ພົນເອກ ຈັນສະໝອນ ຈັນຍາລາດ ລົງກວດກາຜົນກະທົບຈາກໄພນ້ຳຖ້ວມຢູ່ແຂວງອຸດົມໄຊ
ວັນທີ 29 ສິງຫາ 2022 ນີ້, ສະຫາຍ ພົນເອກ ຈັນສະ ໝອນ ຈັນຍາລາດ ຮອງນາຍົກ ລັດຖະມົນຕີລັດຖະມົນຕີກະຊວງປ້ອງກັນປະເທດ ປະທານຄະນະກຳມະການຄວບຄຸມໄພພິບັດຂັ້ນ ສູນກາງ ພ້ອມຄະນະໄດ້ລົງຕິດ ຕາມກວດກາຜົນກະທົບຈາກໄພນ້ຳຖ້ວມຢູ່ແຂວງອຸດົມໄຊ ໂດຍໃຫ້ການຕ້ອນຮັບຂອງ ສະຫາຍ ບຸນຄົງ ຫຼ້າຈຽມພອນ ເຈົ້າແຂວງ ແຂວງອຸດົມໄຊ. ໂອກາດດັ່ງກ່າວ, ເຈົ້າແຂວງ ແຂວງອຸດົມໄຊ ໄດ້ລາຍງານສະ ພາບໄພນ້ຳຖ້ວມຢູ່ບັນດາເມືອງ ທີ່ຖືກຜົນກະທົບໃຫ້ສະຫາຍຮອງນາຍົກລັດຖະມົນຕີ ຮັບຊາບກ່ຽວກັບຜົນເສຍຫາຍໃນເບື້ອງຕົ້ນ.
ເນື່ອງຈາກເກີດມີຝົນຕົກຕິດຕໍ່ກັນຈົນເຖິງວັນທີ 26 ສິງຫາ 2022 ເຮັດໃຫ້ນ້ຳກໍ, ນ້ຳມາວ ມີລະດັບປະລິມານນ້ຳສູງຂຶ້ນ ພ້ອມທັງເກີດມີນ້ຳປ່າໄຫຼສຸແຮງ ເຮັດໃຫ້ເກີດມີນ້ຳອັ່ງຖ້ວມຖະໜົນຫົນ ທາງ ໂດຍສະເພາະແມ່ນເສັ້ນ ທາງເລກ 2 ຕາເວັນອອກ ທາງໄປເມືອງຫຼາ, ເສັ້ນທາງເລກ 13 ເໜືອ ທາງໄປເມືອງນາໝໍ້, ນອກ ຈາກນີ້ ກໍຍັງຍຶ່ງຖ້ວມບ້ານເຮືອນຂອງປະຊາຊົນ ຢູ່ຕາມແຄມນ້ຳກໍ ແລະ ເຂດພື້ນທີ່ຕ່ຳ.
ຕໍ່ກັບສະພາບການດັ່ງກ່າວ ຄະນະຮັບຜິດຊອບໄພພິບັດຂັ້ນແຂວງ, ຂັ້ນເມືອງ ກໍໄດ້ລົງຕິດຕາມສະພາບການຢ່າງ ໄກ້ຊິດຢູ່ເຂດຕ່າງໆ ພາຍໃນເທ ສະບານແຂວງ, ເມືອງ, ບັນດາເສັ້ນທາງ, ຂົວ, ລະບົບໄຟຟ້າ, ນ້ຳປະປາ. ໃນນີ້ ເສັ້ນທາງເລກ 2 ຕາເວັນອອກຫຼື (2E) ເກີດມີດິນເຈື່ອນຖົມທາງ, ຕົ້ນໄມ້ຫັກລົ້ມທັບຕາມເສັ້ນທາງຫຼາຍຈຸດເສົາໄຟຟ້າຫັກລົ້ມເປັນບາງເຂດເຮັດໃຫ້ຕາຄ່າຍໄຟຟ້າ, ສັນຍານໂທລະສັບບໍ່ສາມາດໃຊ້ໄດ້. ສຳລັບເຂດບ້ານ ໂຮມໄຊ (ຫຼັກ 15 ) ເມືອງຫຼາ ແຂວງອຸດົມໄຊ ເກີດມີນ້ຳປ່າໄຫຼ ສຸແຮງພັດເຂົ້າບ້ານເຮືອນຂອງ ປະຊາຊົນ ເຮັດໃຫ້ມີເຮືອນຖືກພັດໄຫຼຕາມກະແສນ້ຳ ແລະ ມີ ດິນເຊາະເຈື່ອນບໍລິເວນຂົວພົບ ຄວາມຫຍຸ້ງຍາກໃນການສັນ ຈອນໄປມາ, ຕໍ່ເຫດການດັ່ງກ່າວ ໃນເບື້ອງຕົ້ນການນຳແຂວງ ກໍໄດ້ຊີ້ນຳກຳລັງປ້ອງກັນຊາດ-ປ້ອງກັນຄວາມສະຫງົບທ້ອງຖິ່ນ, ກຳລັງທະຫານຈາກກອງພົນທີ 3, ຂະແໜງການທີ່ກ່ຽວຂ້ອງ ແລະ ອົງການຈັດຕັ້ງມະຫາຊົນເຂົ້າກອບກູ້ໄພພິບັດຊ່ວຍເຫຼືອປະຊາຊົນ ແລະ ໄດ້ຈັດສັນບ່ອນ ຢູ່, ອາຫານໃຫ້ແກ່ຄອບຄົວທີ່ ໄດ້ຮັບຜົນກະທົບໃນເບື້ອງຕົ້ນ ແລະ ແນະນຳໃຫ້ຕິດຕາມສະພາບດິນຟ້າອາກາດເປັນປົກກະຕິ.
ມີບ້ານທີ່ໄດ້ຮັບຜົນກະທົບ ແລະ ເສຍຫາຍທັງໝົດ 25 ບ້ານ, ມີ 469 ຫຼັງຄາເຮືອນ, ມີພົນລະເມືອງ 2.324 ຄົນ, ຍິງ 900 ຄົນ, ມີຜູ້ເສຍຊີວິດ 2 ຄົນ, ບາດເຈັບ 3 ຄົນ, ມີເຮືອນຖືກຜົນກະທົບ ຈໍານວນ 66 ຫຼັງ ໃນນັ້ນເຮືອນຖືກນໍ້າພັດຊຸໄຫຼ ຈໍານວນ 58 ຫຼັງ, ດິນເສາະເຈື່ອນ 2 ຫຼັງ ແລະ ເລົ້າເຂົ້າ 23 ຫຼັງ, ນອກຈາກນີ້ ຍັງມີເສົາໄຟຟ້າ ເສຍຫາຍ ຈໍານວນ 301 ຕົ້ນ, ເສົາໄຟຟ້າ 8 ແມັດເສຍຫາຍ 6 ຕົ້ນ, ຄອນສາຍ ເສຍຫາຍ 231 ຄອນ, ດອກກັນໄຟເສຍຫາຍ 327 ດອກ ແລະ ສາຍໄຟຟ້າເສຍຫາຍ 24.900 ແມັດ, ນໍ້າຖ້ວມອັ່ງຖະໜົນຫົນທາງມີຫຼາຍຈຸດ, ເສັ້ນທາງເລກທີ 2E ເມືອງໄຊ ຫາ ເມືອງຫຼາ ລະຫວ່າງກິໂລແມັດ 15-24 ຖຶກຕັດຂາດ 4 ຈຸດ, ຂົວຖືກຕັດຂາດ 4 ແຫ່ງ, ເປເພ່ 3 ແຫ່ງ, ດິນເຈື່ອນຖົມທາງ 15 ຈຸດ ແລະ ເສັ້ນທາງຊົນນະບົດໄດ້ເປ່ເພ ແລະ ຂົວຖືກຕັດຂາດ 11 ແຫ່ງ, ເຄື່ອງວັດແທກລະດັບນໍ້າແບບອັດຕະໂນມັດຈຸດວັດແທກຂົວນໍ້າກໍ ບ້ານກໍນ້ອຍເມືອງໄຊ ໄດ້ຮັບຜົນກະທົບ ແລະ ເສຍຫາຍທັງໝົດ ມູນຄ່າ 65 ລ້ານກີບ, ຫຼາວັດແທກລະດັບນໍ້າກໍ ຈຸດວັດແທກບ້ານໂຮມໄຊ, ຈຸດວັດແທກຂົວນໍ້າກໍ 2 ບ້ານເຈງ, ຈຸດວັດແທກບ້ານຫ້ວຍຂຸມ ໄດ້ຮັບຜົນກະທົບ ແລະ ເສຍຫາຍ ລວມມູນຄ່າທັງໝົດ ຈໍານວນ 79 ລ້ານກີບ, ໂຮງຮຽນປະຖົມຖືກຜົນກະທົບ (ນໍ້າຖ້ວມ) ມີຈໍານວນ 5 ແຫ່ງ, ລະບົບນໍ້າລິນເປ່ເພ ທັງໝົດ ຈໍານວນ 7 ຈຸດ, ເນື້ອທີ່ທໍາການຜະລິດເສຍຫາຍທັງໝົດ 35 ເຮັກຕາ ໃນນັ້ນເນື້ອທີ່ນາ ເສຍຫາຍ ຈໍານວນ 20 ເຮັກຕາ, ເຂົ້າເນີນສູງ 8 ເຮັກຕາ ແລະ ເນື້ອທີ່ສວນ 7 ເຮັກຕາ.
ໂອກາດນີ້, ສະຫາຍພົນເອກ ຈັນສະໝອນ ຈັນຍາລາດ ໄດ້ສະແດງຄວາມເຫັນໃຈຕໍ່ປະຊາຊົນຜູ້ທີ່ຖືກຜົນກະທົບຈາກໄພນ້ຳຖ້ວມໃນຄັ້ງນີ້ ພ້ອມທັງເນັ້ນໃຫ້ການນຳແຂວງ, ກຳລັງປກຊ-ປກສ, ພະ ແນກການ, ອຳນາດການ ປົກຄອງທ້ອງຖິ່ນທຸກຂັ້ນເອົາໃຈໃສ່ຊຸກຍູ້ກຳລັງແຮງທຸກພາກສ່ວນໃນສັງ ຄົມປະກອບ ສ່ວນເຂົ້າໃນການ ກອບກູ້ໄພພິບັດໃນຄັ້ງນີ້, ທາງຄະ ນະກຳມະການຄວບຄຸ້ມໄພພິບັດ ສູນກາງ ແມ່ນມີຄວາມເຊື່ອໝັ້ນ ຕໍ່ການຊີ້ນຳ-ນຳພາຂອງແຂວງ ກໍຄືຄະນະກຳມະການຄວບຄຸ້ມໄພພິບັດຂັ້ນແຂວງ, ຂະແໜງການ ຕ່າງໆຈະພ້ອມກັນແກ້ໄຂໄດ້ດີ ແລະ ພ້ອມກັນຜ່ານວິກິດຄັ້ງນີ້ໄປໄດ້, ເອົາໃຈໃສ່ປົວແປງບັນດາ ເສັ້ນທາງ, ຕາຂ່າຍໄຟຟ້າ, ການສື່ສານ, ລະບົບນ້ຳໃຊ້ ແລະ ຊີວິດການເປັນຢູ່ຂອງປະຊາຊົນຜູ້ທີ່ໄດ້ຮັບຜົນກະທົບໃຫ້ກັບຄືນສູ່ສະພາບປົກກະຕິໂດຍໄວ.
ໃນໂອກາດ ລົງກວດກາຜົນກະທົບໄພນ້ຳຖ້ວມໃນຄັ້ງນີ້, ຄະນະກຳມະການຄວບຄຸມໄພພິບັດຂັ້ນສູນກາງ ຍັງໄດ້ມອບເຂົ້າສານໜຽວ 20 ໂຕນ, ສັງກະສີ 2.000 ແຜ່ນ, ເຫຼັກຕະປູ 500 ກັບ ແລະ ເງິນຈຳນວນ 200.000.000 ກີບ ລວມມູນຄ່າທັງໝົດ 462.600.000 ກີບ, ນອກນັ້ນ ກະຊວງປ້ອງກັນປະເທດ ຍັງໄດ້ມອບເງິນຈຳນວນ 200.000.000 ກີບ ໃຫ້ແກ່ແຂວງ ເພື່ອນຳໃຊ້ເຂົ້າໃນການບັນເທົາທຸກ ແລະ ພື້ນຟູພື້ນຖານໂຄງລ່າງທີ່ເປ່ເພເສຍຫາຍໃຫ້ກັບຄືນສູ່ສະພາບປົກກະຕິ.
