນທາງກັບປະເທດດ້ວຍຄວາມສະຫວັດດີພາບ.
ຫຼັງຈາກນັ້ນ, ສະຫາຍ ພົອ. ໂຕ ເລິມ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ໂດຍໄດ້ລາຍງານກ່ຽວກັບການພົບປະແລກປ່ຽນວຽກງານ ຂອງສອງກະຊວງປ້ອງກັນຄວາມສະຫງົບ ລາວ-ຫວຽດນາມ ໃຫ້ສະຫາຍນາ ຍົກລັດຖະມົນຕີຊາບ. ສະ ຫາຍ ພົອ. ໂຕ ເລິມ ໄດ້ກ່າວວ່າ: ຕະຫຼອດໄລຍະທີ່ຜ່ານມາ ກໍຄື ປັດຈຸບັນ ສອງກະຊວງ ໄດ້ເພີ່ມທະວີປະສານສົມທົບ ໃນການຮ່ວມມືຫຼາຍດ້ານເຊັ່ນ: ຮ່ວມກັນຕ້ານອາຊະຍາກໍາດ້ານຕ່າງໆ, ຊ່ວຍເຫຼືອກໍ່ສ້າງນາຍ ແລະ ພົນຕໍາຫຼວດ, ປຶກສາຫາລືເນື້ອໃນສົນທິສັນຍາ ວ່າດ້ວຍການປົກປ້ອງ ແລະ ຮັກສາຂໍ້ມູນ, ຊູກຍູ້, ປະສານງານກັບພາກສ່ວນທີ່ກ່ຽວຂ້ອງ ເພື່ອໃຫ້ໄດ້ລົງນາມສົນທິສັນຍາ ວ່າດ້ວຍການໂອນຜູ້ຮ້າຍຂ້າມແດນ ລະຫວ່າງ ສປປ ລາວ ແລະ ສສ ຫວຽດນາມ, ສືບຕໍ່ປະຕິບັດໂຄງການກໍ່ ສ້າງຫ້ອງການປະສານງານ ປກສ ບ້ານ, ໂຄງການກໍ່ສ້າງວິທະຍາຄານການເມືອງ ປ້ອງກັນຄວາມສະຫງົບປະຊາຊົນ ແລະ ໂຄງການກໍ່ສ້າງສູນຂໍ້ມູນພົນລະເມືອງ ຕິດພັນກັບການປະສານສົມທົບ ກ່ຽວກັບແຜນການເຄື່ອນໄຫວກິດຈະກໍາປີສາມັກຄີມິດຕະພາບ ລາວ-ຫວຽດນາມ ເປັນຕົ້ນການສະເໜີຍ້ອງຍໍກົມກອງ ລວມໝູ່ ແລະ ບຸກຄົນ ທີ່ມີຜົນງານຊຸກຍູ້ໂຄງການກໍ່ສ້າງຫ້ອງການປະສານງານ ຕ້ານອາຊະຍາກໍາຂ້າມຊາຍແດນ ແລະ ການຮ່ວມມືສະກັດກັ້ນ ອາຊະຍາກໍາຢາເສບຕິດ.
ໂອກາດດຽວກັນນີ້, ສະຫາຍ ພັນຄໍາ ວິພາວັນ ນາຍົກລັດຖະມົນຕີ ກໍໄດ້ສະແດງຄວາມຊົມເຊີຍ ແລະ ຕ້ອນຮັບຢ່າງອົບອຸ່ນຕໍ່ຄະນະຜູ້ແທນຂັ້ນສູງກະຊວງ ປກສ ແຫ່ງ ສສ ຫວຽດນາມ ທີ່ໄດ້ເຄື່ອນໄຫວພົບປະສອງຝ່າຍ ລະຫວ່າງ ສອງກະຊວງ ປກສ ລາວ-ຫວຽດນາມ ໃນຄັ້ງນີ້ ຊຶ່ງຢູ່ໃນບັນຍາກາດທີ່ທົ່ວພັກ, ລັດ ແລະ ປະຊາຊົນສອງຊາດ ລາວ-ຫວຽດນາມ ພວມສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ຢ່າງເປັນຂະບວນການຟົດຟື້ນ ແລະ ມີຄວາມໝາຍຄວາມສໍາຄັນ, ມັນໄດ້ເປັນການປະກອບສ່ວນຢ່າງຕັ້ງໜ້າຂອງຄະນະຜູ້ແທນຂັ້ນສູງທັງສອງກະຊວງ ໃນການຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບ ຮ້ອຍຂອງສັງຄົມ ໃຫ້ແກ່ສອງປະເທດ ແລະ ສ້າງເງື່ອນໄຂອໍານວຍຄວາມສະດວກ ໃຫ້ແກ່ປະຊາຊົນສອງຊາດ ລາວ-ຫວຽດນາມ, ມີໂອກາດໃນການສ້າງສາ ແລະ ພັດທະນາປະເທດຊາດ ກໍຄື ກໍາລັງ ປກສ ລາວ-ຫວຽດນາມ ໃຫ້ນັບມື້ໄດ້ຮັບການປັບປຸງຢ່າງໜັກແໜ້ນ ແລະ ມີແບບແຜນທັນສະໄໝຂຶ້ນເທື່ອລະກ້າວ.
